Oto dulu okukala noushili kutya Jehova okwe ku dimina po

1-2. Jehova ohe tu ningile shike, ngeenge otwe lidilulula? (Tala yo kombada yoshifo.)

OHAMBA David oya li hai kala i udite ondjo omolwomanyono ayo omonakudiwa. (Eps. 40:12; 51:3) Oya li ya nyona omanyono a kwata moiti monghalamwenyo yayo. Ashike oya li ye lidilulula, na Jehova okwa li e i dimina po. (2 Sam. 12:13) Oshidjemo, David okwa li a pepelelwa, eshi Jehova e mu dimina po. — Eps. 32:1.

² Ngaashi David, nafye ohatu dulu okukala tu udite twa pepelelwa, omolwonghenda yaJehova. Mbela itashi hekeleke tuu okushiiva kutya Jehova okwa halelela oku tu dimina po, nokuli nonande otwa nyona sha kwata moiti, ngeenge otwe lidilulula, twa dimina kutya otwa nyona notwa ninga ngaashi hatu dulu tuha endulula omapuko etu! (Omayel. 28:13; Oil. 26:20; 1 Joh. 1:9) Itashi hekeleke tuu okushiiva kutya Jehova ohe tu dimine po filufilu, ndele hatu kala twa fa inatu nyona nande onale! — Hes. 33:16.

3-4. Omumwameme umwe okwa li e udite ngahelipi konima eshi a ninginifwa, noshike hatu ka kundafana moshitukulwa eshi?

³ Omafimbo amwe, vamwe otashi dulika hava mono shidjuu okwiitavela kutya Jehova okwe va dimina po. Natu ka taleni koshimoniwa shaJennifer, oo a kulila moshili. Eshi a li omunyasha, okwa li e na elihumbato inali koshoka nokwa li e na onghalamwenyo yopavali. Konima yomido, okwa li a alukila kuJehova, nomokweendela ko kwefimbo, okwa li a ninginifwa. Okwa ti: “Monakudiwa, onda li ndi hole oinima yopamaliko, handi i moluhaelo, handi nu sha pitilila nonda li ndi na ehandu lidjuu. Onda li ndi shii kutya ohandi ka dula okudiminwa po omolwekuliloyambo laKristus, ngeenge onda pula ndi diminwe po nokulivela ombedi. Ashike nonande onde livela ombedi, kanda li nda tomhwa kutya onda diminwa po.”

⁴ Mbela omafimbo amwe oho mono shidjuu okukala wa tomhwa kutya Jehova kwe ku dimina po omolwomapuko oye omonakudiwa? Ngaashi David a li e udite, Jehova okwa hala tu kale twa hafa omolwefilonghenda laye. Moshitukulwa eshi, ohatu ka kundafana kutya omolwashike twa pumbwa okukala twa tomhwa kutya Jehova okwe tu dimina po nosho yo osho tashi ke tu kwafela tu ningi ngaho.

OMOLWASHIKE TU NA OKUKALA TWA TOMHWA KUTYA JEHOVA OKWE TU DIMINA PO?

5. Satana okwa hala tu kale twa itavela shike? Yandja oshihopaenenwa.

⁵ Ngeenge otwa kala twa tomhwa kutya Jehova okwe tu dimina po, ohatu ka dula okuhenuka okuwila momwiyo waSatana. Dimbuluka kutya Satana ota ningi ngaashi ta dulu, opo e tu ningife tu efe po okulongela Jehova. Opo Satana a hange elalakano olo, ota kendabala oku tu itavelifa kutya omanyono etu itaa dulu okudimwa po. Natu ka taleni koshimoniwa shomulumenhu womuKorinto oo a li a kufwa mo meongalo, molwaashi a li a ya moluhaelo. (1 Kor. 5:​1, 5, 13) Lwanima eshi e lidilulula, Satana okwa li a hala ovo ve li meongalo vehe mu dimine po novehe mu tambule ko. Pefimbo opo tuu opo, Satana okwa li a hala omulumenhu, oo e lidilulula, a kale e udite ina diminwa po, noku wililwe po neenghono koluhodi fiyo osheshi a efa po okulongela Jehova. Satana ina lundulula elalakano laye, ile omakoto aye. Ashike “otu shii omakoto aye.” — 2 Kor. 2:​5-11.

