Etukulwa 17
Jesus ta hongo Nikodemus
PEFIMBO lOpaasa, mo 30 O.P., Jesus okwa li a longa oikumwifilonga ididilikwedi. Oshidjemo, ovanhu vahapu ova li ve mu itavela. Omulumenhu umwe wedina Nikodemus, oo a li oshilyo shOmhangu yopombada yOvajuda, okwa li a kuminwa oikumwifilonga yaJesus nokwa li a hala okulihonga shihapu. Onghee hano, okwa li a ya kuJesus oufiku, naasho okwe shi ninga molwaashi tashi dulika kwa li a tila kutya ota ka kala e tondike kovawiliki vakwao Ovajuda.
Nikodemus okwa ti: “Rabbi, otu shi shii, oove omulongi wa dja kuKalunga, osheshi kape na ou ta dulu okuninga [oikumwifilonga] ei to i ningi, Kalunga ngenge ke li pamwe naye.” Jesus okwa li a lombwela Nikodemus kutya opo omunhu a ye mOuhamba waKalunga oku na ‘okudalululwa.’
Ndele mbela omunhu ota dulu ngoo okudalululwa? Nikodemus okwa li a pula Jesus a ti: “Ita dulu ndi shii okushuna medimo laina nokudalwa?”
Okudalululwa oko Jesus a li ta popi hasho kwa hala okutya ngaho, onghee hano Jesus okwa li a yelifila Nikodemus a ti: “Omunhu ngenge ita dalwa komeva nokOmhepo, ita dulu okuya mouhamba waKalunga.” Eshi Jesus a li a ninginifwa ndele omhepo iyapuki ta i uya kombada yaye, kungaho okwa li a “dalwa komeva nokOmhepo.” Pefimbo lokuninginifwa kwaJesus, opa li yo pa udika ondaka ya dja meulu tai ti: “Ou Omona wange omuholike, onde mu hokwa.” Ondaka oyo oya li yaKalunga ta shiivifa kutya Jesus okwa ninga omona waye wopamhepo nokwa li e na eteelelo loku ka ya mOuhamba womeulu. Lwanima, pOpentekoste yo 33 O.P., ovanhu aveshe ovo va li va ninginifwa ova li yo va tililwa omhepo iyapuki, nokungaho ova li va dalululwa ve li ovana vaKalunga vopamhepo.
Ashike Omona waKalunga e likalekelwa okwa li e na okudana onghandangala ya fimanenena. Jesus okwa li a lombwela Nikodemus a ti: “Ndele ngaashi Moses a tulika eyoka pombada mombuwa, nosho yo Omona wOmunhu oku nokutulikwa pombada, opo keshe tuu ou te mu itavele, a ha kane, ndele a kale e nomwenyo waalushe.” Ngaashi ashike Ovaisrael ovo va li va lika komayoka oudiyo va li ve na okutala keyoka loshivela shitwima opo va xupifwe, ovanhu aveshe ova pumbwa okukala ve na eitavelo tali longo mOmona waKalunga opo va dule okuxupifwa mefyo.
Opo Jesus a divilike onghandangala oyo Jehova a dana shi na sha nokuxupifwa kwovanhu, okwa li a lombwela Nikodemus a ti: “Osheshi osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” Onghee hano, konima ashike yeemwedi hamano, eshi Jesus a li a hovela oukalele waye muJerusalem, okwa li e shi ulika sha yela kutya oye ta longifwa kuJehova opo a xupife ovanhu.
Jesus okwa li a twikila okuyelifila Nikodemus a ti: “Osheshi Kalunga ina tuma Omona waye mounyuni a tokole ounyuni [sha hala okutya, opo ngeno a tokolele ovanhu ehanauno], ndelenee ounyuni u xupifwe kuye.”
Nikodemus okwa li a ya kuJesus oufiku molwaashi okwa li a tila okumonika kuvamwe. Onghee hano, oshihokwifa eshi Jesus a li a xulifa eenghundafana davo naNikodemus a ti: “Ndelenee etokolo oleli: ouyelele [oo Jesus a li a ulika monghalamwenyo yaye nosho yo okupitila mwaasho a li ta hongo] we uya mounyuni, ndelenee ovanhu va li ve hole omulaulu komesho youyelele, osheshi oilonga yavo oii. Osheshi keshe ou ta longo owii, ota tondo ouyelele, ndele ite uya pouyelele, oilonga yaye i ha hanyenwe. Ndelenee ou ha longo oshili, oye ta holokele pouyelele, oilonga yaye i hololwe, osheshi oya ningilwa muKalunga.” Johannes 2:23–3:21;
▪ Oshike sha li she linyengifa Nikodemus a ye kuJesus, nomolwashike a li a ya ko oufiku?
▪ ‘Okudalululwa’ osha hala okutya shike?
▪ Jesus okwa li a faafanifa onghandangala oyo ta dana shi na sha nokuxupifwa kwetu nashike?
▪ Osha hala okutya shike eshi taku tiwa kutya Jesus ka li e uya okutokola ounyuni?