Etukulwa 108
Ovanhu kava li va pondola okukwata po Jesus
MOLWAASHI Jesus okwa kala ta hongo ovanhu motembeli nokwa li a hokololela ovatondi vaye omafaneko oo a li a nyaneka pomutenya oukolokoshi wavo, osho osha li sha handukifa Ovafarisai nova li va pangela omhangela ve mu kengelele a popye oshinima shonhumba opo va dule oku mu kwata po. Ova li va tuma ovahongwa vavo nosho yo ovashikuli vaHerodes ve ke mu kengelele opo ve mu kwate po.
Ova li va lombwela Jesus va ti: “Omuhongi, otu shi shii, Oove omunashili, nondjila yaKalunga oto i longo shili, ndele ku na nande nomunhu, osheshi Ove iho tale olupe lomunhu. Hano tu lombwela: oto ti ngahelipi? Osha wapala tuu okupa omukesari efendelo ile inashi wapala?”
Jesus okwa li e shi wete kutya ovanhu ovo otave mu mbweenga. Jesus okwa li e shii kutya ngeenge okwa ti ‘ahowe, inashi wapala okufuta oifendela,’ okwa li ta ka kala e na etimba kepangelo laRoma. Ndele ngeenge okwa ti ‘heeno omu na okukala hamu futu oifendela,’ Ovajuda ovo va li inava hala okupangelwa kOvaroma otava ka kala ve mu tonde. Onghee hano, okwa li e va nyamukula a ti: “Ovanaihelele nye, oshike tamu shindi nge? Ulikilei nge oshimaliwa shefendelo.”
Eshi va li ve mu etela oshimaliwa shimwe, okwa li e va pula a ti: “Efano eli neshangelo eli olalyelye?”
Ova li va nyamukula tava ti: “Olomukesari.”
Jesus okwa ti: “Hano osho shomukesari, shi peni omukesari, naasho shaKalunga, shi peni Kalunga.” Eshi ovanhu va li va uda Jesus e va nyamukula monghedi ikumwifi, ova li va kumwa, nova li ve mu fiya po ndele tava i.
Eshi Ovasadukai ovo va li va itavela kutya kaku na enyumuko va li va mona kutya Ovafarisai inava pondola okukengelela Jesus, ova li va ya kuye ndele tave mu pula tava ti: “Omuhongi, Moses okwa tile: Ngenge ku na ou ta fi e he na oludalo, omumwaina na hombole haukwe waye, oye na dalele omumwaina oludalo. Pufye apa pwa li ovanhu [ovamwaina] va-7. Omukulunhu okwa hombola omukainhu waye ndee ta fi; naashi kwa li e he na oludalo, okwa fiila omumwaina omukainhu waye. Osho tuu omutivali nomutitatu, nafiyo tuu aveshe va-7. Ndele hauxuuninwa omukainhu okwa fya. Hano menyumuko ota ningi walyelye muava va-7? Osheshi ovo aveshe va li ve mu kwete.”
Jesus okwa li e va nyamukula a ti: “Inamu puka mbela, shaashi mu he shii omishangwa neenghono daKalunga? Osheshi mokunyumuka kwavo koufi ihava hombola ngaashi ihava hombolwa, ohava kala ngaashi ovaengeli meulu. Ndele mokupopya ovafi nenyumuko lavo koufi, inamu lesha hamba momushangwa waMoses, mehepaululo olo tali popi oshixwa sheno, Kalunga nhumbi e mu popifa ta ti: Aame Kalunga kaAbraham naKalunga kaIsak naKalunga kaJakob. Ye ke fi Kalunga kovafi, [ndelenee] okovanamwenyo. Nye omwa puka unene.”
Eemhunga dovanhu natango oda li da kuminwa enyamukulo laJesus. Vamwe vomovanongo vomishangwa navo ova li nokuli va popya va ti: ‘Omuhongi, owa tonga sha wapala.’
Eshi Ovafarisai va mona kutya Jesus okwa mweneka Ovasadukai, ova li ve uya kuye ve li ongudu. Opo ngeno ve mu kengelele vali, umwe womovanongo vomishangwa okwa li e mu pula a ti: “Omuhongi, oshipango shinene shomomhango oshilipi po?”
Jesus okwa li a nyamukula a ti: “Shotete osho eshi: Israel, pwilikina, Omwene Kalunga ketu, Oye aeke Omwene. Ove hola Omwene Kalunga koye nomutima woye aushe nomwenyo woye aushe [neenghono] doye adishe. Oshitivali osheshi: Hola mukweni ngaashi u lihole mwene. Kaku na oshipango shinene shi dule ei.” Jesus okwa li a weda ko a ti: “Moipango ei ivali omhango aishe novaprofeti ova kwatelelwa mo.”
Omunongo womishangwa oo okwa li a dimina a ti: “Heeno, omuhongi, owa popya doshili, nokutya, Oye umwe aeke, nokaku na mukwao, Oye tuu aeke. Noku mu hola komutima aushe nokeendunge adishe nokeenghono adishe, nokuhola mukweni ngaashi u lihole mwene, okwo oku dule oiyandjiwa aishe yexwikilo nomayambo makwao.”
Eshi Jesus a mona kutya omunongo womishangwa oo okwa nyamukula pandunge, okwe mu lombwela a ti: “Ove ku li kokule nouhamba waKalunga.”
Jesus okwa kala ta hongo ovanhu motembeli oule womafiku atatu, Osoondaxa, Omaandaxa nosho yo Etivali. Ovanhu ova li va hokwa okupwilikina kuye, ashike ovawiliki vomalongelokalunga ova li va hala oku mu dipaa ndele kava li va pondola. Mateus 22:15-40; Markus 12:13-34; Lukas 20:20-40.
▪ Ovafarisai ova li va pangela omhangela ilipi opo va dule okukwata po Jesus, ndele ngeno oshike sha ningwa po ngeno Jesus okwa nyamukulile ta ti heeno ile ahawe?
▪ Jesus okwa li a ya ngahelipi moshipala eenghendabala dOvasadukai ovo va li va hala oku mu kwata po?
▪ Ovafarisai ova li vali va ninga eenghendabala dilipi opo va yeleke Jesus, noshidjemo osha li shike?
▪ Pefimbo loukalele waJesus waxuuninwa womuJerusalem, Jesus okwa li a honga ovanhu motembeli oule womafiku angapi, noshidjemo osha li shike?