6. Oshike tashi dulu oku tu kwafela tu kale twa pepelelwa notuha kale tu udite ondjo?

⁶ Ngeenge otwa kala twa tomhwa kutya Jehova okwe tu dimina po, ohatu ka kala tu udite twa pepelelwa, noitatu ka kala tu udite ondjo. Ngeenge twa nyona, oshili paushitwe okukala tu udite ondjo. (Eps. 51:17) Naasho oshinima shiwa. Eliudo letu otali dulu oku tu linyengifa tu katuke eenghatu, opo tu wapaleke omapuko etu. (2 Kor. 7:​10, 11) Onghee ngeenge otwa kala tu udite ondjo oule wefimbo lile, nokuli nokonima eshi twe lidilulula, otashi dulika tu ka sholole. Ngeenge otwa kala twa tomhwa kutya Jehova okwe tu dimina po, otashi ke tu kwafela tuha kale tu udite ondjo. Opo nee ohatu ka dula okulongela Jehova monghedi oyo a hala, tu na eliudo la yela notwa hafa neenghono. (Kol. 1:​10, 11; 2 Tim. 1:3) Ndele mbela ongahelipi hatu dulu okukala twa tomhwa kutya Jehova okwe tu dimina po?

OSHIKE TASHI DULU OKU TU KWAFELA TU KALE TWA TOMHWA KUTYA JEHOVA OKWE TU DIMINA PO?

7-8. Jehova okwa li a lombwela shike Moses kombinga yaYe, naasho otashi tu pe elineekelo lilipi? (Exodus 34:​6, 7)

⁷ Diladila kwaasho Jehova a popya kombinga yaye. Pashihopaenenwa, diladila osho Jehova a lombwela Moses kOmhunda Sinai.a (Lesha Exodus 34:​6, 7.) Nonande Jehova oku na omaukwatya mahapu mawa, okwa li a hoolola okulombwela Moses kutya oku li “Kalunga omunanghenda nomunalukeno.” Ngeenge oku na omaukwatya a tya ngaho, mbela ota ka kala ngoo ina dimina po omupiya waye oo e lidilulula shili? Hasho nandenande! Ngeenge Jehova okwa kala ine mu dimina po, otashi ulike kutya ke na onghenda nolukeno, ashike Jehova ke na efiku a ninge ngaho.

⁸ Ohatu dulu okukala tu na elineekelo kutya Jehova ke na efiku a popye oipupulu kombinga yaye mwene, molwaashi oku li Kalunga omunashili. (Eps. 31:5) Onghee ohatu dulu okukala twe lineekela eendjovo daye odo a popya. Ngeenge owe lihange u udite ondjo noito dulu okupula komesho omolwomanyono oye omonakudiwa, lipula kutya: ‘Mbela onda itavela ngoo kutya Jehova omunanghenda shili nomunalukeno, noita ka kala ina dimina po omunyoni keshe oo e lidilulula? Ngeenge onda itavela oshinima sha tya ngaho, mbela itandi dulu okukala nda tomhwa kutya okwa dimina nge po?’

9. Osha hala okutya shike okudiminwa po omanyono etu? (Epsalme 32:5)

⁹ Dilonga kwaasho Jehova te tu hongo mOmbiibeli, shi na sha nanghee he tu dimine po. Pashihopaenenwa, diladila kunghee David, omushangi wOmbiibeli, a popya kombinga yaJehova. (Lesha Epsalme 32:5.) David okwa ti: ‘Owa dima po omatimba ange omolwepuko olo.’ Oshitya shOshiheberi “dima po,” osho sha longifwa movelise ei, osha hala yo kutya “okuyelula,” ile “okuhumbata.” Eshi Jehova a dimina po David okwa fa a yelula po omanyono aye noku a humbata po. David okwa li e udite a pepelelwa, molwaashi okwa li a kufwa omutengi mudjuu wokukala e udite ondjo. (Eps. 32:​2-4) Ngaashi David, nafye ohatu dulu okukala twa pepelelwa. Ngeenge otwe lidilulula shili, omolwomapuko oo twa ninga, itatu ka kala vali twa wililwa po komutengi wokukala tu udite ondjo, molwaashi Jehova okwa yelula po nokwa humbata po omutengi wetu.

