Etukulwa 22

Jesus ta ifana ovahongwa vaye vane

KONIMA eshi ovanhu va li tava kendabala okudipaa Jesus moshilando shavo Nasaret, Jesus okwa li a ya koshilando Kapernaum, osho sha li popepi nEfuta laGalilea. Osho osha li sha wanifa po vali exunganeko limwe laJesaja. Exunganeko olo ololo la li la xunganeka kutya ovanhu vomuGalilea ovo va li hava kala popepi nefuta ova li tava ka mona ouyelele muhapu.

Fimbo Jesus a li ta wanifa po oilonga yokuyandja ouyelele i na sha nokuudifa Ouhamba, okwa li a mona ovahongwa vaye vane. Ovahongwa ovo ova li va enda pamwe naye ndele tava shuna keengeshefa davo dokuyula eeshi eshi va li va dja kuJudea pamwe naJesus. Otashi dulika Jesus a li te va kongo pefimbo opo, molwaashi okwa li a pumbwa ovakwafeli vaalushe, ovo ta dulu okudeula opo va kale tava udifa ngeenge a shuna meulu.

Fimbo Jesus a li ta ende komunghulofuta, okwa li a mona Simon Petrus nosho yo ookaume kaye tava kosho eenete davo, ndele ta i kuvo. Jesus okwa li a londa mowato yaPetrus ndele te mu pula e i twale mefuta. Eshi va li va ya mefuta oshinano shixupi, Jesus okwa li a kala omutumba mowato ndele ta hovele okuhonga eemhunga dovanhu odo da li komunghulofuta.

Konima yaasho, Jesus okwa li a lombwela Petrus a ti: “Ehena mokati kefuta mu ka lukile oiyulifo yeni.”

Petrus okwa li a nyamukula a ti: “Omuhongi, oufiku aushe twa longa, fye inatu kwata mo sha, ndele oiyulifo ohandi i lukile molweendjovo doye.”

Eshi va li va lukila oiyulifo yavo, ova li va kwata eeshi dihapudihapu ndele eenete davo tadi hovele okupomboka. Ovahongwa ovo ova li va ifana diva oovakwao vamwe va li mowato i li popepi ve uye ve va kwafele. Diva, ova li va yadeka eewato adishe eeshi dihapu ndele eewato tadi hale okuningina. Eshi Petrus a mona oshinima osho, okwa li a twa eengolo puJesus ndele ta ti: “Omwene, dja po puame, osheshi aame omulunde.”

Jesus okwa li a nyamukula Petrus a ti: “Ino tila, okonena tuu eli oto ningi omuyuli wovanhu.”

Jesus okwa li yo a ifana Andreas, omumwaina waPetrus. Okwa li e va ifana a ti: “Shikuleni nge, Ame ohandi ke mu ninga ovayuli vovanhu.” Jesus okwa li yo a ifana Jakob naJohannes ovana vaSebedeus, ovo va li hava yulu eeshi pamwe naAndreas naPetrus, nova li va endelela okuya pamwe naJesus. Onghee hano, ovahongwa ovo vane ova li va fiya po eengeshefa davo dokuyula eeshi ndele tava kala hava ende pamwe naJesus pandjikilile. Lukas 5:1-11; Mateus 4:13-22; Markus 1:16-20; Jesaja 8:23–9:1.

▪ Omolwashike Jesus a li a ifana ovahongwa vaye vane ve mu shikule, novahongwa ovo ova li oolyelye?

▪ Oshikumwifilonga shilipi sha li sha tilifa Petrus?

▪ Jesus okwa li a shiva ovahongwa vaye va ka ninge ovayuli vashike?