Etukulwa 33

Jesus ta wanifa po exunganeko laJesaja

SHI Jesus a li a mona kutya Ovafarisai nosho yo ongudu oyo ya li ya ama kuHerodes oya li ya pangela omhangela i mu dipae, okwa li a ya novahongwa vaye kefuta laGalilea. Eemhunga dovanhu da dja muPalestina ashishe nosho yo koitukulwa imwe, oda li da mbobolokela kuJesus. Okwa li a velula ovanhu vahapu, naasho osha li sha ningifa ovanhu aveshe ovo va li ve na omikifi da kwata moiti ve lifininike mokati kovanhu opo va ka kume Jesus.

Molwaashi ovanhu ova li vahapu neenghono, Jesus okwa li a lombwela ovahongwa vaye va ehenife owato popepi. Opo ovanhu vehe lifininike vali va yuka kuye, Jesus okwa li a dja po nowato pomunghulofuta. Kungaho, okwa li ta dulu oku va honga e li mowato ile a kale ta kunghula nomunghulofuta opo a ka kwafele ovanhu kombinga ikwao.

Omuhongwa Mateus okwa popya kutya oilonga yaJesus otai wanifa po eendjovo “edi da tongwa komuprofeti Jesaja.” Opo nee Mateus okwa li a tofa mo exunganeko laJesaja olo Jesus a wanifa po.

“Tala, omunhu wange, nde mu hoolola, omuholike wange, ou omwenyo wange we mu hokwa; Ame ohandi mu tula Omhepo yange, oye ndee ta udifile ovapaani etokolo la yuka. Oye iha tamanana ndee iha ingida, ndee ngaashi ondaka yaye itai udika momapandavanda. Oshihati sha tanduka ite shi nyanyaula, nokangodi koshela yomaadi ka twimana, ite ka dimi po, fiyo ta fikifa eshi sha yuka mefindano. Novapaani otave ke lineekela edina laye.”

Jesus oye omunhu ile omupiya omuholike oo a hokiwa kuKalunga. Jesus okwa li yo a ulika kutya ouyuki washili oshike, oo wa li wa pengifwa keenghulunghedi domalongelokalunga oipupulu. Molwaashi Ovafarisai ova li hava tula moilonga omhango yaKalunga shihe li pauyuki, kava li nokuli hava kwafele omunhu oo ta ehama mEshabata. Ndele Jesus okwa li a yukifa ouyuki waKalunga, mokukufa ovanhu omutengi weenghulunghedi dihe li pauyuki, nomolwaasho ovawiliki vomalongelokalunga va li va hala oku mu dipaa.

Osha hala okutya ngahelipi eshi taku tiwa kutya Jesus ‘iha tamanana, iha ingida, nondaka yaye itai udika momapandavanda’? Eshi Jesus a li ta velula ovanhu, okwa li ‘he va kunghilile neenghono vehe mu holole.’ Ka li a hala okukala ta shiivifwa momapandavanda ile ovanhu ve lilombwele omahokololo a pengifwa oo haa taambekidwafana okanya nokanya.

Natango, Jesus okwa li a udifila ovanhu etumwalaka lehekeleko ovo tava popiwa pafaneko ve li ngaashi oshihati sha tanduka, sha endama nosha lyatelwa pedu. Ovanhu ovo ova li va fa okangodi koshela yomaadi taka twimaana, ke li pokudima. Jesus iha nyanyaula oshihati sha tanduka ile a dime okangodi koshela yomaadi taka twimaana. Ndele okwa li ha yambidida ovalininipiki nolukeno nonohole. Oiwana otai dulu shili okulineekela Jesus! Mateus 12:15-21; Markus 3:7-12; Jesaja 42:1-4.

▪ Jesus okwa li a yukifa ouyuki ngahelipi, mokukala iha tamanana ile ha ingida momapandavanda?

▪ Oolyelye va li va fa oshihati sha tanduka nosho yo okangodi koshela taka twimaana, na Jesus okwa li a ungaunga navo ngahelipi?