Etukulwa 82

Jesus ta i natango kuJerusalem

DIVA Jesus okwa li mondjila natango, ta hongo ovanhu moilando nomomikunda. Otashi dulika a li moshitukulwa shaPerea, kombinga ikwao yomulonga waJordan, okudja muJudea, ashike okwa li ta i kuJerusalem.

Ehongo lOvajuda olo kutya omuvalu ashike wovanhu wa ngabekwa va wana okuxupifwa, otashi dulika olo la li le linyengifa omulumenhu umwe a pule Jesus a ti: “Omwene, ava tava xupifwa ovanini hamba?” Jesus okwa li a nyamukula monghedi oyo tai ningifa ovanhu va diladile kutya ova pumbwa okuninga shike opo va ka xupifwe, a ti: “Kondjeni [sha hala okutya, kendabaleni noudiinini] mu ye mo moshivelo sha finana.”

Okukondja noudiinini okwa fimanenena “osheshi” Jesus okwa ti kutya ‘vahapu otava kendabala okuya mo, ndele tava ka nyengwa.’ Omolwashike tava ka nyengwa? Jesus okwa yelifa a ti: “Omwene weumbo ngenge a fikama ndee ta pate po omuvelo, nye otamu hovele okukala ofika pondje nokukonghola pomuvelo nokwiifana: Omwene, tu yeulula.” Omwene weumbo ote ke va nyamukula ta ti: “Ame nghi mu shii apa mwa dja, djeni po puame, nye amushe ovalongi vowii.”

Ovanhu ovo va li va patelwa pondje osha yela kutya ova li ve uya pefimbo olo va li ve wete le va wapalela. Ndele omuvelo owa li wa patwa. Ova li ve na okuuya kuyele opo va ye meni, nonande kasha li shipu kuvo pefimbo opo. Ovo itava pitifa komesho okulongela Jehova monghalamwenyo yavo otava ka mona oilanduliko inyikifa oluhodi.

Ovajuda ovo Jesus a li e uya unene okuyakula, kava li va longifa omhito iwa yokutambula ko efiloshisho laKalunga li na sha nexupifo. Onghee hano, Jesus okwa li e va lombwela kutya otava ka lila nokulikwesha komayoo ngeenge va ekelwa pondje. Mepingafano naasho, ovanhu ‘vokoushilo nokoutokelo nokonoorde nokosuide,’ sha hala okutya, va dja moiwana aishe, ‘otave uya ndele tava kala omutumba poshililo mouhamba waKalunga.’

Jesus okwa li a twikila ko a ti: “Oku na ovaxuuninwa [ovanhu vehe fi Ovajuda ovo va li va dinika nosho yo Ovajuda ovo va li va lyatelwa pedu] tava ningi votete, ndele ku na votete [Ovajuda ovo va li oipuna nova tumbalekwa melongelokalunga lavo] tava ningi ovaxuuninwa.” Okukala kwavo vaxuuninwa osha hala okutya ovanhu ovo ovakwandede novehe na olupandu itava ka ya mo mOuhamba waKalunga.

Ovafarisai ova li ve uya kuJesus ndele tava ti: “Fikama Ove u dje po apa, osheshi Herodes [Antipas] a hala oku ku dipaa.” Otashi dulika Herodes oye a li a hovela epopyo olo opo a ningife Jesus a dje mo moshitukulwa shavo. Herodes otashi dulika a li a tila okukwatelwa mo mefyo lomuprofeti waKalunga umwe vali ngaashi a li a kwatelwa mokudipawa kwaJohannes Omuninginifi. Ashike Jesus okwa li a lombwela Ovafarisai a ti: “Indeni mu ka lombwele okavandje oko, mu tye: Tala, onena nomongula handi te mo eendemoni nohandi velula, ndele efiku etitatu ohandi ka hanga efikilo.”

Konima eshi Jesus a mana oilonga yaye, okwa li a twikila olweendo laye a finda kuJerusalem molwaashi ngaashi a yelifa, “itashi ningwa omuprofeti a file pamwe pelili, muJerusalem omo tuu.” Omolwashike Jesus e na oku ka dipaelwa kuJerusalem? Omolwaashi Jerusalem osho oshilandopangelo, oko kwa li oilyo 71 yomhangu yopombada yOvajuda noko yo kwa li haku yambelwa omayambo oinamwenyo. Onghee hano, inashi yeleka “Odjona yaKalunga” i dipaelwe pamwe pe lili shihe fi muJerusalem.

Jesus okwa li a popya a nyika oluhodi, a ti: “Jerusalem, Jerusalem, ove ou ho dipaa ovaprofeti noho dipaa nomamanya ovo we va tuminwa, lungapi nda li nda hala okwoongela ovamwoye, ngaashi [oxuxwa] hai ongele ouxuxwena momavava ayo, ndele nye inamu hala. Tala, ongulu yeni otai kala ongaho.” Oshiwana osho osha li sha tokolwa molwaashi osha ekelashi Omona waKalunga.

Fimbo Jesus a li a yuka kuJerusalem, okwa li a shivwa keumbo lomupangeli umwe Omufarisai. Osha li efiku lEshabata, novanhu ova li tave mu konenene, molwaashi opa li omulumenhu umwe a li ta mono oixuna koitumbuka, oyo tashi dulika ya li komaoko nokomaulu. Jesus okwa li a pula Ovafarisai nosho yo ovashiivimhango ovo va li po, a ti: “Osha yuka tuu okuvelula omunhu meshabata ile ahowe?”

Kape na umwe womuvo a li e mu nyamukula, onghee hano, Jesus okwa li a velula omulumenhu oo ndele te mu lekele aye. Opo nee, Jesus okwa li e va pula a ti: “Olyelye hano womunye e nondongi ile ongobe tai wile momufima, ndele ite i shili mo ngeno divadiva nande oku na eshabata?” Natango, kapa li oo a li e mu nyamukula. Lukas 13:22–14:6; Johannes 1:29.

▪ Jesus okwa li a ulika kutya ovanhu ova pumbwa okuninga shike opo va xupifwe, nomolwashike ovanhu vahapu va li va patelwa pondje?

▪ Oolyelye ‘vaxuuninwa’ ovo va li va ninga votete, noolyelye “votete” va li va ninga vaxuuninwa?

▪ Omolwashike tashi dulika kwa li taku tiwa kutya Herodes okwa li a hala okudipaa Jesus?

▪ Omolwashike inashi wapala komuprofeti a file kondje yaJerusalem?