Etukulwa 78

Kaleni mwe lilongekida!

KONIMA eshi Jesus a li a londwela eemhunga dovanhu shi na sha nolwisho nokulombwela ovahongwa vaye va kale va lungama opo vaha pwile moinima yopamaliko, okwa li e va twa omukumo a ti: “Ino tila, okangudu ove, osheshi Xo a hala oku mu pa ouhamba.” Kungaho, Jesus okwa li a ulika kutya omuvalu wokondadalunde wovanhu vanini (oo lwanima wa ka hololwa kutya ou fike 144 000) tau i mOuhamba womeulu. Ovanhu vahapu ovo tava ka mona omwenyo waalushe otava ka kala kombada yedu ve li ovapangelwa vOuhamba.

“Ouhamba” oo kau fi tuu oshali ikumwifi! Jesus okwa li a popya shi na sha nonghedi ya yuka omo ovahongwa ovo va li ve na okulinyenga ngeenge ova pewa ouhamba oo, e va kumaida a ti: “Landifeni po eliko leni, nye mu yandje oikwafa yeehepele.” Ovahongwa ovo ova li ve na okulongifa omamona avo opo vamwe va mone ouwa pamhepo, nokungaho, ova li tave liongelele “emona meulu ihali xulu po.”

Opo nee Jesus okwa li a kumaida ovahongwa vaye va kale ve lilongekidila ealuko laye. Okwa ti: “Oiya yeni nai kale ya mangwa neelamba deni da tema, nye mu fe ovanhu va teelela Omwene wavo, ta di koshivilo shehombolo, opo ve mu [yeulule] diva nge te uya ndee ta konghola. Ovanelao ovapiya ava Omwene wavo te va hange ve li oupafi nge te uya, oshili handi mu lombwele, Ye ote lidjaleke ndee te va lombwele va kale omutumba note va yakula.”

Mefaneko olo, ovapiya okwa li tava ka ulika kutya ove lilongekidila ealuko lomwene wavo mokutonya oikutu yavo ile noku i homeka momakwamo avo nokutwikila okuwanifa po oinakuwanifwa yavo fiyo oufiku mouyelele weelamba di yadi omahooli. Jesus okwa li a yelifa a ti: “Ndele nande [omwene] ne uye menangelo etivali loufiku [okudja lwopomuwoi wokonguloshi fiyo omokati koufiku] ile etitatu [okudja mokati koufiku fiyo olwoponhatu yokeengula], ndee te va hange ngaha, ovapiya ovo ovanelao.”

Omwene oo okwa li ta ka pa ovapiya vaye ondjabi monghedi inai monika nale. Okwa li te ke va lombwela va kale omutumba poshitaafula ndele te va yakula. Okwa li ta ka ungaunga navo ngaashi ookaume kaye ovadiinini, ndele hangaashi ovapiya. Inava pewa tuu ondjabi iwa molwaashi va kala tava longele omwene wavo fiyo oufiku fimbo va teelela a aluke! Jesus okwa li a xulifa a ti: ‘Nanye yo osho mu kale mwe lilongekida, osheshi Omona wOmunhu ote uya motundi ei inamu i teelela.’

Petrus okwa li a pula Jesus a ti: “Omwene, efaneko eli ofye we li lombwela, ile aveshe?”

Ponhele yokunyamukula Petrus sha yukilila, Jesus okwa li a yandja vali efaneko limwe. Okwa li a pula a ti: “Olyelye hano omukeleli weumbo omudiinini . . . Omwene waye e mu pa epangelo lovapiya vaye, e va pe eendya pefimbo lado? Omupiya omunelao ou Omwene waye nge te uya ndee te mu hange ta longo ngaha. Oshili handi mu lombwele: Ye ote mu pe epangelo loinima yaye aishe.”

Osha yela kutya “Omwene” oo oJesus Kristus. “Omupiya” oo nosho yo ‘ovapiya’ otava faneke “okangudu” kovahongwa aveshe kumwe ve li 144 000, ovo tava ka pewa Ouhamba womeulu, ndele omautumbulilo oo otaa divilike oilonga yavo pauhandimwe. ‘Oinima’ oyo omupiya omudiinini a nangekwa po a file oshisho oyo oinima youhamba yomwene waye yokombada yedu, oyo ya kwatela mo ovapangelwa vOuhamba vokombada yedu.

Jesus okwa li a twikila nefaneko laye ta yelifa kutya havanhu aveshe ovo ve li oilyo yongudu yomupiya oo tava ka kala ovadiinini, a ti: “Ndelenee omupiya ou ngenge te lipopile momwenyo waye: Omwene wange ite uya diva, ndele ta hovele okudenga ovamati noukadona, nokulya nokunwa nokukolwa, Omwene womupiya ou te uya efiku eli ine mu teelela . . . ndee te mu shashaula.”

Jesus okwa li a popya kutya eshi e uya kombada yedu osha li efimbo lidjuu kOvajuda, molwaashi vamwe ova li va tambula ko omahongo aye ofimbo vamwe kava li ve a tambula ko. Pefimbo opo Jesus okwa li a hangwa a ninginifwa momeva eedula nhatu lwaapo da pita, nopomhito oyo eninginifo laye mefyo ola li la ehena popepi neenghono nokwa li a popya a ti: “Onda fininikwa ngahelipi fiyo la wanifwa.”

Konima eshi a li a lombwela ovahongwa vaye eendjovo odo, Jesus okwa li vali a popya neemhunga dovanhu. Okwa li e va handukila eshi va li inava hala okudimina oumbangi wa yela u na sha naye nosho yo eityo lao. Okwa ti: “Ngenge tamu mono omwaamba wa kambakana koutokelo otamu ti: odula tai uya, nosho tai uya. Nomhepo yokosuide ngenge tai pepe, otamu ti: otaku di oluteni, ndele osho tali ningi yo. Ovanaihelele nye, mu shii okukoneka oshipala shedu nosheulu, ndele ongahelipi mu he shii okukoneka efimbo eli?” Lukas 12:32-59.

▪ “Okangudu” oka fikama po movanhu vangapi, notava ka pewa shike?

▪ Ongahelipi Jesus a li a divilika kutya ovahongwa vaye ova pumbwa okukala ve lilongekida?

▪ “Omwene,” “omupiya,” ‘ovapiya’ nosho yo ‘oinima’ oyo ya tumbulwa mefaneko laJesus otai faneke shike?