10-11. Mbela outumbulilo “lilongekida okudimina po” otau tu lombwele shike kombinga yaJehova? (Epsalme 86:5)

¹⁰ Lesha Epsalme 86:5. David okwa popya kutya Jehova okwe “lilongekida okudimina po.” Osho osha hala okutya Jehova iha endelele okuhanduka, ngeenge twa ninga omapuko, nokwa halelela okudimina po alushe ovo ve lidilulula. Omolwashike Jehova ha dimine po? Oshitukulwa sha landula ko shovelise osha ti: “Ove u nolukeno naava have ku ifana.” Ngaashi twe lihonga moshitukulwa sha tetekela, ohole yaJehova i na oudiinini ohai mu linyengifa aha fiye po ovapiya vaye ovadiinini. Omolwohole yaye i na oudiinini, “ota ka dimina po nehalo liwa” aveshe ovo ve lidilulula. (Jes. 55:​7, esh.) Ngeenge oho mono shidjuu okukala wa tomhwa kutya Jehova okwe ku dimina po, oto dulu okulipula kutya: ‘Mbela onda itavela ngoo kutya Jehova oha dimine po; e lilongekida okudimina po aveshe ovo ve lidilulula nove mu pula e va file onghenda? Ngeenge onda itavela ngaho, mbela itandi dulu okukala nda tomhwa kutya okwa dimina nge po, eshi nde mu pula a file nge onghenda?’

¹¹ Ohatu dulu okumona ehekeleko mokushiiva kutya Jehova oku udite ko filufilu okuhawanenena kwetu. (Eps. 139:​1, 2) Natu ka taleni kunghee epsalme limwe laDavid tali dulu yo oku tu kwafela tu kale twa tomhwa kutya Jehova okwe tu dimina po.

MBELA JEHOVA OHA DIMBULUKA SHIKE KOMBINGA YETU?

12-13. She likolelela kEpsalme 103:​14, Jehova oha dimbuluka shike kombinga yetu, naasho ohashi mu linyengifa a ninge shike?

¹² Lesha Epsalme 103:14. David okwa popya kutya Jehova “ota dimbuluka kutya fye ondwi yedu.” David okwa popya eendjovo odo, opo a yelife etomheno limwe kutya omolwashike Jehova e lilongekida okudimina po ovalongeli vaye ovo ve lidilulula. Oku shii filufilu kutya inatu wanenena. Opo tu shi ude ko nawanawa, natu ka konakoneni moule eendjovo odo daDavid.

¹³ David okwa popya kutya Jehova “oku shii nawa oshitwe yetu.” Okwa ma Adam “mondwi yedu,” noku shii kutya ovanhu va wanenena ova ngabekwa, pashihopaenenwa, ova pumbwa okulya, okukofa nokufuda. (Gen. 2:7) Ashike eshi a Adam naEva va nyona, ovanhu ohava ifanwa va dja mondwi yedu omolwetomheno vali limwe. Tu li oludalo lavo, otwa fyuulula oukwatya woulunde oo hau tu ningifa tu nyone. Jehova oku shii kutya molwaashi otwa fyuulula oulunde ohatu ka ninga omapuko omafimbo nomafimbo, nongeenge otwa ningi omapuko nokulidilulula, ote ke tu fila onghenda noku tu dimina po. — Eps. 78:​38, 39.

14. (a) David okwa popya vali shike kombinga yonghedi omo Jehova ha dimine po? (Epsalme 103:12) (b) Oshihopaenenwa shaDavid osha ulika ngahelipi filufilu edimine po laJehova? (Tala oshimhungu “Nghee Jehova ha dimine po nokudimbwa.”)

¹⁴ Oshike vali tashi dulu oku tu kwafela tu kale twa tomhwa kutya Jehova okwe tu dimina po? (Lesha Epsalme 103:12.) David okwa popya kutya ngeenge Jehova e tu dimina po, oha ehenifa omanyono etu kokule ngaashi ashike “oushilo u li kokule nouninginino.” Ngaashi tu shi shii, oushilo nouninginino ou lyaafane kokule lela nokau na efiku u shakene. Mbela osho otashi tu lombwele shike kombinga yomanyono oo Jehova a dima po? Osho osha hala okutya, ngeenge Jehova a dima po omanyono etu, ohe a ehenifa kokule nafye, nokape na osho tashi dulu oku mu ningifa a diladile kombinga yomanyono etu, ile shi tu ningife tu a dimbuluke. — Hes. 18:​21, 22; Oil. 3:19.

