Etukulwa 14
Ovahongwa vaJesus votete
KONIMA eshi Jesus a li mombuwa oule womafiku 40, okwa li a shuna kuJohannes oo a li e mu ninginifa. Eshi Jesus a li ta fiki puJohannes, otashi dulika Johannes a li e mu ulika ndele ta lombwele ovo a li navo a ti: “Tala, Odjona yaKalunga tai kufa po omatimba ounyuni. Oye tuu ou nde mu tonga nda tile: Konima yange tape uya omulumenhu ou a li komesho yange, osheshi Ye opo a li, fimbo ame ndi ha li po.” Nonande Johannes okwa li omukulunhu kumhedi yaye Jesus, Johannes okwa li e shi shii kutya Jesus okwa kala ko nale komesho yaye, eshi a li omunhu wopamhepo meulu.
Ndele oivike inini ya pita, eshi Jesus a li a ka ninginifwa kuJohannes, Johannes otashi dulika ka li e shii filufilu kutya Jesus oye a li ta ka kala Messias. Johannes okwa li a popya a ti: “Ndele ame nda li ndi he mu shii; ndelenee opo a hololelwe Israel, onghee nde uya [okuninginifa, NW ] nomeva.”
Johannes okwa li a twikila okuyelifila ovapwilikini vaye osho sha li sha ningwa po eshi Jesus a ninginifwa, a ti: “Onda mona Omhepo ya fa onghuti ya kuluka ya dja meulu, ndee tai kala kombada yaye. Ndele ame nda li ndi he mu shii, ndelenee ou a tuma nge [okuninginifa, NW ] nomeva, ye okwa lombwela nge: Oye ou to mono Omhepo tai wile kombada yaye, ndee tai kala po, Oye tuu ou ta [ninginifa, NW ] nOmhepo Iyapuki. Ndele ame nde shi mona, ndele handi hepaulula nokutya, Oye Omona waKalunga.”
Efiku la landula ko, Johannes okwa li e li novahongwa vaye vavali, na Jesus okwa li e uya puvo, ndele Johannes ta ti vali: “Tala, Odjona yaKalunga.” Okudja opo, ovahongwa ovo vavali vaJohannes Omuninginifi ova li va landula Jesus. Umwe womuvo okwa li Andreas, naumwe osha yela kutya okwa li Johannes oo a shanga ehokololo eli. Ouyelele otau ulike kutya Johannes oo okwa li yo mhedi yaJesus, tashi dulika a dalwa komumwaina waMaria, Salome.
Eshi Jesus a li a mona Andreas naJohannes tave mu shikula, Jesus okwa li e va pula a ti: “Otamu kongo shike?”
Andreas naJohannes ova li va nyamukula va ti: ‘Rabbi, owa kala peni?’
Jesus okwa li e va nyamukula a ti: “Ileni mu tale!”
Osha li onhee yokomatango lwaapo, na Andreas naJohannes ova li va kala naJesus efiku alishe. Konima yaasho, Andreas okwa li a hafa neenghono ndele ta endelele a ka konge mumwaina wedina Petrus. Andreas okwa li a lombwela Petrus a ti: “Fye otwa mona Messias.” Opo nee, Andreas okwa li a twala Petrus kuJesus. Otashi dulika pefimbo opo Johannes naye a li a mona mumwaina Jakob, ndele te mu twala kuJesus. Ashike oshikumwifi eshi Johannes ina shanga ouyelele oo u na sha naye pauhandimwe mEvangeli laye.
Efiku la landula ko, Jesus okwa li a mona Filippus, oo a dja kuBetsaida, koshilando oko kwa dja Andreas naPetrus. Opo nee okwa li e mu lombwela a ti: “Shikule nge!”
Filippus okwa li yo a mona Natanael, oo ha ifanwa yo Bartolomeus, ndele ta ti: “Ofye twa mona ou a shangwa kuMoses momhango nokovaprofeti, Jesus, omona waJosef wOmunasaret.” Natanael okwa li a limbililwa, ndele ta pula ta ti: “MuNasaret otamu di tuu ouwa nande washa?”
Filippus okwa li a ladipika Natanael a ti: “Ila u ka tale!” Eshi va li tava fiki puJesus, Jesus okwa li a popya kombinga yaNatanael a ti: “Tala, Omuisrael washili e he nekoto.”
Natanael okwa li a pula Jesus a ti: ‘Ove ou shii nge peni?’
Jesus okwa li a nyamukula a ti: “Fimbo Filippus ine ku ifana, eshi wa kala momukwiyu, onde ku mona.”
Natanael okwa li a kumwa ndele ta ti: “Rabbi, Oove Omona waKalunga, Oove ohamba yaIsrael.”
Jesus okwa li e mu lombwela a ti: “Eshi nde ku lombwela: onde ku mona momukwiyu, onghee wa itavela. Oto ka mona oinima inene i dule ei.” Opo nee Jesus okwa li e mu udanekela a ti: “Oshilishili handi mu lombwele: otamu ka mona eulu la yeuluka, novaengeli vaKalunga tava londo ndee tava londolokele kOmona wOmunhu.”
Diva konima yaasho, Jesus okwa li a fiya po efilu laJordan pamwe novahongwa vaye vape, ndele tava i kuGalilea. Johannes 1:29-51.
▪ Oolyelye va li ovahongwa vaJesus votete?
▪ Petrus nosho yo Jakob otashi dulika va li va shakeneka Jesus ngahelipi?
▪ Oshike sha li sha tomha Natanael a itavele kutya Jesus Omona waKalunga?