Etukulwa 49
Jesus ta udifile vali muGalilea
KONIMA yomido mbali lwaapo eshi Jesus a kala ta udifa nomupondo, mbela okwa li a hovela okulonga nonyalo nokuudifa shimha ashike ta udifa? Mepingafano naasho, Jesus okwa li a tamununa mo oukalele waye eshi a li a ya va li molweendo etitatu lokuudifa muGalilea. Jesus okwa li a talela po oilando nosho yo omikunda adishe domoshitukulwa osho, a kala ta hongo moinagoga nokuudifa onghundana iwa yOuhamba. Osho a li a mona pefimbo lolweendo laye olo okwa li she mu tomha kutya oilonga yokuudifa oya endelela shi dulife nale.
Keshe opo Jesus a li a enda, okwa li a mona po eemhunga dovanhu ovo va pumbwa okuvelulwa pamhepo nosho yo okuhekelekwa. Ovanhu ovo ova li va fa eedi dihe na omufita, odo da hepekwa noda ekelwashi, nokwa li e va uditile onghenda. Jesus okwa li a lombwela ovahongwa vaye a ti: “Oilya oi li po ihapu, ndele ovateyi ovo ovanini. Ilikaneni hano Omwene weteyo, a tume ovateyi keteyo laye.”
Jesus okwa li e na po ondungediladilo i na sha noilonga yaye. Okwa li a ifana ovayapostoli vaye 12 ovo a li a hoolola konima yomudo umwe lwaapo. Okwa li e va tukula oovavali noovavali ndele tava ningi eengudu hamano, nokwa li e va pa omalombwelo opo va ka udife. Okwa li e va lombwela a ti: “Inamu ya nondjila tai i kovapaani, nande omoshilando shimwe shOvasamaria inamu ya mo, ndele indeni tete keedi odo da kana domeumbo laIsrael. Ndele keshe apa tamu ende, va lombweleni mu tye: ouhamba weulu wa ehena popepi.”
Ovayapostoli ovo ova li ve na oku ka udifa kombinga yOuhamba oo Jesus a li e va honga kutya nava kale tava ilikana u uye moshihopaenenwa sheilikano. Ouhamba waKalunga owa ehena popepi meityo olo kutya Ohamba oyo ya nangekwa po kuKalunga, Jesus Kristus, opo i li. Jesus okwa li a pa ovayapostoli vaye eenghono dokuvelula ovanaudu, nokunyumuna yo ovafi nokuli, opo a ulike kutya ovayapostoli vaye otava longo ve li ovakalelipo vepangelo olo lihe fi lopanhu. Jesus okwa li e va lombwela va longe oilonga oyo oshali.
Opo nee Jesus okwa li a lombwela ovahongwa vaye vehe lilongekidile eemhumbwe dopalutu eshi tava i molweendo loku ka udifa. Okwa ti: “Inamu lilongelela momakwamo eni oingoldo noisilveri ile oivela itwima, haekutu lokweenda nalo, haoikutu ivali, haenghaku ile odibo; osheshi omulongi a wana okupewa oipalwifa yaye.” Ovo ve na olupandu netumwalaka lavo ova li tave ke li tambula ko nova li tave ke va pa oikulya nosho yo onhele yokukala. Jesus okwa ti: “Ndele mukeshe moshilando ile momukunda tamu fiki mo, puleni, olyelye a wana, nye mu kale meumbo laye, fiyo tamu ka ehena komesho.”
Opo nee Jesus okwa li e va lombwela shi na sha nanghee ve na okuhovela eenghundafana di na sha netumwalaka lOuhamba nomuneumbo. Okwa ti: “Ngenge tamu i meumbo, li kundeni nombili. Ndele eumbo olo ngenge la wana, ombili yeni nai kale mo; ndele ngenge inali wana, ombili yeni nai shune kunye. Ndele ngenge itamu tambulwa mo neendjovo deni itadi pwilikinwa, djeni mo meumbo olo ile moshilando osho, nye mu pupule ondwi keemhadi deni.”
Jesus okwa li e va lombwela kutya moshilando shonhumba omo ovanhu inava tambula ko etumwalaka lavo etokolo lavo otali ka kala la kwata moiti. Okwa li a yelifa a ti: “Oshili handi mu lombwele: edu laSodom nolaGomorra otali kala haxwe . . . li dule oshilando eshi efiku letokolo.” Mateus 9:35–10:15; Markus 6:6-12; Lukas 9:1-5.
▪ Onaini Jesus a li a hovela olweendo laye etitatu lokuudifa muGalilea, nokwa li le mu tomha a itavele shike?
▪ Eshi Jesus a li a tuma ovayapostoli vaye 12 va ka udife, okwa li e va pa omalombwelo elipi?
▪ Omolwashike sha li sha yuka kovahongwa okuudifa kutya Ouhamba owa ehena popepi?