Etukulwa 51

Johannes ta dipawa moshivilo shefiku ledalo

KONIMA eshi Jesus a li a pa ovayapostoli vaye omayele e na sha nanghee ve na oku ka udifa, okwa li e va tuma va ka udife ve li oovavali. Otashi dulika ovayapostoli vaye ovo va li ovamwainafana va li va ka longa pamwe, ngaashi Petrus naAndreas, Jakob naJohannes, Filippus naBartolomeus, Tomas naMateus, Jakob naTadeus nosho yo Simon naJudas Iskariot. Eengudu odo hamano dovaudifi oda li da udifa onghundana iwa yOuhamba nokulonga oikumwifilonga yokuvelula ovanhu keshe opo va enda.

Pefimbo opo, Johannes Omuninginifi okwa li natango e li modolongo. Pomhito opo Johannes okwa li a kala modolongo oule womido mbali lwaapo. Otashi dulika to dimbuluka kutya Johannes okwa li a popya moipafi yovanhu kutya osha puka eshi Herodes Antipas a kufa po omukulukadi wamumwaina Filippus a ninge po waye. Molwaashi Herodes okwa li he liti kutya oha shikula Omhango yaMoses, Johannes okwa li a nyaneka pomutenya oluhaelo olo. Onghee hano, Herodes okwa li a tulifa Johannes modolongo, tashi dulika a li a kondjifwa kuHerodias.

Herodes Antipas okwa li e shii kutya Johannes omulumenhu omuyuki nokwa li ha pwilikine nokuli kuye nehafo. Onghee hano, ka li e shii kutya ne mu ningile shike. Ndele mepingafano naasho, Herodias okwa li e tonde Johannes, nokwa li ha kongo eemhito opo e mu dipaife. Lwanima, omhito oyo a li a teelela opo a dipaife Johannes osho ya fiki.

Diva fimbo Opaasa yomo 32 O.P. ya li inai fika, Herodes okwa li a unganeka oshivilo shinene shedalo laye. Koshivilo osho okwa li kwe uya omalenga aeshe manene aHerodes, eendjai doita nosho yo ovakulunhu aveshe vomuGalilea. Eshi kwa enda taku toko, Salome, omonakadona waHerodias oo ve mu dala nomushamane waye wonale, Filippus, okwa li a ya a ka ndanishile po ovaenda. Ovalumenhu ovo va li po ova li va hokwa neenghono onghedi yaye yokundanisha.

Herodes okwa li a hafela neenghono Salome, nokwa li e mu lombwela a ti: “Indile nge keshe osho wa hala, ndee ohandi shi ku pe.” Herodes okwa li a ana a ti: “Keshe eshi to shi indile nge, ohandi shi ku pe, nande etata loshilongo shange.”

Fimbo Salome i na nyamukula, okwa li a ya kuina ndele te mu pula ta ti: “Ohandi indile shike?”

Herodias ka li tuu a mona omhito oyo a li a hala! Herodias okwa li a nyamukula nopehe na okwoongaonga a ti: “Omutwe waJohannes [Omuninginifi, NW ].”

Divadiva, Salome okwa li a alukila kuHerodes ndele te mu indile ta ti: “Ame onda hala u pe nge paife eshi omutwe waJohannes [Omuninginifi, NW ] omoshiyasha.”

Osho osha li sha nyikifa Herodes oluhodi neenghono. Ndele molwaashi ovaenda vaye ova li ve mu uda eshi ta ningi eano, okwa li a fya ohoni okukala i ne liwanifa po, nonande okwa li e na okudipaa omulumenhu ehe na ondjo. Omudipai okwa li a tumwa divadiva a ye kodolongo opo a ka longe oshilonga shaye osho shinyanyalifi, nokwa li a aluka diva e kwete omutwe waJohannes moshiyasha nokwa li e shi yandja kuSalome. Salome okwa li a twala omutwe oo kuina. Eshi ovahongwa vaJohannes va li va uda kutya Johannes okwa dipawa, ova li va ya va ka tale ko oshimhu shaye kodolongo, nokwa li ve shi paka, ndele tava ka lombwela Jesus onghundana oyo.

Lwanima, eshi Herodes a li a uda kutya Jesus ota velula ovanhu nota temo eendemoni movanhu, okwa li a tila neenghono. Herodes okwa li a tila molwaashi okwa li e shii pamwe Jesus oye Johannes a nyumuka koufi. Onghee hano, Herodes okwa li a halelela neenghono okumona Jesus opo a tale ngeenge oye tuu shili Johannes ile hasho, ndele hamolwaashi a li a hala okuuda eudifo laJesus. Mateus 10:1-5; 11:1; 14:1-12; Markus 6:14-29; Lukas 9:7-9.

▪ Omolwashike Johannes a li a tulwa modolongo, nomolwashike Herodes a li ina hala oku mu dipaifa?

▪ Lwanima Herodias okwa li a pondola ngahelipi okudipaifa Johannes?

▪ Omolwashike Herodes a li a hala okumona Jesus konima eshi Johannes a fya?