Etukulwa 15

Oshikumwifilonga shaJesus shotete

OPA pita ashike omafiku manini okudja eshi Andreas, Petrus, Johannes, Filippus, Natanael nosho yo tashi dulika Jakob va li va ninga ovahongwa vaJesus votete. Jesus novahongwa ovo ova li tava i keumbo koshitukulwa shaGalilea, oko aveshe va dile. Ova li tava i kuKaana, oko kwa dile Natanael, shi li koikulundudu i li popepi naNasaret, oko Jesus a kulila. Jesus novahongwa vaye ova li va shivwa koshivilohombolo kuKaana.

Ina yaJesus naye okwa li a shivwa koshivilohombolo. Otashi dulika Maria a li ta yakula ovaenda vahapu ovo va li ve uya koshivilohombolo, molwaashi okwa li kaume koukwaneumbo omo mwa li mu na oshivilohombolo. Onghee hano, Maria okwa li a mona diva kutya kave na omaviinyu a wana, ndele ta lombwele Jesus a ti: “Vo kave na omaviinyu.”

Eshi Maria a li a lombwela Jesus ngaho, okwa li a fa ta ti paulelalela kutya Jesus na ninge po sha shi na sha nomaviinyu oo ehe po, ashike Jesus okwa li ta ongaonga. Jesus okwa li a pula Maria a ti: “Omukainhu, ondi na shike naave?” E li Ohamba ya nangekwa po kuKalunga, Jesus ka li e na okulombwelwa kovakwanedimo ile kookaume kaye osho e na okuninga. Onghee hano, Maria okwa li a efela oshinima osho momake omona waye, ndele ta lombwele ovo va li tava yakula a ti: “Keshe eshi te mu lombwele, shi ningeni.”

Opa li oitoo ihamano yomamanya yakula yokutula omeva, oyo keshe shimwe sha li hashi wana eelitela 40. Jesus okwa li a lombwela ovanhu ovo va li tava yakula a ti: “Yadifeni oitoo nomeva.” Ovayakuli ova li va yada oitoo oyo filufilu. Opo nee Jesus okwa li e va lombwela a ti: “Pindeni mo, nye mu twalele omuyakuli wovaenda.”

Omuyakuli wovaenda okwa li a kumwa eshi a mona omaviinyu mawa a tya ngaho, molwaashi ka li e shii kutya okwa ningwa pashikumwifilonga. Opo nee, omuyakuli wovaenda okwa li a ifana omuhomboli, ndele ta ti: “Omunhu keshe tete ota yandje omaviinyu mawa, ndelenee ngenge va kumwa, opo nee aa [mai]. Ove wa holeka omaviinyu mawa fiyo paife.”

Oshikumwifilonga osho osha li oshikumwifilonga osho Jesus a li a longa tete, naashi ovahongwa vaye vape va li ve shi mona, osha li sha pameka eitavelo lavo. Konima yaasho, Jesus naina nosho yo ovamwaina, ova li va ya kuKapernaum, oshilando osho sha li popepi nEfuta laGalilea. Johannes 2:1-12.

▪ Opefimbo lilipi loukalele waJesus pa li pa ningwa oshivilohombolo muKaana?

▪ Omolwashike Jesus a li ina tambula ko eetepo laina?

▪ Jesus okwa li a longa oshikumwifilonga shilipi, nosha li sha kuma ngahelipi vamwe?