Etukulwa 74

Jesus ta pukulula Marta, nokuhonga ovahongwa vaye okwiilikana

PEFIMBO loukalele waJesus muJudea, Jesus okwa li a ya momukunda waBetania, omo mwa li hamu kala Marta, Maria nosho oyo omumwaina Lasarus. Otashi dulika Jesus a li a shakeneka Marta, Maria naLasarus nale moukalele waye, onghee hano, ova li nale ookaume kaye kopofingo. Jesus okwa li a ya keumbo looMarta nokwa li ve mu tambula ko.

Marta okwa li a halelela okuyakula Jesus ngaashi ta dulu. Oshi li oufembanghenda munene shili okutalelwa po kuMessias omuudanekwa. Onghee hano, Marta okwa li e lipyakidila neenghono okuteleka eendja dihapu nokulongekida oinima ihapu oyo ya li ya nuninwa okuningifa okukala po kwaJesus ku kale kuhafifa.

Mepingafano naasho, Maria, omumwaina waMarta okwa li e li omutumba peemhadi daJesus ta pwilikine kuye. Konima yokafimbo, Marta okwa li e uya puvo ndele ta lombwele Jesus a ti: “Omwene, ku na ko na sha mboli, omumwameme eshi ta viyaukifa nge ame andike, mu lombwela a kwafe nge.”

Ashike Jesus ka li a lombwela sha Maria. Ponhele yaasho, okwa li a pukulula Marta omolwokukala te lipula unene noinima yopambelela. Jesus okwa li e mu hanyena nombili a ti: “Marta, Marta, ove to lipe oshisho noupyakadi moinima ihapu. Ndelenee shimwe ashike sha pumbiwa.” Jesus okwa li a hala okutya inashi pumbiwa okulongifa efimbo lihapu mokulongekida oikulya ihapu. Oikulya inini oya wana.

Marta ka li e na elalakano lii, okwa li ashike a hala okuyakula omweenda. Ndele molwaashi okwa li te lipula unene nomafiloshisho opalutu, okwa li ta xutwifa omhito yokuhongwa pauhandimwe kOmona waKalunga. Onghee hano, Jesus okwa li a xulifa a ti: “Maria okwe lihoololela ombinga iwa itai mu kufwa.”

Konima yefimbo pomhito imwe vali, omuhongwa waJesus umwe okwa li e mu pula a ti: “Omwene, tu longa okwiilikana ngaashi Johannes a longa ovalongwa vaye.” Otashi dulika omuhongwa oo ka li po konima yomudo umwe netata eshi Jesus a li a yandja oshihopaenenwa sheilikano mEudifo laye lokomhunda. Onghee hano, Jesus okwa li a endulula osho a li a honga nale, opo nee okwa li a hokolola efaneko opo a divilike kutya osha pumbiwa okudiinina okwiilikana.

Jesus okwa li a hovela efaneko laye a ti: “Olyelye womunye e na kaume kaye te uya kuye mokati koufiku ndele ta ti: Kaume kange, pe nge omingome nhatu, osheshi kaume kange a dja kondjila e uya kuame nondi he na eshi handi mu pakele po; ndele winya womeumbo te mu nyamukula ndee ta ti: Ino ningila nge oupyakadi, omuvelo owa patwa, nounona vange va nangala puame momutala, itandi dulu okupenduka ndi di ku pe. Ohandi mu lombwele, ngenge ita penduka e mu pe omolwoukaume, ota penduka [omolwoudiinini waye, OB-1986], ndele ote mu pe shi fike peemhumbwe daye.”

Eshi Jesus a li ta ningi efaafanifo olo, ka li a hala okutya Jehova Kalunga i na hala okunyamukula omailikano, ngaashi omunhu womefaneko olo. Ndele okwa li ta yelifa kutya ngeenge kaume oo ehe na ehalo okwa kwafela mukwao omolwoudiinini waye, Tate yetu womeulu omunahole ita ka ninga tuu shihapu shi dulife opo! Jesus okwa li a twikila ko a ti: “Ndelenee handi mu lombwele: indileni, ndee tamu pewa, kongeni, ndee tamu mono, kongholeni, ndee tamu yeululwa. Osheshi keshe tuu ou ta indile, ota pewa, nakeshe tuu ou ta kongo, ota mono, naau ta konghola, ota yeululwa.”

Opo nee Jesus okwa li a popya kombinga yooxe vopanhu inava wanenena, a ti: “Olyelye womunye xe ou, omona waye ngenge te mu indile oshi, te mu pe eyoka ponhele yoshi, ile [te] mu indile ei, te mu pe ngeno ondye? Hano nye [ovai], ngenge omu shii okupa ovana veni oipewa iwa, unene Xo yeni yomeulu ta yandje Omhepo Iyapuki kuava tave mu indile.” Jesus ka li tuu a yandja etwomukumo li na sha nokudiinina okwiilikana! Lukas 10:38–11:13.

▪ Omolwashike Marta a li e lipyakidila unene nokulongekidila Jesus oikulya?

▪ Maria okwa li a ninga shike, nomolwashike Jesus a li e mu pandula ponhele yokupandula Marta?

▪ Oshike sha li she linyengifa Jesus a endulule ehongo laye li na sha nokwiilikana?

▪ Jesus okwa li a divilika ngahelipi omhumbwe yokudiinina okwiilikana?