Etukulwa 100

Efaneko li na sha neeponda

JESUS otashi dulika a li natango meumbo laSakeus, omo a li a ya eshi a li e li molweendo lokuya kuJerusalem. Ovahongwa vaye ova li va itavela kutya ngeenge okwa i kuJerusalem ota ka shiivifa kutya oye Messias nota ka dika po Ouhamba waye. Jesus okwa li e va hokololela efaneko opo e va pukulule shi na sha naasho noku va ulikile kutya Ouhamba owa li u li kokule nokuuya.

Okwa li a hokolola a ti: “Okwa li ku na omunhu a daleka a ya koshilongo shokokule a [ka ninge ohamba, OB-1986], ye a aluke ko.” Jesus oye a li “omunhu a daleka,” neulu olo ‘oshilongo shokokule.’ Eshi Jesus a li ta ka ya meulu, Xe okwa li te ke mu ninga Ohamba.

Ndele fimbo omulumenhu oo a daleka ina ya, okwa li a ifana ovapiya vaye omulongo nokwa li a pa keshe umwe oponda yoshisilveri, ndele ta ti: “Ke di landifeni fiyo handi aluka.” Mewanifo lotete lefaneko olo, ovapiya ovo omulongo ova li tava faneke ovahongwa vaJesus votete. Mewanifo limwe vali, ovapiya ovo omulongo otava faneke ovanhu aveshe ovo tava ka fyuulula pamwe naJesus Ouhamba womeulu.

Eeponda doshisilveri oda li oimaliwa i na ongushu, molwaashi oponda imwe oya li i na ongushu i fike pondjabi yomunamapya yeemwedi nhatu. Mbela eeponda oda li tadi faneke shike? Ovapiya ova li ve na okulandifa ngahelipi eeponda odo?

Eeponda odo oda li tadi faneke oiniwe oyo ovahongwa ovo va vaekwa nomhepo va li tava dulu okulongifa opo va konge ovafyuululi vamwe vOuhamba womeulu fiyo Jesus ote uya e li Ohamba yOuhamba oo wa udanekwa. Konima eshi Jesus a li a nyumunwa nokwa li e lihololela ovahongwa vaye, okwa li e va pa eeponda dopafaneko opo va konge ovahongwa vahapu, nokungaho, ova li tava weda kongudu yaavo va li tava ka kala mOuhamba womeulu.

Jesus okwa li a twikila ko a ti: ‘Ovanhu vomoshilongo ove tonde [omulumenhu a daleka] ndele ove mu shikulifa ovatumwa ve mu lombwele: Ou inatu mu hala e tu pangele.’ Ovanhu vomoshilongo ovo Ovaisrael ile Ovajuda, ashike ovahongwa vaye kava li va kwatelwa mo. Konima eshi Jesus a ya meulu, Ovajuda ova li va ulika kutya inava hala Jesus a ninge ohamba yavo mokuhepeka ovahongwa vaye. Kungaho, ova li va fa ovakwashiwana ovo va li va tuma ovatumwa vavo.

Ovapiya omulongo ova li va longifa ngahelipi eeponda davo? Jesus okwa ti: “Ndele mokwaaluka kwaye, eshi a nangala oshilongo okwa lombwela ovapiya venya e va pa oimaliwa, ve uye kuye opo a shiive nhumbi va longa nayo mokulandakanifa. Ndele wotete okwe uya mo ndee ta ti: Omwene, oshimaliwa shoye osha likolifa oimaliwa omulongo. Ndele ye okwe mu lombwela: Iyaloo, omupiya ove muwa, ove eshi wa diinina ngaha mushinininini, oto pewa epangelo loilando omulongo. Nomutivali okwe uya mo ta ti: Omwene, oshimaliwa shoye oshe likola oimaliwa itano. Naau a lombwelwa kuye: Naave yo pangela oilando itano.”

Omupiya oo a li e na eeponda omulongo ota faneke ongudu yovahongwa okudja pOpentekoste 33 O.P. fiyo okunena mwa kwatelwa yo novayapostoli. Omupiya oo a li e na eeponda nhano naye ota faneke yo ongudu oyo ya kala ko pefimbo la faafana, yaavo va hapupalifa oinima yohamba yavo yokedu she likolelela keemhito odo ve na nosho yo kokudula kwavo. Eengudu adishe odo mbali oda udifa nouladi onghundana iwa, noshidjemo, ovanamitimadiwa vahapu ova ninga Ovakriste. Ovapiya omuwoi ova li va pondola mokulandakanifa nova li va hapupalifa oipewa yavo.

Jesus okwa twikila ko a ti: “Ndele umwe vali e uya po ndee ta ti: Omwene, tala, oshimaliwa shoye osheshi, osheshi onde shi tuvikila moshikaiwa. Osheshi ame onde ku tila, osheshi oove omunhu omudjuu, to kufa osho ino shi tuvikila noho teya osho ino shi kuna. Opo nee ye okwe mu lombwela: Ohandi ku tokolifa okanya koye mwene, omupiya ove mwii. U shii nge ame omunhu omudjuu, handi kufa eshi inandi shi tuvikila, ndele handi teya osho inandi shi kuna, oshike hano ino yandja oshimaliwa shange kovakumani, ame mokwaaluka kwange ngeno nde shi hanga noishoshela. Ndele okwa lombwela ava va li po ofika: Mu kufeni oshimaliwa shaye, mu shi pe ou e noimaliwa omulongo.”

Eshi omupiya oo mwii a kufwa oponda yaye yopafaneko, osha hala okutya, okwa kanifa omhito yaye yokuya mOuhamba womeulu. Okwa li a kanifa pafaneko oufembanghenda wokupangela oilando omulongo ile itano. Didilika yo kutya omupiya oo ka li a ulwa mwii molwaashi a ninga sha shii, ndelenee omolwaashi a li a dopa okulonga opo a hapupalife emona louhamba womwene waye.

Eshi oponda yomupiya oo mwii ya li ya pewa omupiya oo a li e na eeponda omulongo, vakwao ova ti: “Omwene, ou oku na nale oimaliwa omulongo.” Jesus okwa li a nyamukula a ti: “Keshe tuu ou e na, ota pewa, naau e he na, ota kufwa osho e shi kwete. Ndelenee ovatondi vange ovo inava hala ndi va pangele va [eteni] oku, mu va dipaele apa moipafi yange.” Lukas 19:11-27; Mateus 28:19, 20.

▪ Oshike sha li she linyengifa Jesus a hokolole efaneko li na sha neeponda?

▪ Olyelye a li omulumenhu a daleka, nedu oko a li a ya otali faneke shike?

▪ Ovapiya nosho yo eeponda otava faneke oolyelye?

▪ Ovanhu vomoshilongo ovo oolyelye, nova li va ulika ngahelipi kutya ove tonde omulumenhu oo a daleka?

▪ Omolwashike omupiya umwe kwa li kwa tiwa kutya omwii, naashi a kufwa oponda yaye osha hala okutya shike?