Etukulwa 77
Jesus ta pulwa shi na sha nokufyuulula
OVANHU ova li ve shii kutya Jesus okwa li ta li ouvalelo meumbo lOmufarisai umwe. Onghee hano, ovanhu omayovi ova li va ongala kondje yeumbo olo va teelela Jesus a dje mo. Mepingafano nOvafarisai ovo va li tava pataneke Jesus nokukendabala oku mu ningifa a popye sha sha puka opo ve mu kwate po, ovanhu ovo ova li va halelela okupwilikina kuJesus.
Jesus tete okwa li a lombwela ovahongwa vaye a ti: “Lungameni onhafi yovafarisai, nokutya, oihelele yavo.” Eenghedi adishe delongelokalunga lOvafarisai oda li da kwatela mo oihelele, ngaashi va li ve shi ulika eshi va li tava li naJesus. Ndele nonande Ovafarisai ova li tave limonikifa va fa ovatilikalunga, oukolokoshi wavo owa li tau ka nyanekwa pomutenya. Jesus okwa ti: “Kape na osho sha tuvikwa itashi ka [tuulwa], ndele kape na osho sha holekwa itashi ka hololwa.”
Jesus okwa li vali a endulula etwomukumo olo a li a pa ovayapostoli vaye 12 eshi a li e va tuma va ka udife muGalilea. Okwa ti: “Inamu tila ava hava dipaa olutu [nove] he na vali eshi tava dulu okuninga.” Jesus okwa li a shilipaleka ovashikuli vaye kutya Kalunga ite ke va dimbwa, molwaashi iha dimbwa nokuli noshiyandja shimwe. Okwa ti: “Ngenge tave mu twala keeshinagoga nokoshipala shovapangeli noshovakulunhu, . . . Omhepo Iyapuki otai mu longo pefimbo olo eshi mu na oku shi popya.”
Omulumenhu umwe oo a li mokati keemhunga dovanhu okwa li a indila Jesus a ti: “Omuhongi, lombwela omumwameme tu tukule efyuululo.” Omhango yaMoses oya ufa kutya omonamati woshiveli oku na okupewa oitukulwa ivali yefyuululo, onghee hano, kapa li etomheno lokutwa eemhata. Ndele otashi dulika omulumenhu oo a li a hala okufyuulula shihapu shi dulife pwaasho a ufilwa paveta.
Jesus ka li a hala okukwatelwa mo moinima yavo, onghee okwa li e mu pula a ti: “Menhu oove, olyelye a tula nge ndi ninge omutokoli nomutukuli woinima yeni?” Opo nee okwa li a pa eemhunga dovanhu odo elondwelo la fimanenena a ti: “Pashukeni onye mu lungame keshe tuu olwisho, osheshi omwenyo womunhu ihau xupifwa kouhapu weliko laye.” Kashi na nee mbudi kutya omunhu oku na oiniwe i fike peni, ota dulu ashike okufya ndele ta fiye po oiniwe yaye aishe. Jesus okwa li a longifa efaneko opo a divilike oushili oo nokuulike nghee sha nyika oulai okuheliningila edina liwa naKalunga.
Okwa li a hokolola a ti: “Epya loshipuna shonhumba ola dala nawa. Ndele ye okwa diladila meni laye: ohandi ningi ngahelipi, osheshi ndi he na apa handi tuvikile oilya yange? Ndele okwa tya: Ohandi ningi ngaha, ohandi hanauna po omaanda ange, ndele ohandi tungu po manene, nohandi tuvikile mo oilya yange nemona lange, ndele handi lombwele omwenyo wange: Omwenyo, owa tuvikililwa oipalwifa ihapu yomido dihapu, tulumukwa nee, lya, nwa, ove u nyakukwe. Ndelenee Kalunga okwe mu lombwela: Elai ove, oufiku tuu ou wonena omwenyo woye oto u kufwa, hano aishe ei we i likola otai ningi yalyelye?”
Pexulilo Jesus okwa ti: “Hano osho ou te lilikolele emona, ye ke na oupuna puKalunga, ta ningwa.” Nonande ovahongwa otashi dulika kava li va kwatwa komwiyo wokuhola omaliko, otashi dulika okufila oshisho eemhumbwe donghalamwenyo dakeshe efiku ku va imbe okukufa ombinga moilonga yaJehova nomutima aushe. Onghee hano, pomhito oyo Jesus okwa li a endulula omayele mawa oo a li e va pa mEudifo lokOmhunda omudo umwe netata lwaapo wa tetekela.
Okwa li a lombwela ovahongwa vaye a ti: ‘Onghee handi mu lombwele: inamu fila eemwenyo deni oshisho, mu lye shike, nomalutu eni, mu djale shike. Taleni omakola, oo ihaa kunu ndele ihaa teya, ngaashi e he nelimba lokutuvikila oinima, ile okaanda, ndele Kalunga te a palula. Taleni nokudidilika eenhemo domado nhumbi hadi kulu, ndele itadi hodila ndele itadi tungu oshiyata. Ndele ohandi mu lombwele: NaSalomo moshinge shaye ashishe ina djala a wapala ngaashi imwe yomudo.’
Jesus okwa twikila ko ta ti: “Osho nanye yo inamu lipula naashi tamu li ile naashi tamu nu, nye inamu lalakanena ei ileile. Osheshi aishe ei ohai kongwa koiwana [yomounyuni], ndele Xo yeni oku shi shii nokutya omwe i pumbwa. Ndelenee kongeni ouhamba waKalunga naai aishe otamu i wedelwa ko.”
Otwa pumbwa okuyandja elitulemo keendjovo daJesus odo, unene tuu ngeenge eenghalo dopamaxupilo da ninga didjuu. Omunhu oo te lipula unene noinima yopamaliko ndele ta hovele okweefa po okulalakanena omalalakano e na sha noinima yopamhepo ota ulike kutya ina itavela kutya Kalunga ota dulu okufila oshisho ovapiya vaYe. Lukas 12:1-31; Deuteronomion 21:17.
▪ Omolwashike tashi dulika omulumenhu oo a li a pula shi na sha nefyuululo, na Jesus okwa li a kumaida ngahelipi ovapwilikini vaye?
▪ Jesus okwa li a longifa efaneko lilipi, nokwa li ta yelifa oshitwa shilipi?
▪ Jesus okwa li a endulula omayele elipi, nomolwashike sha li sha wapala?