Etukulwa 93

Eshi Omona wOmunhu ta ka holoka

FIMBO Jesus a li natango koshitukulwa shokolundume, (tashi dulika muSamaria ile muGalilea), Ovafarisai ova li ve mu pula shi na sha nokuuya kwOuhamba. Ova li va itavela kutya otau uya u wetike kovanhu, ndele Jesus okwa ti: “Ouhamba waKalunga itau uya u wetike, ndele itaku tiwa: tala, opo po, ile opa penya, osheshi tala, ouhamba waKalunga ou li [mokati keni, NW].”

Eendjovo daJesus odo kutya “ou li mokati keni” peemhito dimwe oda tolokwa “ou li meni munye.” Onghee hano, ovanhu vamwe ohava diladila kutya Jesus okwa ti kutya Ouhamba waKalunga otau pangele momitima dovapiya vaKalunga. Ashike osha yela kutya Ouhamba waKalunga kawa li momitima dOvafarisai ovo vehe na eitavelo ovo Jesus a li ta popi navo. Ndele owa li mokati kavo, molwaashi Ohamba yOuhamba waKalunga ya nangekwa po, Jesus Kristus, oya li pamwe navo.

Konima eshi Ovafarisai ovo va ya, otashi dulika Jesus a li a twikila okulombwela ovahongwa vaye kombinga yokuuya kwOuhamba. Jesus okwa li unene ta popi shi na sha nokukala po kwaye meenghono dOuhamba eshi a li a londwela a ti: “Ndele tamu lombwelwa: Tala, oku li penya, ile: tala, opapa, inamu ya ko [kuMessias oo ehe fi washili]. Osheshi ongaashi oluvadi mokushela kwalo tali minikile kominghulo deulu fiyo okominghulo dikwao, osho ngaha Omona wOmunhu ta kala mefiku laye.” Onghee hano, Jesus okwa li ta ulike kutya ngaashi ashike oluvadi hali monika moshitukulwa ashishe, oumbangi u na sha nokukala po kwaye meenghono dOuhamba otau ke li monikila kwaaveshe ovo va hala oku u mona.

Opo nee Jesus okwa li a popya oiningwanima yonhumba oyo ya li ya ningwa mefimbo lonale opo a yelife kutya ovanhu otava ka kala ve na oikala ya tya ngahelipi pefimbo lokukala po kwaye kwomonakwiiwa. Okwa ti: “Ndele ngaashi pa ningilwe pomafiku aNoa, osho tapa ka ningwa pomafiku Omona wOmunhu. . . . Ndele ngaashi pa ningilwe pomafiku aLot, va kala hava li ndee hava nu, va landa novo va landifa, va twika nova tunga, ndelenee efiku olo Lot a dja mo muSodom, opa loka omundilo wosulfuri wa dja meulu, ndele owe va nyona po aveshe, osho ngaha taku ka ningwa efiku olo Omona wOmunhu ta holoka.”

Jesus ka li ta ti kutya ovanhu vopefimbo laNoa nolaLot ova li va hanaunwa po ashike molwaashi va li tava lalakanene oinima ya kwalukeshe, ngaashi okulya, okunwa, okulanda, okulandifa, okutwika nosho yo okutunga. Noa naLot nosho yo oilyo yomaukwaneumbo avo navo ova li hava ningi oinima oyo. Ndele ovanhu vamwe ova li va pwila moinima oyo nopehe na okuyandja elitulemo kokulonga ehalo laKalunga, nomolwaasho va li va hanaunwa po. Sha faafana, ovanhu ovo va pwila moinima oyo navo otave uya okuhanaunwa po eshi Kristus te ke uya pefimbo loudjuu munene oo tau ka hanga onghalelo ei yoinima.

Jesus okwa li a divilika kutya osha fimana okukatuka eenghatu meendelelo eshi tu wete oumbangi u na sha nokukala po kwaye meenghono dOuhamba, eshi a ti: “Efiku olo ou ta hangika kombada yongulu e na oinima yaye meumbo, a ha londoloke e ke i tale ko, nosho tuu ou ta hangika mepya ina aluka mo. Dimbulukweni omukainhu waLot.”

Ngeenge okukala po kwaKristus okwa kala ku liwetikile, ovanhu kave na okweefa ohole yokuhola oinima yopamaliko i va imbe okukatuka eenghatu meendelelo. Eshi omukulukadi waLot va li tava di muSodom okwa li a tala konima, tashi dulika a li a hala oinima oyo va fiya po, nokwa li a shituka oshivanda shomongwa.

Jesus okwa li a twikila okuhokolola shi na sha nanghee onghalo tai ka kala pefimbo lokukala po kwaye, a li a lombwela ovahongwa vaye a ti: “Oufiku winya ovalumenhu vavali tava kala momutala umwe, umwe ta tambulwa namukwao ta fiwa po. Ovakainhu vavali tava hangwa poshini tava shimbaana, umwe ta tambulwa namukwao ta fiwa po.”

Okutambulwa otaku tu kumwe nokuya kwaNoa nosho yo oukwaneumbo waye mongulu yomomeva nosho yo okupitifwa mo kwaLot noukwaneumbo waye muSodom kovaengeli. Onghee hano, otashi ti exupifo. Mepingafano naasho, okufiwa po otashi ti okuhanaunwa po.

Ovahongwa ova li va pula shi na sha naasho tava ti: “Omwene, openi?”

Jesus okwa li e va nyamukula a ti: “Oko ku na oshimhu, oko taku ongala eenhwa.” Ovo va “tambulwa” va xupifwe ova fa eenhwa odo hadi mono kokule odo da ongala opo pe na “oshimhu.” Oshimhu otashi faneke Kristus washili pefimbo lokukala po kwaye kuhewetike meenghono dOuhamba nosho yo koshivilo shopamhepo osho Jehova a longekida. Lukas 17:20-37; Genesis 19:26.

▪ Ouhamba owa li ngahelipi mokati kOvafarisai?

▪ Omonghedi ilipi okukala po kwaKristus kwa fa oluvadi?

▪ Omolwashike ovanhu tava ka hanaunwa po omolweenghatu odo tava katuka pefimbo lokukala po kwaKristus?

▪ Okutambulwa ko nosho yo okufiwa po otashi ti shike?