Etukulwa 61

Jesus ta velula omumati e na ondemoni

FIMBO Jesus, Petrus, Jakob naJohannes va li ve li komhunda yaHermon, tashi dulika va li ve li koxulo yayo, ovahongwa vakwao ova li ve li moupyakadi. Fimbo va li tava di komhunda, Jesus okwa li a didilika diva kutya ope na sha sha puka, molwaashi ovahongwa vaye ova li va dingililwa keemhunga dovanhu nova li tava tu eemhata novanongo vomishangwa. Eshi ovanhu ovo va li va mona Jesus, ova li va kumwa neenghono nova li va ya ve ke mu kunde. Jesus okwa li e va pula a ti: “Eemhata tamu tu navo, odashike?”

Omulumenhu umwe okwa li e uya komesho yeemhunga dovanhu nokwa li a twa eengolo puJesus ndele ta ti: “Omuhongi, onda eta kuove omumwange omumati e nomhepo ye mu fitika ondaka. Nakeshe opo tai mu kwatele, otai mu nate po, ndele ta tutumike onhutu mokanya ndele te likeshe, ndee ta lenduka. [Hano] onda lombwela ovalongwa voye ve i te mo, ndele ova nyengwa.”

Ovanongo vomishangwa otashi dulika ovo unene va li tava kembaula shi na sha naashi ovahongwa va li inava dula okuvelula omumati. Fimbo ovahongwa va li ve li moupyakadi oo, Jesus okwa li e uya puvo. Jesus okwa ti: “Woo, oove epupi li he na eitavelo, fiyo onaini ndi nokukala punye? Fiyo onaini ndi noku mu lididimikila?”

Otashi monika sha fa Jesus a li ta ula ovanhu aveshe ovo va li opo, ndele osha yela kutya Jesus okwa li ta ula lelalela ovanongo vomishangwa ovo va li tava piyaaneke ovahongwa vaye. Opo nee, Jesus okwa li a popya shi na sha nomumati oo a li ta vele a ti: “Mu eteni kuame.” Eshi omumati oo a li te uya kuJesus, ondemoni oyo ya li muye oya li ye mu nata pedu ndele tai mu kame. Omumati oo okwa li a alangata pedu nokwa li a tutumika onhutu mokanya.

Jesus okwa li a pula a ti: “Okwa ninga omafiku e fike peni, eshi eshi she mu hanga tete?”

Xe okwa li a nyamukula a ti: “Okounona waye. Luhapu [ondemoni oye] mu undulila momundilo nomomeva, i mu nyone po.” Opo nee xe yomumati oo okwa li a indila a ti: “Ove, ngenge to dulu sha, tu fila onghenda, Ove u tu kwafe.”

Otashi dulika xe yomumati oo a kala ta kongo ekwafo oule womido. Pomhito oyo, xe yomumati oo okwa li a polimana molwaashi ovahongwa vaJesus ova li va nyengwa. Eshi Jesus a li a mona kutya omushamane oo okwa polimana, okwa li e mu ladipika a ti: “ ‘Ngenge to dulu,’ wa ti. Ou ta itavele, iha nyengwa kusha.”

Omushamane oo okwa li a ingida diva a ti: “Onda itavela. Kwafa okuhaitavela kwange.”

Eshi Jesus a li a mona kutya eemhunga dovanhu otadi tondoka da yuka kuvo, okwa li a hanyena ondemoni a ti: “Omhepo ove iho popi naave iho udu, ohandi ku lombwele: Dja mo muye, ove ino uya vali muye.” Eshi ondemoni oyo ya li tai di mo momumati oo, oya li ye mu ningifa a ingide noya li ye mu kama neenghono. Omumati oo okwa li a nangala pedu a ngabuka, novanhu vahapu ova li tava ti: “Okwa fya.” Opo nee, Jesus okwa li a kwata omumati oo meke ndele te mu pendula po.

Pomhito imwe, eshi Jesus a li a tuma ovahongwa va ye va ka udife, ova li va dula okuta mo eendemoni movanhu. Onghee hano, eshi ovahongwa va ya meumbo ova li va pula Jesus fimbo ve li ovo aveke naye va ti: “Oshike hano fye twa nyengwa oku i ta mo?”

Jesus okwa li a ulika kutya ovahongwa vaye ova li va nyengwa omolwokuheneitavelo kwavo, a ti: “Oludi eli ihali tewa mo koshinima shilili, okeilikano tuu alike.” Osha yela kutya ova li va pumbwa okulilongekida opo va dule okuta mo eendemoni, naunene tuu ondemoni oyo ya li i na eenghono. Ova li va pumbwa okukala ve na eitavelo la kola nokupula Kalunga meilikano e va pe eenghono.

Opo nee Jesus okwa li a weda ko a ti: “Oshili handi mu lombwele, ngeno kwa li mu neitavelo li fike pombuto yoshinapi, ngeno tamu dulu okulombwela omhunda ei: Lilundulula po apa, ove u lundulukile kwinya, ngeno tai lilundulula po, ndele kaku noshinima tashi mu nyenge.” Eitavelo ka li fi tuu oshinima shi na eenghono!

Omandangalati nosho yo omaupyakadi oo haa imbi oilonga yaJehova i xume komesho otashi dulika a kale taa monika a fa mahapu nomanene ngaashi omhunda inene. Ndele nande ongaho, Jesus okwa ulika kutya ngeenge otwa kala tu na eitavelo momitima detu noku li pameka, ohatu ka kala neitavelo la kola notali ke tu kwafela tu tauluke omandangalati nosho yo omaupyakadi oo tashi dulika taa monika a fa eemhunda. Markus 9:14-29; Mateus 17:19, 20; Lukas 9:37-43.

▪ Jesus okwa li a shakeneka onghalo ilipi eshi a dja komhunda yaHermon?

▪ Jesus okwa li a ladipika ngahelipi xe yomumati oo a li e na ondemoni?

▪ Omolwashike ovahongwa va li va nyengwa okuta mo ondemoni oyo ya li momumati?

▪ Jesus okwa ti kutya eitavelo oli na eenghono di fike peni?