Okuteka po kwomakuma aJeriko

OMAKUMA aJeriko otaa u po kushike? Otaa monika a fa taa hanaunwa po koboma inene. Ashike pefimbo olo, ovanhu kava li hava longifa eeboma nokava li hava lu neendjebo. Jehova oye a li a teya po omakuma aJeriko pashikumwifilonga. Natu ka taleni kutya osha li sha enda ngahelipi opo omakuma oo a teke po.

Jehova okwa li a lombwela Josua a ti: ‘Dingonokeni oshilando osho, ove novakwaita voye. Shi dingonokeni lumwe keshe efiku, oule womafiku ahamano. Omu na oku shi dingonoka mwa humbata oshikefa shehangano. Ovapristeri vaheyali ove na oku mu pita komesho, tava shiki omanghuma.

‘Mefiku etiheyali, omu na okudingilila oshilando osho oikando iheyali. Opo nee shikeni omakuma efimbo lile nakeshe umwe na ingide mokule eingido loita. Shimha mwa ningi ngaho, omakuma oshilando osho otaa ka teka po.’

Josua novanhu ovo va li pamwe naye ova li va ninga naanaa ngaashi Jehova e va lombwela. Fimbo va li tava dingilile oshilando osho, kapa li nande oumwe ta popi. Ova li va mwena filu. Ovanhu ova li ashike ve udite eshiko lomanghuma naashi ovanhu tava ende. Nopehe na omalimbililo, osho osha li sha ningifa ovatondi voshiwana shaKalunga ovo va li muJeriko va kale va tila. Mbela ou wete ongodi itilyana oyo ya endjelela mekende? Mbela ekende olo oleumbo lalye? Ekende leumbo laRahab. Rahab okwa li a ninga ngaashi eendadi da li de mu lombwela a ninge. Okwa hangwa a ongela ovapambele vaye aveshe meumbo laye, tava tale kutya oshike tashi ningwa po.

Mefiku etiheyali, Josua ova li va dingilila Jeriko oikando iheyali. Opo nee ovapristeri ova shika omanghuma mokule oule wefimbo novakwaita ova ingida mokule eingido loita. Ohaluka, omakuma aJeriko okwa hovela okungumauka po. Josua okwa ingida a ti: ‘Dipaeni keshe umwe moshilando noku shi xwika po. Xwikei po oinima aishe. Xupifeni po ashike oshisilveri, oshingoldo, oshivela shitwima noshivela shilaula, ndele tai ka tuvikilwa moshikefa shetwali laJehova.’

Josua okwa lombwela eendadi mbali odo a tumine kuJeriko, a ti: ‘Indeni meumbo laRahab. Eteni mo Rahab novapambele vaye aveshe.’ Kungaho, Rahab novapambele vaye ova li va xupifwa, ngaashi naanaa eendadi odo da li de mu udanekela.