15. Oshike hatu dulu okuninga, ngeenge otwa kala tu udite ondjo omolwomanyono etu omonakudiwa?

¹⁵ Ongahelipi eendjovo daDavid odo di li mEpsalme 103 tadi tu kwafele tu kale twa tomhwa kutya Jehova okwe tu dimina po? Ngeenge otu udite ondjo omolwomanyono etu omonakudiwa, ohatu dulu okulipula kutya: ‘Mbela ohandi dimbwa osho Jehova ha dimbuluka, sha hala okutya, mbela ohandi dimbwa kutya Jehova oha dimbuluka kutya inandi wanenena nota ka dimina po ovo ve lidilulula ngaashi ame? Mbela ohandi dimbuluka yo osho Jehova a hoolola okudimbwa, sha hala okutya, mbela ohandi dimbuluka omanyono oo a dima po noke na vali efiku a handukile nge omolwao?’ Jehova iha yandje elitulemo komanyono etu omonakudiwa. Nafye katu na okuyandja elitulemo kuo. (Eps. 130:3) Ngeenge otwa kala tu na elineekelo kutya Jehova okwe tu dimina po, ohatu ka dula okulidimina po fye vene omolwomapuko etu omonakudiwa, nokutwikila okulongela Jehova nehafo.

16. Yandja efaneko li na sha nanghee sha nyika oshiponga okukala to diladila komanyono oo wa ninga monakudiwa. (Tala yo efano.)

¹⁶ Natu shi faneke ngaha: Ngeenge otwa kala hatu livele ombedi omolwomapuko oo twa ninga monakudiwa, otwa fa hatu kendabala okushinga ohauto tai i komesho, ofimbo hatu twikile nokutala mesipili lokonima. Oshiwa okutala mesipili efimbo nefimbo, opo u dule okuhenuka oiponga. Ashike opo tu shinge tu li meameno, otwa pumbwa okushinga hatu yandje elitulemo komesho. Sha faafana, oshiwa ngeenge otwa kala hatu diladila omafimbo nomafimbo komapuko oo twa ninga monakudiwa, molwaashi otae ke tu kwafela tu lihonge kuo notae ke tu kwafela tuhe a endulule. Ndele ngeenge otwa kala hatu yandje elitulemo komapuko oo twa ninga monakudiwa, ohatu ka kala tu udite ondjo, noitatu ka kala twa hafa, eshi hatu longele Jehova. Onghee natu twikile okuyandja elitulemo kondjila oyo i li komesho yetu. Otu li mondjila oyo tai twala komwenyo waalushe, mounyuni mupe oo Kalunga a udaneka, omo oinima ii “itai ke uya vali momadiladilo.” — Jes. 65:17; Omayel. 4:25.

TWIKILA OKUKALA WA TOMHWA

17. Omolwashike twa pumbwa okukala twa tomhwa kutya Jehova oku tu hole nokwe tu dimina po?

¹⁷ Otwa pumbwa okukala twa tomhwa kutya Jehova oku tu hole nokwe tu dimina po. (1 Joh. 3:19) Omolwashike? Omolwaashi Satana ita ka efa po okuninga eenghendabala e tu tomhe kutya katu holike noitatu dulu okudiminwa po. Kashi na nee mbudi kutya oshike, elalakano laye oku tu efifa po okulongela Jehova. Otu shii kutya Satana ota ka ninga eenghendabala a mana mo, molwaashi oku shii kutya oku na ko okafimbo kaxupi. (Eh. 12:12) Inatu efa a findane!

18. Oshike to dulu okuninga, opo u kale wa tomhwa kutya Jehova oku ku hole nokwe ku dimina po?

¹⁸ Opo u kale wa tomhwa kutya Jehova oku ku hole, tula moilonga omaetepo oo twa kundafana moshitukulwa sha tetekela. Opo u kale wa tomhwa kutya Jehova okwe ku dimina po, diladila kwaasho Jehova a popya kombinga yaye mwene. Dilonga kwaasho Jehova te tu hongo mOmbiibeli shi na sha nanghee he tu dimine po. Ino dimbwa kutya oku shii okuhawanenena kwoye nota ka ungaunga naave nonghenda. Dimbuluka kutya, ngeenge okwe ku dimina po, okwe ku dimina po filufilu. Opo nee, oto ka kala wa hafa eshi wa tomhwa kutya Jehova ohe ku ulikile onghenda, noto ka popya ngaashi David, to ti: “Tangi, Jehova, eshi wa ‘dima po omatimba ange’!” — Eps. 32:5.