Etukulwa 52

Jesus ta palula ovanhu omayovi pashikumwifilonga

OVAYAPOSTOLI 12 ova li va hafele oshikonga shokuudifa muGalilea ashishe, osho sha li shididilikwedi. Diva konima eshi Johannes a dipawa, ovayapostoli ovo ova li va alukila kuJesus nova li ve mu hepaululila oimoniwa yavo itunhula. Eshi Jesus a li a mona kutya ovayapostoli vaye ova loloka, novanhu vahapu ova li ve uya kuvo nokava li va li va mona efimbo lokulya, okwa li e va lombwela a ti: “Ileni tu ke likaleleni koima kwe likalela, nye mu tulumukwe po kanini.”

Ova li va londa mowato, tashi dulika va londela popepi naKapernaum, nova li va shinga va yuka konhele imwe ye likalela, oyo tashi dulika i li koushilo waJordan, kombinga ikwao yaBetsaida. Ovanhu vahapu ova li ve va mona eshi tava i navamwe ova li va uda kuvakwao shi na sha naasho. Onghee hano, ovanhu va tya ngaho ova li va kunghula nomunghulofuta tava tondoka, naashi owato ya li ya fika komutunda, Jesus novahongwa vaye ova hanga nale ovanhu ve va teelela oko.

Eshi Jesus a dja mo mowato nokwa mona eemhunga dovanhu, okwa li e va uditile onghenda molwaashi ova li va fa eedi dihe na omufita. Onghee hano, okwa li a velula aveshe ovo va li tava vele mokati kavo nokwa li e va honga oinima ihapu.

Efimbo ola li tali endelele neenghono, novahongwa vaJesus ova li ve uya kuye ndele tava ti: “Poima apa opwongaho, ndee paife etango la toka. Va lekela va ye komaumbo nokomikunda, ve ke lilandele oikulya.”

Jesus okwa li e va nyamukula a ti: “Va peni oikulya.” Molwaashi Jesus okwa li e shii nale kutya oshike ta ka ninga po, okwa li a yeleka Filippus e mu pula a ti: “Ohatu ka landa peni omingome okuliwa kuava?”

Filippus okwa li e wete itashi shiiva okulandela ovanhu ve fike opo oikulya, molwaashi opa li ovalumenhu 5 000 lwaapo, notashi dulika pa li pe na ovanhu ve dulife po 10 000 ngeenge omwa kwatelwa ovakainhu nounona. Filippus okwa li a nyamukula a ti: “Omingome deendenari domafele avali [ondenari imwe pefimbo opo oya li ondjabi yomunailonga yefiku] itadi va wanene, ovo aveshe va pewe nande okapambu kanini.”

Andreas otashi dulika a li a hala okuulika kutya itashi shiiva okukutifa ovanhu ve fike opo, eshi a ti: “Ope nokamati ke nomingome nhano doilya neeshi mbali,” nokwa li a weda ko a ti: “Ndelenee edi tadi kwafa shike kuava ve fike apa.”

Molwaashi osha li efimbo opo onghalo yomhepo ya li tai hovele okupupyala, pefimbo opo Opaasa yomo 32 ya li i li pokufika, omwiidi muhapu owa li wa twima nawa. Onghee hano, Jesus okwa li a lombwela ovahongwa vaye va lombwele ovanhu va kale omutumba komwiidi meengudu dovanhu 50 ile 100. Jesus okwa li a kufa omingome nhano neeshi mbali, nokwa li a tala keulu ndele ta ilikana. Opo nee okwa li a pambula omingome nokwa li yo a tukula eeshi moipambu. Oipambu oyo okwa li e i pa ovahongwa vaye opo ve i tukulile ovanhu. Shikumwifa, ovanhu aveshe ova li va lya fiyo va kuta.

Konima eshi ovanhu va mana okulya, Jesus okwa li a lombwela ovahongwa vaye a ti: “Tooleni oundjaumukile va xupa po, pa ha hepe sha.” Ovahongwa ova li va yadeka oimbale 12 noundjaumukile ovo va li va xupa po. Mateus 14:13-21; Markus 6:30-44; Lukas 9:10-17; Johannes 6:1-13.

▪ Omolwashike Jesus a li a hala ve ke likalele novayapostoli vaye?

▪ Jesus okwa li va ya peni novahongwa vaye, nomolwashike va li inava mona efimbo lokufuda po ngaashi va li va hala?

▪ Eshi kwa li kwa toka, ovahongwa vaJesus ova li va lombwela Jesus a ninge shike, ndele ongahelipi Jesus a li a fila oshisho ovanhu ovo?