Onhana yoshingoli

TALA oixuna! Oshike osho ovanhu otava ningi? Otava ilikana onhana yoshingoli. Mbela omolwashike tava ningi oshinima sha tya ngaho?

Eshi Moses a kala efimbo lile komhunda, ovanhu ova hovela okungongota tava ti: ‘Katu shi shii kutya oshike sha ningwa po shi na sha naMoses. Natu ningeni oshikalunga shi tu kwatele komesho.’

Omumwaina waMoses, Aron, okwa dimina a ti: ‘Oshi li nawa. Duleni mo hano omangola eni oshingoli ndele tamu a eta kwaame.’ Eshi ovanhu ve a eta, Aron okwe a teleka ndele ta me onhana yoshingoli. Opo nee ovanhu ova ti: ‘Ou oye Kalunga ketu ou e tu pitifa mo muEgipti.’ Ova ninga oshivilo shinene opo va ilikane onhana yavo yoshingoli.

Eshi Jehova e shi mona, okwa li a handuka neenghono. Onghee hano, okwa lombwela Moses a ti: ‘Endelela, londoloka ko komhunda. Ovanhu otava ningi oshinima shinyanyalifi. Ova dimbwa nale oipango yange notava ilikana onhana yoshingoli.’

Moses okwa londoloka ko komhunda meendelelo. Eshi a ehena popepi, okwa mona ovanhu tava imbi nokudana tava dingilile onhana yoshingoli, ngaashi u shi wete mefano olo. Moses okwa li a handuka neenghono, nomolwaasho okwa ekelashi oipelende yomamanya oyo kwa li a pewa, oyo ya li ya shangwa oipango 10. Oipelende aishe ivali oya tatuka po filufilu. Opo nee okwa kufa po onhana yoshingoli ndele te i xwike po, ndele tai hengumuka po. Okwa li e i twa po ndele tai ningi ombudu.

Ovanhu ova li va ninga oshinima shii neenghono. Onghee hano, Moses okwa lombwela ovalumenhu vonhumba va kufe omaongamukonda, ndele ta ti: ‘Dipaeni ovanhu aveshe ovo va li tava ilikana onhana yoshingoli.’ Ovalumenhu ovo ova li va dipaa ovanhu 3 000. Mbela osho itashi tu hongo kutya otu na ashike okwiilikana kuJehova oye aeke, ndele haikalunga?