Etukulwa 113
Jesus ta hongo ovahongwa vaye elininipiko pOpaasa yaxuuninwa
PETRUS naJohannes ova li va fika nale kuJerusalem oko va li va tumwa kuJesus opo va ka ninge omalongekido e na sha nOpaasa. Jesus novayapostoli vakwao omulongo otashi dulika va li tava fiki kuJerusalem konima yefimbo omutenya. Eshi Jesus novayapostoli vaye va li tava londoloka kOmhunda yEemono, okwa li taku wiwile. Osho osha li oshikando shaJesus shaxuuninwa ta tale oshilando okudja komhunda oyo fiyo okonima yokunyumunwa kwaye.
Diva Jesus novayapostoli vaye ova li va fika moshilando nova li va ya keumbo oko va li tava ka danena Opaasa. Ova li va londa eetalapa vaye monduda yopombada, omo va li va hanga oinima aishe ya longekidwa opo va dane Opaasa yavo ovo aveke. Jesus okwa kala a teelela oshiningwanima osho nodjuulufi, molwaashi okwa ti: “Onda djuulukwa nokudjuulukwa okulya pamwe nanye odi ei yopassa, fimbo inandi hepekwa.”
Panghedindjikilile, ovanhu ova li hava longifa omaholo ane omaviinyu pOpaasa. Konima eshi Jesus a li a tambula eholo etitatu, okwa li a pandula ndele ta ti: “Li tambuleni, lifiileni mo, osheshi oshili handi mu lombwele: okonena itandi nu vali koiimati ei yomuviinyu fimbo ouhamba waKalunga inau uya.”
Fimbo va li tava li, Jesus okwa li a fikama, ta dula mo oshikutu shaye shokombada, ta kufa oshihaduku ndele ta tula omeva moshiyasha. Panghedindjikilile, omushivi wovaenda okwa li ha shilipaleke kutya eemhadi dovaenda oda koshwa. Ndele molwaashi pomhito oyo kapa li omushivi wovaenda, Jesus okwa li a longa po oshilonga osho. Umwe womovayapostoli okwa li ta dulu oku shi ninga, ndele molwaashi otashi dulika va li natango ve na omhepo yefiyafanepo, kape na oo a li e shi ninga. Ashike ova li va fya ohoni eshi Jesus a li a hovela okukosha eemhadi davo.
Eshi Jesus a li a ya puPetrus, Petrus okwa li a popya a ti: “Ku na efiku limwe u koshe eemhadi dange.”
Jesus okwa li e mu nyamukula a ti: “Ngenge ihandi ku kosho, ku na sha muame.”
Petrus okwa li a nyamukula a ti: “Omwene, haemhadi dange adike, nomake yo nomutwe.”
Jesus okwa li e mu nyamukula a ti: “Ou a koshwa, ina pumbwa shimwe, okukoshwa kweemhadi adike, ndele a yela nee, omunhu aushe. Onye mwa yela, ndele hanye amushe.” Jesus okwa li a popya eendjovo odo molwaashi oku shii kutya Judas Iskariot ota pangele omhangela e mu kengelele.
Eshi Jesus a mana okukosha eemhadi dovahongwa aveshe 12, mwa kwatelwa eemhadi daJudas, omukengeleli waye, okwa li a djala oshikutu shaye shokombada ndele ta kala omutumba natango poshitaafula. Opo nee okwa li a pula a ti: “Omu uditeko tuu eshi nde . . . mu ningila? Nye otamu ifana nge omuhongi nOmwene, ndele ohamu tongo sha yuka, osheshi Aame tuu ou. Hano Ame Omwene nomuhongi weni fimbo nda kosha eemhadi deni, nanye yo mu nokukoshafana eemhadi; osheshi Ame nde mu pa oshihopaelelwa, nye mu ninge yo ngaashi Ame nde mu ningila. Oshilishili ohandi mu lombwele: Omupiya ke dule omwene waye, nomutumwa ke dule omutumi waye. Eshi ngenge mu shi shii, onye ovanelao ngenge tamu shi ningi.”
Kashi fi tuu oshilihongomwa shiwa shi na sha nokulonga oilonga yelininipiko! Ovayapostoli kave na okukala tava lalakanene okukala votete, tava diladila kutya ova fimana nove na okuyakulwa alushe kuvamwe. Ova pumbwa okulandula oshihopaenenwa shaJesus. Okukoshwa kweemhadi oko kaku fi ashike oshinima shopanghedindjikilile. Ndele ponhele yaasho, oshi li oshilonga shokuyakula vamwe nehalo liwa nopehe na onhondo, kashi na nee mbudi kutya oilonga oya dinika ile kai hokwifa. Mateus 26:20, 21; Markus 14:17, 18; Lukas 22:14-18; 7:44; Johannes 13:1-17.
▪ Oshike shididilikwedi shi na sha netaleko laJesus li na sha naJerusalem eshi a li ta i mo a ka dane Opaasa?
▪ Pefimbo lOpaasa, otashi dulika Jesus a li a yandja eholo lilipi kovayapostoli 12 konima eshi a ilikana?
▪ Panghedindjikilile, eyakulo lilipi la li hali yakulwa nalo ovaenda eshi Jesus a li kombada yedu, nomolwashike la li inali ningwa pefimbo lOpaasa oyo ya li tai danwa kuJesus novayapostoli vaye?
▪ Omolwashike Jesus a li a longa oshilonga shi dinifa shokukosha eemhadi dovayapostoli vaye?