Etukulwa 63

Jesus ta pukulula vali ovahongwa vaye

FIMBO Jesus novayapostoli vaye va li ve li natango meumbo muKapernaum, ova li va kundafana vali oshinima shimwe shihe fi ashike okutwa eemhata kwovayapostoli kombinga yaao munene mokati kavo. Oshiningwanima osho osha li yo sha ningwa eshi va li tava shuna kuKapernaum, eshi Jesus aha li pamwe navo. Omuyapostoli Johannes okwa ti: “Otwa hanga ko umwe ou, ihe tu shikula, a ta mo eendemoni medina loye, ndele fye otwe mu kelela, shaashi ihe tu shikula.”

Osha yela kutya Johannes okwa li e wete kutya ovayapostoli ovo aveke va wana okukala hava velula. Onghee hano, okwa li e udite kutya omulumenhu oo ina wana okulonga oikumwifilonga molwaashi ka li womongudu yavo.

Jesus okwa li a pukulula ovayapostoli vaye a ti: “Inamu mu kelela, osheshi kaku na ou ta longo oshilonganghono medina lange, ndee ta popile nge molwii diva. Osheshi ou e he na ondubo nafye, ye okwa ama kufye. Osheshi ou te mu nwefa omeva eholo limwe [molwaashi] nye vaKristus, oshili handi mu lombwele: oye ita kala ina pewa ondjabi yaye.”

Omulumenhu oo ka li e na okukala ta ende pamwe naJesus opo a kale omushikuli waye. Eongalo lopaKriste kala li la totwa po pefimbo opo, onghee hano, eshi omulumenhu oo a li iha ende pamwe naJesus novayapostoli kasha li sha hala okutya okwa tongoka ko keongalo. Omulumenhu oo osha yela kutya okwa li a itavela Jesus nomolwaasho a li a pondola okuta mo eendemoni. Omulumenhu oo okwa li ta longo oshilonga osho tashi ningifa omunhu a kale a wana okupewa ondjabi, ngaashi Jesus e shi popya. Jesus okwa popya kutya omulumenhu oo ota ka pewa ondjabi yaye eshi ta longo oilonga ya tya ngaho.

Ndele mbela ngeno oshike sha ningwa po ngeno omulumenhu oo okwa li a pundukifwa keendjovo nokeenghatu dovayapostoli? Osho ngeno osha kala oshinima sha kwata moiti. Jesus okwa ti: “[Ou] ta hongaula [“pundukifa,” NW] umwe waava vanini va itavela nge, oshiwa kuye, a mangelwe emanya loshini mofingo yaye, ye a ekelwe mefuta.”

Jesus okwa ti kutya ovashikuli vaye ove na okweefa po oinima oyo ve hole monghalamwenyo yavo, oyo tai dulu oku va pundukifa, ngaashi ngeno, omake, eemhadi ile eisho. Oshixwepo komunhu okukala ehe na oinima oyo e hole ya tya ngaho nokuya mOuhamba waKalunga shi dule okukala a kanyatela koinima oyo ndele ta ekelwa muGehenna (onhele ya li popepi naJerusalem omo mwa li hamu xwikilwa oimbodi), oyo tai faneke ehanauno laalushe.

Jesus okwa li yo a londwela a ti: “Litaleni, mu ha dine nande okamwe komuava vanini; osheshi Ame ohandi mu lombwele, ovaengeli vavo vomeulu ohava tale alushe oshipala shaTate meulu.” Opo nee okwa li a yelifa kutya ovo “vanini” ove na ongushu eshi a li a hokolola kombinga yomulumenhu oo a li e na eedi efele ndele ta kanifa po imwe. Jesus okwa ti kutya omulumenhu oo okwa li a fiya po eedi daye 99 opo a ka konge oyo ya kana, naashi e i mona okwa li e i hafela shi dulife dikwao 99. Opo nee Jesus okwa li a xulifa a ti: “Osho tuu kashi fi ehalo laXo yeni meulu, pa kane nande okamwe komuava vanini.”

Molwaashi Jesus okwa li ta dimbuluka kombinga yaashi ovayapostoli vaye va li tava tu eemhata, okwa li e va ladipika a ti: “Kaleni mu nomongwa munye vene, nye mu kale mu nombili mokati keni.” Oikulya ihe na omulyo ohai fingalekwa komongwa. Onghee hano, omongwa wopafaneko otau dulu okuningifa eendjovo domunhu di tambulwe ko noupu. Okukala nomongwa wa tya ngaho otaku kwafele ovanhu va kale ve na ombili.

Ndele molwaashi ovanhu inava wanenena, omafimbo amwe ohapa holoka eenhamanana da kwata moiti. Jesus okwa li yo a yandja omayele kutya ovanhu ove na okuungaunga ngahelipi nado. Okwa ti: “Omumwanyoko ngenge ta nyono kuove, inda u ke mu pukulule mu li po amuke vavali; ndele ngenge te ku udu, opo nee ove wa likola omumwanyoko.” Jesus okwa ti yo kutya ngeenge ita pwilikine, “ka ifane ko umwe ile vavali, eendjovo adishe opo di tokolwe komakanya eendombwedi mbali ile nhatu.”

Jesus okwa ti kutya onghatu yaxuuninwa oyo omunhu e na okukatuka oyo okutwala oshinima ‘keongalo,’ sha hala okutya, oku shi lombwela ovapashukili veongalo ovo tava dulu okuninga omatokolo opamhangu. Jesus okwa ti kutya ngeenge omunyoni ita dulika ketokolo leongalo, ‘na talwe ngaashi omupaani nongaashi omufutifi.’

Ngeenge ovapashukili tava ningi etokolo la tya ngaho, ova pumbwa okulandula filufilu omayele oo e li mEendjovo daJehova. Kungaho, ngeenge ova mono kutya omunhu oku na ondjo nokwa wana okuhandukilwa, etokolo ola ningwa nale ‘meulu.’ Ngeenge ova ‘mangulula omunhu kombada yedu,’ sha hala okutya, va mona kutya omunhu ke na ondjo, ota ka kala a “mangululwa nomeulu.” Jesus okwa popya shi na sha neemhangu dokumangulula da tya ngaho a ti: “Oku ku na vavali ile vatatu va ongala medina lange, Ame ondi li mokati kavo.” Mateus 18:6-20; Markus 9:38-50; Lukas 9:49, 50.

▪ Omolwashike sha li inashi pumbiwa pefimbo laJesus okweenda pamwe naye?

▪ Okupundukifa ovo vanini okwa kwata moiti shi fike peni, na Jesus okwa yelifa ngahelipi efimano laavo vanini?

▪ Oshike tashi dulika sha li she linyengifa Jesus a twe omukumo ovayapostoli va kale ve na omongwa mokati kavo?

▪ ‘Okumanga’ ‘nokumangulula’ osha hala okutya shike?