Etukulwa 66

Jesus kOshivilo shOmatwali

JESUS okwa li a shiivika nawa pefimbo lomido nhatu lwaapo okudja pefimbo leninginifo laye. Ovanhu omayovi ova li va mona oikumwifilonga oyo a li a longa, nomahokololo e na sha noilonga yaye okwa li a tandavela moshilongo ashishe. Eshi ovanhu va li va ongala pOshivilo shOmatwali muJerusalem, ova li tava kongo Jesus. Ova li va pula va ti: “Ye oku li peni?”

Ovanhu ova li tava tu eemhata kombinga yaJesus keshe pamwe. Vamwe ova li tava ti: “Ye omuwa; vamwe va tya: Ahowe, Ye ota pukifa ovanhu.” Ovanhu ova li tava popi omahokololo mahapu a yukila oko pehovelo loshivilo. Ashike kapa li omunhu e na ouladi okupopila Jesus moipafi, molwaashi ova li va tila okukatukilwa onghatu kovawiliki Ovajuda.

Jesus okwa li a fika poshivilo fimbo sha li mokati. Opo nee, Jesus okwa li a ya kotembeli, oko ovanhu va li va kumwifwa kounghulungu waye wokuhonga. Molwaashi Jesus ka li a fikola keefikola doshirabi, Ovajuda ova li tave lipula tava ti: “Ou, omishangwa oku di shii ngahelipi, nande ina longwa?”

Jesus okwa li a yelifa a ti: “Elongo lange kali fi lange, ndele laau a tuma nge. Ngenge pe na ou a hala okulonga ehalo laye, ota ka shiiva elongo, ngenge ola dja muKalunga, ile handi popi muame mwene.” Ehongo laJesus ola li le likolelela filufilu komhango yaKalunga. Jesus okwa li a pula a ti: “Moses haye e mu pa omhango hamba?” Opo nee okwa li e va hanyena a ti: ‘Ndele nande umwe mokati keni he i wanifa.’

Jesus okwa li vali e va pula a ti: “Oshike mwa hala okudipaa nge?”

Ovanhu vamwe ovo va li meemhunga dovanhu, tashi dulika ovo va li tava talele po poshivilo, kava li ve shii osho sha li tashi ningwa po. Ova li tava diladila kutya kape na oo ta ka kendabala okudipaa omuhongi mukumwifi a tya ngaho. Onghee hano, ova li va itavela kutya ope na sha sha puka naJesus eshi a li ta diladila ngaho, va ti: “Ove u nondemoni, olyelye a hala oku ku dipaa?”

Ovawiliki vOvajuda ova li va hala okudipaa Jesus, nonande eemhunga dovanhu kada li di shi wete. Eshi Jesus a li a velula omulumenhu mEshabata konima yomudo netata, ovawiliki ovo ova li va kendabala oku mu dipaa. Onghee hano, Jesus okwa li ta ulike kutya ovawiliki ovo kave na eendunge, eshi a li a pula a ti: ‘Hano omunhu ngenge ta pitifwa etanda meshabata, opo omhango yaMoses i ha lundululwe, nye otamu handukilile nge shike, eshi nda velula omunhu meshabata? Inamu tokola pashipala, tokoleni etokolo la yuka.’

Ovakalimo vomuJerusalem ovo va li ve wete osho tashi ningwa po ova li va popya va ti: “Ou haye ve mu konga ve mu dipae? Ndele tala, nhumbi ta tongo moipafi yavo, ndele vo itava ti sha kuye. Mbela ovakulunhu ve shi koneka shili kutya, Oye Kristus?” Ovakalimo vomuJerusalem ovo ova li va popya kutya omolwashike inava itavela kutya Jesus oye Kristus va ti: “Ou otu mu shii apa a dja, ndelenee Kristus ngenge te uya, kape na ou e shii apa a dja.”

Jesus okwa li e va nyamukula a ti: “Nye omu shii nge, ndele mu shi shii apa nda dja. Inandi dja muame mwene, ndele ou a tuma nge, Oye omunashili, ndele nye kamu mu shii. Ndelenee Ame ondi mu shii, osheshi onda dja kuye, ndele Ye okwa tuma nge.” Opo nee, ova li va kendabala oku mu kwata opo ve ke mu tule modolongo ile ve mu dipae. Ashike kava li va pondola molwaashi efimbo lokufya laJesus kala li la fika.

Ndele nande ongaho, ovanhu vahapu ova li va itavela Jesus, ngaashi naanaa ve na oku shi ninga. Jesus okwa li a enda kombada yomeva, a loteka omhepo, a loteka oshikungulu mefuta, a palula ovanhu omayovi pashikumwifilonga nomingome neeshi dinini, a velula ovanaudu, a velula oilema, a twikulula ovapofi, a velula ovanashilundu nokwa li nokuli a nyumuna oonakufya. Onghee ovanhu ova li va pula va ti: “Kristus ngenge te uya ota ka longa oikumifilonga ihapu e dule ou?”

Eshi Ovafarisai va li va uda eemhunga dovanhu tadi ngongota kombinga yoinima oyo, vo novapristeri ovakulunhu ova li va tuma ovatumwa va ka kwate Jesus. Johannes 7:11-32.

▪ Jesus okwa li a fika poshivilo pefimbo lilipi, novanhu ova li tava ti shike kombinga yaye?

▪ Omolwashike ovanhu vamwe va li tava ti kutya Jesus oku na ondemoni?

▪ Ovanhu vomuJerusalem ova li ve na etaleko lilipi?

▪ Omolwashike ovanhu vahapu va li va itavela Jesus?