Etukulwa 57

Jesus ta kenukile ovanhu ovo va mona oixuna

KONIMA eshi Jesus a li a tokola Ovafarisai omolweenghulunghedi davo dokulihola mwene, okwa li a ya pamwe novahongwa vaye. Otashi dulika to dimbuluka kutya konima yokafimbo kaxupi, Jesus novahongwa vaye ova li va piyaanekwa keemhunga dovanhu odo da li de uya kuvo eshi va li tava kendabala oku ka fuda po kanini. Jesus novahongwa vaye ova li va ya koitukulwa yaTirus naSidon, oyo ya li kokule eekilometa dihapu kolundume. Oshikando osho otashi dulika osho ashike Jesus a li a ya pamwe novahongwa vaye kondje yaIsrael.

Eshi Jesus novahongwa vaye va li va mona onhele yokukala, okwa li a popya kutya ina hala ovanhu va shiive kutya oku li peni. Ndele nande ongaho, ovanhu ova li va shiiva kutya oku li peni, nokuli nomoshitukulwa osho sha li shihe fi shOvaisrael. Omukainhu umwe Omugreka oo a li a dalelwa muFoinikia shaSiria, okwa li e uya kuJesus ndele te mu indile ta ti: “Omwene, omona waDavid, file nge onghenda! Omumwange okakadona [ota] hepekwa nai kondemoni.” Ashike Jesus ka li e mu nyamukula sha.

Konima yefimbo, ovahongwa vaye ova li ve mu lombwela va ti: “Mu tokolela, ote tu weelele monima yetu.” Jesus okwa li e va yelifila kutya omolwashike a li ina nyamukula omukainhu oo a ti: “Ame inandi tuminwa [kovanhu] vamwe, okeedi odo da kana domeumbo laIsrael odo adike.”

Omukainhu oo ka li a sholola, ndele okwa li a ya puJesus ndele ta tu eengolo koshipala shaye, te mu indile ta ti: “Omwene, kwafe nge!”

Omutima waJesus kawa li tuu we linyengifwa eshi omukainhu oo a li te mu indile a mana mo! Ashike nande ongaho, Jesus okwa li a popya kombinga yaasho a li a endela unene, okuudifila oshiwana shaKalunga shaIsrael. Ndele pefimbo opo tuu opo, Jesus okwa li a popya shi na sha nanghee Ovajuda hava ungaunga novanhu voiwana imwe nonhondo, tashi dulika opo a yeleke eitavelo lomukainhu oo, a ti: “Inashi wapala okukufa omungome wounona noku u ekela oumbwena.”

Jesus okwa li a ulika kutya oku hole ovanhu ovo vehe fi Ovajuda momutono wondaka yaye nosho yo omalinyengo aye okoshipala. Okwa li nokuli a pupika efaafanifo olo ovanhu ovo vehe fi Ovajuda hava ulwa kutya ove li eembwa moku va ula ‘oumbwena.’ Ponhele yokukwata onghone, omukainhu oo okwa li e lihonga meendjovo odo Jesus a li a popya shi na sha nonhondo yOvajuda ndele ta ti: “Omwene, noumbwena ohava li oundjaumukile ava hava u koshililo shoovene vavo.”

Jesus okwa li a nyamukula omukainhu oo a ti: “Omukainhu [ove], eitavelo loye olinene, u ningilwe ngaashi wa hala.” Osho osha li sha ningwa shili, molwaashi eshi omukainhu oo a li a shuna keumbo okwa li a hanga okamonakadona kaye ka veluka filufilu.

Eshi Jesus novahongwa vaye va li va dja koshitukulwa shokomunghulofuta shaSidon, okwa li va ya komulonga waJordan. Osha yela kutya ova li va tauluka omulonga waJordan kolundume lefuta laGalilea ndele tava i moshitukulwa shaDekapolis koushilo wefuta. Eshi va fika oko, ova li va londa komhunda, ndele eemhunga dovanhu oda li de va mona ndele tadi etele Jesus oingudu, ovapofi, ovafitandaka, nosho yo ovanaudu vamwe vahapu. Ovanhu ova li ve va eta peemhadi daJesus ndele te va velula. Ovanhu ova li va kumwa eshi va li ve wete ovafitandaka tava popi, oingudu tai ende, ovapofi ve wete ko, notava tange Kalunga kaIsrael.

Jesus okwa li a yandja elitulemo le likalekelwa komulumenhu umwe oo a li ombolo noka li ha dulu okupopya nawa. Luhapu eembolo ohadi fi ohoni noupu, unene tuu ngeenge di li mokati kovanhu vahapu. Otashi dulika Jesus a li a didilika kutya omulumenhu oo okwa tila. Onghee hano, Jesus okwa li a kufa mo omulumenhu oo meemhunga dovanhu ve ke likalele. Eshi Jesus a li oye aeke nomulumenhu oo, okwa li a ulika kutya oshike te ke mu ningila. Jesus okwa li a tula ominwe daye momatwi omulumenhu oo, ndele ta fiya omate nokukuma elaka laye. Opo nee Jesus okwa li a tala keulu nokufuda mokule ndele ta ti: “Fituluka!” Omatwi omulumenhu oo okwa li a fituluka nokwa li ta dulu okupopya nawanawa.

Eshi Jesus a li a longa oikumwifilonga ihapu oyo yokuvelula ovanhu, eemhunga dovanhu oda li da pandula. Oda li da tya: “Aishe okwe i ninga nawa, ovafitamatwi ohe va udifa ko novafindaka ohe va ningi va popye.” Mateus 15:21-31; Markus 7:24-37.

▪ Omolwashike Jesus a li ina velula meendelelo omona womukainhu Omugreka?

▪ Konima yaasho, Jesus okwa li a twala ovahongwa vaye peni?

▪ Jesus okwa li a ungaunga ngahelipi nolukeno nomulumenhu oo a li ombolo noka li ha dulu okupopya nawa?