Etukulwa 104

Ondaka yaKalunga tai udika oshikando oshititatu

FIMBO Jesus a li motembeli, okwa li a nyika oluhodi omolwefyo olo a li ta ka fya. Okwa li te lipula unene shi na sha nanghee edina laXe tali ka kumwa kwaasho, nomolwaasho okwa li a ilikana a ti: “Tate, fimanekifa edina loye.”

Pefimbo opo, opa li pa udika ondaka inene ya dja meulu tai ti: “Ame onde li fimanekifa nale, ndele ohandi li fimanekifa vali.”

Eemhunga dovanhu odo da li po oda li da kumwa. Ovanhu vamwe ova li tava ti: “Omwengeli okwa tonga naye.” Vamwe ova li tava ti kutya odula ya ngunguma. Ndele paulelalela, Jehova Kalunga oye a li a popya. Ashike osho kashi fi oshikando shotete ondaka yaKalunga tai udika shi na sha naJesus.

Eshi Jesus a ninginifwa omido nhatu netata da pita, Johannes Omuninginifi okwa li a uda ondaka yaKalunga tai popi kombinga yaJesus, ya ti: “Ou Omona wange omuholike, onde mu hokwa.” Opo nee, efimbo lonhumba konima yOpaasa, eshi Jesus a li a shitululwa moipafi yaJakob, Johannes naPetrus, ova li va uda ondaka yaKalunga tai ti: “Ou Omona wange omuholike, onde mu hokwa; mu udeni.” Ashike mo 10 aNisan, osha li oshikando oshititatu ondaka yaKalunga tai udika kovanhu, fimbo Jesus a li e na ko omafiku ane a fye. Ndele pomhito oyo Jehova okwa li a popya opo eemhunga dovanhu di mu ude.

Jesus okwa ti: “Ondaka ei inai uya molwange, ndelenee omolweni tuu.” Osho osha li tashi yandje oumbangi kutya Jesus Omona waKalunga shili, Messias omuudanekwa. Jesus okwa li a twikila ko a ti: “Paife ope netokolo lounyuni ou, paife omupangeli wounyuni ou ota ekelwa pondje.” Onghalamwenyo yaJesus youdiinini otai koleke kutya Satana Ondiaboli, omupangeli wounyuni, okwa wana ‘okweekelwa pondje,’ sha hala okutya, okuhanaunwa po.

Jesus okwa li a popya kombinga yoilanduliko oyo ya li tai ka etifwa kefyo laye, a ti: “Naame ngenge handi yelulwa po pedu, aveshe ohandi va shilile kuame.” Jesus ka li ta fi molwaashi a findika, molwaashi okupitila mefyo laye okwa li ta ka nanena vamwe kuye opo va ka mone omwenyo waalushe.

Eemhunga dovanhu oda li tadi pataneke Jesus tadi ti: “Fye otwe shi uda momhango kutya, Kristus ota ka kala alushe; Ove oto ti ngahelipi hano, omona wOmunhu oku nokuyelulwa? Omona ou wOmunhu olyelye?”

Ovanhu vahapu kava li va itavela kutya Jesus oye Omona womunhu shili, Messias omuudanekwa, nonande opa li pe na oumbangi muhapu, mwa kwatelwa nondaka yaKalunga oyo va li va uda. Ndele ngaashi Jesus a li a ninga eemwedi hamano da tetekela pOshivilo shOmatwali, okwa li a popya natango kutya oye “ouyelele,” nokuladipika ovapwilikini vaye a ti: “Fimbo mu nouyelele, itaveleni ouyelele, opo mu ninge ovana vouyelele.” Konima eshi Jesus a popya oinima oyo, okwa li a ya ndele ta ka hondama molwaashi omwenyo waye owa li moshiponga.

Okuheneitavelo kwOvajuda muJesus okwa li kwa wanifa eendjovo daJesaja odo tadi ti kutya ‘omesho avo okwa twikifwa nomitima davo oda kukutikwa, vaha mone ko nomesho avo, ndele vaha ude ko komutima, vo vehe lidilulule, Ame ndihe va velule.’ Jesaja okwa li a mona olukalwapangelo laJehova lomeulu memoniko, mwa kwatelwa Jesus e li moshinge shaye fimbo a li i ne uya kombada yedu. Ndele molwaashi Ovajuda ova li va kukutika omitwe davo, ova li va wanifilwa eendjovo daJesaja, molwaashi kava li va dimina oumbangi oo tau ulike kutya Jesus oye Omuxupifi wavo oo a udanekwa.

Mepingafano naasho, ovapangeli vahapu (tashi dulika oilyo yOmhangu yoPombada yOvajuda) ova li va itavela Jesus. Nikodemus naJosef Omuarimatia ovo vamwe vomovapangeli ovo. Ndele pefimbo opo kava li va ulika eitavelo lavo moipafi molwaashi ova li va tila okutewa po peendodo davo moshinagoga. Ovanhu ovo kava li tuu va kanifa shihapu!

Jesus okwa li a twikila ko a ti: “Ou ta itavele nge, haame ta itavele, ndelenee ou a tuma nge. Ou a mona nge, oye a mona ou a tuma nge. . . . Nangenge pe na ou ta udu eendjovo dange, ye ite di diinine, haame handi mu tokola; osheshi ame inandi uya okutokola [ounyuni], ndelenee okuxupifa ounyuni. . . . Eendjovo edi nda popya, odo tadi mu tokola efiku laxuuninwa.”

Ohole yaJehova yokuhola ovanhu oyo ye mu linyengifa a tume Jesus opo ovo tave mu itavele va ka xupifwe. Okuxupifwa kwovanhu otaku ke likolelela kokudulika kwavo koinima oyo Kalunga a lombwela Jesus a honge. Etokolo otali ka ningwa ‘mefiku laxuuninwa,’ pefimbo lEpangelo lOmido Eyovi laKristus.

Jesus okwa li a xulifa a ti: “Inandi popya muame mwene, ndele Tate ou a tuma nge, Ye okwa pa nge oshipango eshi ndi noku shi popya naashi ndi noku shi tonga. Ame nondi shi shii, oshipango shaye osho omwenyo waalushe. Onghee eshi handi shi tongo, ohandi shi tongo ngaashi Tate a lombwela nge.” Johannes 12:28-50; 19:38, 39; Mateus 3:17; 17:5; Jesaja 6:1, 8-10.

▪ Ondaka yaKalunga oya li ya udika peemhito dopatatu dilipi?

▪ Omuprofeti Jesaja okwa li a mona ngahelipi oshinge shaJesus?

▪ Ovapangeli velipi va li va itavela Jesus, ndele omolwashike va li inava ulika moipafi kutya ova itavela Jesus?

▪ “Efiku laxuuninwa” oshike, novanhu otava ka tokolwa she likolelela kushike?