Etukulwa 107

Efaneko li na sha noshivilo shehombolo

JESUS okwa li a nyaneka pomutenya Ovafarisai novanongo vomishangwa a longifa omafaneko avali nova li va hala oku mu dipaa. Ndele natango ka li a mana okupopya shi na sha navo. Okwa li va li e va lombwela efaneko limwe.

Okwa ti: “Ouhamba wokeulu u nokufanekwa nohamba ya ningila omona ehombolo. Ndele oya tuma ovamati vayo va ka tale ko ovashivwa ve uye koshivilo, ndele ovo inava hala okuuya.”

Jehova Kalunga oye Ohamba oyo ya li ya longekidila Omona, Jesus Kristus, oshivilohombolo. Omuhombolwa waJesus, ovashikuli vaye ovavaekwa 144 000, otava ka pangela pamwe naye meulu. Ovapangelwa vOhamba ova li oshiwana shaIsrael, ovo eshi va li va etwa mehangano lOmhango mo 1513 K.O.P., va li va mona omhito yokuninga “ouhamba wovapristeri.” Onghee hano, pomhito oyo ova li va shivwa tete koshivilohombolo.

Ovanhu ovo va li va shivwa tete ova li va shivwa mo 29 O.P., eshi Jesus novahongwa vaye (ovapiya vohamba) va li va hovela oilonga yokuudifa Ouhamba. Ndele Ovaisrael vopambelela ovo va li va shivwa tete kovapiya okudja mo 29 O.P. fiyo omo 33 O.P. kava li va tambula ko eshivo olo. Onghee hano, Kalunga okwa li va li a pa oshiwana osho omhito imwe, ngaashi Jesus e shi hokolola.

Jesus okwa ti: “Ndele oya tumununa ko ovamati vamwe, tai ti: lombweleni ovashivwa: Tala, oshivilo shange osha pwa okutelekwa, eehove noimuna ya ondolwa oya tomwa, ashishe sha longekidwa. Ileni kehombolo.” Eshivo olo etivali nolaxuuninwa ola li la ningwa pehovelo lOpentekoste yomo 33 O.P., eshi ovashikuli vaJesus va li va tililwa omhepo iyapuki. Eshivo olo ola li la twikila fiyo omo 36 O.P.

Ndele ovanhu vahapu vomoshiwana shaIsrael natango kava li va tambula ko eshivo olo. Jesus okwa ti: “Ovo va li inave shi yavala, ndele tava i, umwe okwa ya kepya laye, nomukwao [okwa] ka shingifa; navakwao ova kwata ovamati vayo, ove va hepeka nove va dipaa.” Jesus okwa li a twikila ko a ti: “Ndele ohamba oya handuka, ndee tai tumu ko ovakwaita vayo, ndee tava hanaunifa po ovadipai ovo, ndee tava xwikifa po oilando yavo.” Osho osha li sha ningwa mo 70 O.P., eshi Jerusalem sha li sha hanaunwa po filufilu kOvaroma, novadipai ovo ova li va dipawa.

Opo nee Jesus okwa li a hokolola osho sha li sha ka ningwa po lwopokati opo a ti: “[Ohamba] oya tya kovamati: Oshivilo shehombolo osha pwa okulongekidwa, ndele ovashivwa ovo inave shi wapalela. Indeni hano komashakeneno eendjila, aveshe ovo tamu mono, va shivileni kehombolo.” Ovapiya ova li va ninga osho va lombwelwa, ‘nolupale loshivilo shehombolo ola li la yada ovaenda.’

Oilonga yokwoongela ovaenda okudja komashakeneno eendjila odo da li kondje yoshilando omo mwa li ovo va shivwa oya li ya hovela mo 36 O.P. Omukulunhu wetangakwaita lOvaroma wedina Kornelius nosho yo oukwaneumbo waye ovo va li ovanhu votete ovo vehe fi Ovajuda noinava pita etanda va li va shivwa. Okwoongelwa kwovanhu ovo vehe fi Ovajuda, ovanhu aveshe ovo va li va ya peenhele daavo va li va shivwa tete ndele tava anye, okwa twikila fiyo opefimbo letu.

Olupale omo mwa li tamu danenwa oshivilohombolo ola yada pefimbo letu. Jesus okwa li a hokolola osho sha li sha ka ningwa po a ti: “Ohamba eshi ye uya mo okutala ovaenda, oya mona mo omunhu umwe e he na oshikutu shehombolo. Ndele oya tya kuye: Kaume, owe uya mo ngahelipi omu, u he na oshikutu shehombolo? Oye [okwa] mwena. Opo nee ohamba tai ti kovamati vaye: Mu mangeni omaoko nomaulu, nye mu mu ekele momilaulu dopondjelela. Omo hamu kala elilaano nelikweshelo lomayoo.”

Omulumenhu oo ehe na oshikutu shehombolo ota faneke oilyo yOukwakriste oyo hai lifefa Ovakriste. Kalunga ine va tala ko va wana okukala Israel shopamhepo. Kalunga ine va vaeka yo nomhepo iyapuki va ninge ovafyuululi vOuhamba. Onghee hano, otava ka ekelwa momilaulu dopondje omo tava ka hanaunwa po filufilu.

Jesus okwa li a xulifa efaneko laye a ti: “Osheshi vahapu ova ifanwa, ndele vanini ova hoololwa.” Vahapu vomoshiwana shaIsrael ova li va shivwa va ninge oilyo yomuhombolwa waKristus, ndele Ovaisrael vopambelela ovo va li va hoololwa mo ovanini. Ovaenda vahapu vomo 144 000 ovo ve na eteelelo lokuya meulu kave fi Ovaisrael. Mateus 22:1-14; Exodus 19:1-6; Ehololo 14:1-3.

▪ Oolyelye va li va shivwa tete koshivilohombolo, nonaini va li va shivwa?

▪ Ovanhu ovo va li va shivwa tete ova li va shivwa naini, novapiya ovo va li va shiva ovanhu oolyelye?

▪ Onaini ovanhu va li va shivwa oshikando oshitivali, nolwanima oolyelye va li va shivwa?

▪ Omulumenhu oo a li ina djala oshikutu shehombolo ota faneke oolyelye?

▪ Oolyelye va li va shivwa vahapu ndele ovanini ashike va hoololwa mo?