Etukulwa 91
Osho sha li sha ningwa po konima eshi Lasarus a nyumunwa
JESUS nosho yo ovanhu ovo va li pamwe naye ova li va fika pombila yaLasarus. Ombila oyo oya li ekololo, noposhivelo shalo opa li pa idilwa nemanya. Jesus okwa li e va lombwela a ti: “Kufeni ko emanya.”
Molwaashi Marta natango ka li e udite ko kutya Jesus okwa hala okuninga po shike, okwa li a tya kutya emanya inali kufwa ko. Okwa ti: “Omwene, ye okwa nyika nale, osheshi nena okwa ninga omafiku ane.”
Jesus okwa li e mu pula a ti: “Inandi ku lombwela, ngenge to itavele, oto mono efimano laKalunga?”
Opo nee, emanya ola li la kufwa ko kombila. Jesus okwa li a tala pombada ndele ta ilikana ta ti: “Tate, ohandi ku pandula, shaashi wa uda nge. Ndele ondi shi shii, Ove ho udu nge alushe. Ndelenee molwovanhu ava va dingilila nge, ohandi popi ngaha, vo va itavele nokutya, Ove wa tuma nge.” Jesus okwa li a ilikana moipafi opo ovanhu va shiive kutya osho a li e li poku ka ninga okwa li te ke shi ninga okupitila meenghono odo a pewa kuKalunga. Jesus okwa li a ifana mokule a ti: “Lasarus, dja mo!”
Pefimbo opo tuu opo, Lasarus okwa li a dja mo mombila. Olutu laye alishe ola li la dingilwa momalapi. Opo nee, Jesus okwa ti: “Mu mangululeni, nye mu mu efe a ye.”
Eshi Ovajuda vahapu ovo va li ve uya okuhekeleka Maria naMarta va mona Jesus a longa oshikumwifilonga osho, ova li va itavela Jesus. Ndele ovanhu vamwe ova li va ya kOvafarisai ve ke va lombwele osho sha ningwa po. Ovafarisai ovo nosho yo ovapristeri ovakulunhu eshi ve shi uda ova li va ongala diva mOmhangu yoPombada yOvajuda.
MOmhangu yoPombada yOvajuda omo omwa li mwa ongala oo a li omupristeri omukulunhu pefimbo opo, Kajafas, Ovafarisai, Ovasadukai, ovapristeri ovakulunhu nosho yo ovo va li ovapristeri ovakulunhu nale. Ova li va kema va ti: “Ohatu ningi ngahelipi, osheshi omulumenhu ou ota ningi oikumifilonga ihapu? Ngenge hatu mu efa ngaha, aveshe otave mu itavele, nOvaroma otave uya ndee tave tu kufa oshilongo novanhu yo.”
Nonande ovawiliki vomalongelokalunga ova li va dimina kutya Jesus “ota ningi oikumifilonga ihapu,” kava li ve na ko nasha, ndele ponhele yaasho, ova li ashike tave lipula shi na sha neendodo nosho yo eenghonopangelo davo. Enyumuko laLasarus ola li la halukifa neenghono Ovasadukai molwaashi kava li va itavela menyumuko.
Kajafas, oo tashi dulika a li Omusadukai, okwa li a popya a ti: “Eendunge deni odongaho, ndele nye inamu diladila, okufya kwomunhu umwe molwovanhu kwe mu wapalela, ku dule okunyonauka po kwoshiwana ashishe.”
Kalunga oye a li a nwefa mo Kajafas a popye ngaho molwaashi omuyapostoli Johannes lwanima okwa ka shanga a ti: “Ndele eshi [Kajafas] ine shi tonga muye mwene.” Kajafas okwa li ta ti lelalela kutya Jesus okwa li e na okudipawa opo ehe va imbe vali eendodo davo dokupangela nosho yo okunwefa mo ovanhu. Kakele kaasho, Johannes okwa li a popya kutya ‘Kajafas okwa li a xunganeka kutya Jesus oku nokufila oshiwana, ndele hamolwoshiwana eshi ashike, ndele opo a kongolole yo ovana vaKalunga, ava ve li po ve lihana, va ninge vamwe aveke.’ Osha li elalakano laKalunga Omona waye a fye opo a kulile ovanhu aveshe.
Kajafas okwa li a pondola okunwefa mo ovo va li va ongala mOmhangu yoPombada yOvajuda va ninge eemhangela dokudipaa Jesus. Ndele Jesus okwa li a dja po ponhele oyo, tashi dulika a li a londwelwa shi na sha neemhangela odo va li va pangela kuNikodemus, oo a li yo oshilyo shOmhangu yoPombada nokwa li kaume kaye. Johannes 11:38-54.
▪ Omolwashike Jesus a li a ilikana moipafi yovanhu fimbo ina nyumuna Lasarus?
▪ Ovanhu ovo va li po eshi Jesus ta nyumuna Lasarus ova li ve linyenga ngahelipi?
▪ Oshike tashi ulike kutya oilyo yOmhangu yoPombada yOvajuda oya li ikolokoshi?
▪ Kajafas okwa li a lalakanena shike, ndele Kalunga okwa li e mu nwefa mo a xunganeke shike?