Etukulwa 62

Jesus ta hongo ovahongwa vaye oshilihongomwa shi na sha nelininipiko

JESUS okwa li a hala okushuna keumbo kuKapernaum konima eshi a li a velula omumati oo a li e na ondemoni, oo a li ha di koshitukulwa shopopepi naKesarea Filippi. Ndele okwa li a hala okuya pamwe novahongwa vaye ovo aveke opo e va longekide natango shi na sha nefyo laye nosho yo oinakuwanifwa oyo tava ka kala ve na konima yaasho. Okwa li e va yelifila a ti: “Omona wOmunhu ota ka yandjwa momake ovanhu, ndele vo otave mu dipaa, ndele efiku etitatu ota nyumuka.”

Nonande Jesus okwa li a lombwela ovahongwa vaye nale shi na sha naasho, novayapostoli vaye vatatu ova li va mona emoniko omo mwa li mwa kundafanwa “okudja po” kwaye, ovahongwa vaye kava li natango ve udite ko oshinima osho. Nonande kapa li umwe womuvo a li ina itavela kutya Jesus ota ka fya shili, ngaashi Petrus a li e shi ninga pehovelo, ova li va tila oku mu pula vali shi na sha naasho.

Lwanima, ova li va fika muKapernaum omo Jesus a li ha kala unene pefimbo loukalele waye. MuKapernaum omo mwa dile Petrus nosho yo ovayapostoli vahapu vaJesus. Fimbo Jesus a li muKapernaum, ovalumenhu ovo hava futifa oifendela yotembeli ova li ve uya kuPetrus. Molwaashi otashi dulika va li va hala okuningifa Jesus a nyone monghedi yonhumba, ova li va pula Petrus va ti: “Omuhongi weni iha futu oimaliwa yotembeli?”

Petrus okwa li a nyamukula a ti: “Oha futu.”

Jesus oo tashi dulika opo a li a fiki meumbo, okwa li e shii kutya oshike sha ningwa po. Onghee hano, fimbo Petrus ina popya shi na sha naasho, Jesus okwa li e mu pula a ti: “Oto ti ngahelipi, Simon? Eehamba dokombada yedu otadi pula kulyelye ofuto yokeengaba noifuta? Okovana ile kovanailongo?”

Petrus okwe mu nyamukula a ti: “Okovanailongo.”

Jesus okwa ti: “Hano ovana ihava futu sha.” Molwaashi Xe yaJesus oye Ohamba yeshito alishe, oo ha longelwa kotembeli, kasha li oshiteelelwa shopaveta kOmona waKalunga okufuta oifendela yotembeli. Jesus okwa ti: “Ndelenee opo tu he va handukife, inda hano komunghulo wefuta ove u ekele mo ondjolo. Kufa oshi ei to i yulu tete, ndele ngenge wa makula okanya kayo, oto mono mo oshimaliwa oshisilveri [eedrakma nhee]. Shi kufa mo u shi va pe omolwetu naave.”

Eshi ovahongwa va aluka kuKapernaum, tashi dulika keumbo laPetrus, ova li va pula va ti: “Olyelye hano omunene e dule vakwao mouhamba wokeulu?” Jesus okwa li e shii kutya oshike sha li she va ningifa va pule epulo olo, molwaashi okwa li e shii kutya oshike va li tava kundafana mondjila eshi va li tava di kuKesarea Filippi. Onghee hano, okwa li e va pula a ti: “Omwa li tamu kundafana shike mondjila?” Ovahongwa kava li ve mu nyamukula molwaashi ova li va fya ohoni eshi va li tava tu eemhata shi na sha naau munene mokati kavo.

Konima yomido hanga nhatu odo Jesus a kala ta hongo, otashi monika sha fa itashi shiiva kovahongwa va twe eemhata da tya ngaho. Osho otashi ulike kutya kava li va wanenena nova li va nwefwa mo neenghono komahongo omalongelokalunga omo va dja. Ovanhu vomelongelokalunga lOshijuda omo ovahongwa va kulila ova li va lenga eendodo moinima aishe. Shimwe vali, otashi dulika Petrus a li e wete a fimana e dule ovahongwa vakwao molwaashi Jesus okwa li e mu udanekela kutya ote ke mu pa “eeshapi” dOuhamba. Jakob naJohannes navo otashi dulika va li ve wete va fimana ve dule vakwao molwaashi ova li ve na oufembanghenda wokumona Jesus eshi a li a shituluka.

Kashi na neembudi kutya oshike sha li she ve linyengifa va pule epulo olo, Jesus okwa li e va ulikila euliko lonhumba opo e va kwafele va lundulule oikala yavo. Okwa li a ifana okaana nokwe ka kaleka ofika mokati kavo, e ka kwete komapepe, ndele ta ti: “Ngenge itamu lidilulula ndee tamu ningi ngaashi ounona, mu he na apa tamu ka ya mouhamba wokeulu. Onghee hano, ou te lininipike ngaashi okaana aka, oye omunene e dule vakwao mouhamba wokeulu. Naau ta tambula okaana ka tya ngaha medina lange, [Aame ta] tambula.”

Jesus ka li tuu a pukulula ovahongwa vaye monghedi ikumwifi! Jesus ka li a handukila ovahongwa vaye noku va ula ovalinenepeki, ovanalwisho ile ovalitumbaleki. Ndele ponhele yaasho, okwa li e va pukulula a longifa oshihopaenenwa shounona vanini ovo ve li ovalininipiki nokave hole okulitumbaleka nosho yo eendodo. Onghee hano, Jesus okwa li a ulika kutya ovahongwa vaye ova li va pumbwa okukulika omaukwatya oo a fa ounona ovalininipiki. Xuuninwa, Jesus okwa ti: “Ou omunini womunye amushe, oye omunene.” Mateus 17:22-27; 18:1-5; Markus 9:30-37; Lukas 9:43-48.

▪ Eshi Jesus novahongwa vaye va li tava di kuKapernaum, Jesus okwa li a endulula oshilihongomwa shilipi, novahongwa ova li ve shi uda ko ngahelipi?

▪ Omolwashike Jesus kwa li ehe na oshinakuwanifwa shokufuta oifendela yotembeli, ndele omolwashike a li e i futa?

▪ Oshike tashi dulika sha li sha ningifa ovahongwa va twe eemhata, nongahelipi Jesus a li e va pukulula?