Etukulwa 101

Jesus e li muBetania meumbo laSimon

ESHI Jesus a dja muJeriko, okwa li a ya kuBetania. Olweendo olo ola li hali kwata oule wefiku, molwaashi ovanhu ova li hava ende tava londo eekilometa 19 lwaapo nosha li shidjuu okulonda. Jeriko osha li pedu oule weemeta 250 okuyelekanifa nombada yefuta linene, ofimbo Betania sha li pombada eemeta 760 okuyelekanifa nombada yefuta linene. Otashi dulika to dimbuluka kutya muBetania omo mwa li hamu di Lasarus novamwainakadona. Betania, osho sha li omukunda munini, osha li eekilometa 3 okudja kuJerusalem, sha li shi li koushilo wolufilu lOmhunda yEemono.

Ovanhu vahapu ova li nale va fika muJerusalem ve uya okudana Opaasa. Ovanhu ova li ve uya diva opo ve liyelife ngaashi sha li onghedindjikilile yopalongelokalunga. Otashi dulika va li va kuma oshimhu ile va li va ninga sha osho sha li she va ningifa va kale inava koshoka. Onghee hano, ova li va shikula onghedindjikilile oyo yokuliyelifa opo va dule okudana Opaasa monghedi oyo ya hokiwa. Eshi ovanhu ovo va li va fika diva va li va ongala potembeli, vahapu vomuvo ova li tave lipula shi na sha nongeenge Jesus ote uya ngoo kOpaasa.

MuJerusalem omo mwa li unene hamu tuwa eemhata shi na sha naJesus. Ovanhu ova li ve shii nawa kutya ovawiliki vomalongelokalunga ova li va hala okukwata Jesus opo ve mu dipae. Osha yela kutya ovanhu ova li va lombwelwa kutya oo e shii apa Jesus e li ne va lombwele. Eemwedi opo da di ko, ova li va kendabala lwoikando itatu oku mu dipaa, pefimbo lOshivilo shOmatwali, pefimbo lOshivilo shEyapulo nosho yo konima eshi a li a nyumuna Lasarus. Onghee hano, ovanhu ova li tave lipula kutya, mbela Jesus ote ya ngoo vali moipafi yovanhu? Ova li va pulafana tava ti: “Otamu ti ngahelipi”?

Konima yefimbo, Jesus okwa li a fika muBetania fimbo kwa li ku na omafiku ahamano Opaasa i fike, oyo ya li hai danwa mo 14 aNisan omwedi wOshijuda. Jesus okwa li a fika muBetania mEtitano konguloshi, pehovelo lefiku 8 laNisan. Jesus ka li ta dulu okuya kuBetania mOlomakaya molwaashi okuya molweendo mefiku lEshabata, sha hala okutya, okudja eshi etango tali ningine mEtitano fiyo osheshi etango tali ningine mOlomakaya, osha li sha dilikwa komhango yOvajuda. Jesus otashi dulika a li a ya keumbo looLasarus oko a ile nale, ndele ta kala ko oufiku wEtitano.

Omukalimo umwe womuBetania okwa li a shiva Jesus nosho yo ovo va li pamwe naye vaye va ka lye ouvalelo keumbo laye oufiku wOlomakaya. Omulumenhu oo okwa li Simon, oo a li nale omunashilundu, notashi dulika a li a velulwa kuJesus. Molwaashi Marta okwa li ha longo noudiinini, okwa li ta yakula ovaenda. Ashike Maria alushe okwa li ashike ha yandje elitulemo kuJesus, nopomhito ei osho a li a ninga osha li sha pendula eemhata.

Maria okwa li a patulula okakende omo mwa li mu na omaadi ma nyika nawa etata lokilograma, “onardelela.” Omaadi oo okwa li e na ondilo. Ongushu yao oya li i fike hanga pondjabi yomudo umwe. Eshi Maria a li a tila omaadi oo momutwe waJesus nosho yo keemhadi daye ndele ta pushula eemhadi daye neexwiki daye, edimba liwa ola li le lihanena eumbo alishe.

Osho osha li sha handukifa ovahongwa ndele tava pula tava ti: “Oshike hano [taa] hepifwa ashike?” Opo nee Judas Iskariot okwa li a pula a ti: “Omaadi aa oshike inaa landwa po neendenari omafele atatu, di pewe ngeno eehepele?” Judas ka li lela te lipula shi na sha neehepele, ndele okwa li a popya ngaho molwaashi okwa li ha vake oimaliwa mokakefa oko ka li haka kala novahongwa.

Jesus okwa li a popila Maria, a ti: “Mu efeni, oshike tamu mu nyematifa? Ye okwa longela nge oshilonga shiwa. Osheshi eehepele omu di kwete alushe mokati keni nokeshe efiku mwa hala inamu nyengwa oku di ningila nawa, ndele Ame kamu kwete nge alushe. Ye okwa ninga osho shi fike peenghono daye. Ye okwa tetekela okuvaekela olutu lange epako. Oshili handi mu lombwele: Keshe oko mounyuni aushe evangeli tali ka udifwa, naashi yo ye e shi ninga, otashi ka hepaululwa oku mu dimbulukwa.”

Jesus okwa kala muBetania oule weevili 24, novanhu keshe pamwe ova li va uda kutya omo e li. Onghee hano, ovanhu vahapu ova li ve uya keumbo laSimon va tale Jesus nova li yo va hala okumona Lasarus oo naye a li yo meumbo laSimon. Ovapristeri ovakulunhu kava li ashike va hala okudipaifa Jesus ndele ova li yo va hala okudipaifa Lasarus. Ova li va hala okudipaa Lasarus molwaashi ovanhu vahapu ova li va itavela Jesus eshi ve wete Lasarus oo a li a nyumumwa kuJesus. Ovawiliki ovo vomalongelokalunga kava li tuu ovakolokoshi! Johannes 11:55–12:11; Mateus 26:6-13; Markus 14:3-9; Oilonga 1:12.

▪ Ovanhu potembeli muJerusalem ova li tava popi shi na sha nashike, nomolwashike?

▪ Omolwashike Jesus a li a fika muBetania mEtitano ponhele yokufika mOlomakaya.

▪ Eshi Jesus a li a fika muBetania, otashi dulika a li a ya peni mefiku lEshabata?

▪ Maria okwa li a ninga shike osho sha li sha pendula eemhata, nongahelipi Jesus a li e mu popila?

▪ Oshike tashi ulike kutya ovapristeri ovakulunhu ova li ovakolokoshi neenghono?