Etukulwa 123

“Taleni omunhu”

PILATUS okwa li ta kendabala natango okumangulula Jesus molwaashi okwa li a kumwifwa kelihumbato laye nokwa li yo e wete kutya ke na etimba. Okwa li a lombwela eemhunga dovanhu a ti: “Nye omwe shi ika, ndi mu mangululile omupandekwa umwe poshivilo shapassa.”

Barabas oo a li omudipai a shiivika nawa naye okwa li modolongo, onghee hano, Pilatus okwa li e va pula a ti: “Elipi po mwa hala, ndi mu mu mangululile, Barabas ile Jesus, haku tiwa Kristus?”

Molwaashi ovanhu ova li va nwefwa mo kovapristeri ovakulunhu nova li tave va hongaifa, ova li va pula Barabas a mangululwe nova ti Jesus na dipawe. Pilatus ka li a sholola, nomolwaasho okwa li e va pula vali a ti: “Elipi po muava vavali mwa hala, ndi mu mu mangululile?”

Ovanhu ova li va ingida tava ti: ‘OBarabas.’

Pilatus okwa li e va pula a lyalyakana a ti: “Jesus ou, haku tiwa Kristus, ohandi mu ningi ngahelipi?”

Ovanhu ova li ve mu nyamukula tava ingida mokule tava ti: “Na valelwe komuti womahepeko!” “Mu valela, mu valela komuti womahepeko!”

Eshi Pilatus a mona kutya ovanhu ova hala okudipaa omunhu ehe na etimba, okwa li e va pula a ti: ‘Owii washike Ye a ninga hano? Ame inandi mona etimba lokufya muye. Hano ngenge nde mu dengifa, ohandi mu efa.’

Nonande Pilatus okwa li ta ningi eenghendabala opo a mangulule Jesus, engafifi lovanhu va handuka ovo va li tava hongaifwa kovawiliki vomalongelokalunga ola kala tali ingida tali ti: “Na valelwe komuti womahepeko!” Ovanhu ovo va li tava hongaifwa kovapristeri ova li va hala okutilashi ohonde. Diladila ashike shi na sha naasho, opa li ashike pa pita omafiku atano okudja eshi vamwe vomengafifi omo tashi dulika va li mokati kaavo va li tava hambelele Jesus eshi a li ta i muJerusalem e li ngaashi Ohamba. Efimbo alishe olo ovahongwa vaJesus ova kala va mwena noinava hala okumonika nonande otashi dulika opo va li.

Eshi Pilatus a li a mona kutya ke na vali eshi ta dulu okuninga po nonokutya omaweelelo ashike ta etifa, okwa li a kufa omeva nokulikosha keenyala moipafi yeemhunga dovanhu ndele ta ti: “Ame nghi netimba lohonde yomulumenhu ou omuyuki. Litaleni nye vene.” Ovanhu ova li va nyamukula va ti: “Ohonde yaye nai uye kombada yetu nokombada yovana vetu!”

Onghee hano, Pilatus okwa li a mangulula Barabas opo a katuke metwokumwe naasho ovanhu va li tava pula noku wanife po omahalo avo ponhele yokuninga osho shi li mondjila. Okwa li a yandja Jesus ndele ta lombwele ovanhu va dule mo oikutu yaye nove mu denge neeshokoto. Okudengwa oko kakwa li ashike okudengwa kwongaho.

O-The Journal of the American Medical Association oya hokolola nghee Ovaroma va li hava denge ovanhu neeshokoto ya ti: “Oshilongifo osho sha li hashi longifwa alushe osha li ongola ixupi (oshokoto) oyo ya li i na eenyemba doshipa da pandwa dihe fike pamwe, omo mwa li hamu mangelwa outanga voshivela ile omakipa odi a hongwa. . . . Ngeenge ovakwaita Ovaroma ova kala tava denge omunhu neenghono pombuda yaye, outanga ovo va longwa moshivela ohava ningi omunhu omanyanda a ya mokule ofimbo eenyemba doshipa nomakipa odi haa tete oshipa nosho yo eenhumba domeni loshipa. Ngeenge omunhu okwa kala ta dengwa, oipute oyo ohai i mokule keenhumba odo da shiya kekipa fiyo eenhumba tadi ningi eendjadjo odo hadi kala tadi di ohonde.”

Konima eshi Jesus a li a dengwa edengo olo tali udifa omunhu omwenyo munyenye, okwa li a twalwa kombala yomupangeli, novakwaita aveshe ova li va ongalekwa. Fimbo Jesus a li oko, ovakwaita ova li natango tave mu hepeke, va li va panda oshidingo shomakiya ndele tave shi mu dike komutwe. Ova li ve mu pa oshihati meke laye lokolulyo nova li ve mu dika oshikutu shitilyana sha fa oyo ya li hai djalwa keehamba. Opo nee ova li ve mu sheka tava ti: “Kundwa Oove, ohamba yOvajuda!” Ova li yo ve mu fiila omate nove mu denga nomanghava moshipala. Ova li ve mu kufa oshihati osho va li ve mu pa ndele tave shi mu dengifa momutwe, naasho osha li sha findila mokule omakiya a honga “oshidingo” osho va li ve mu dika opo ve mu fife ohoni.

Ouladi waJesus we likalekelwa nosho yo eshi a li a ngungumana fimbo a li ta hepekwa oya li ya kumwifa Pilatus, naasho osha li she mu linyengifa a kendabale vali oku mu mangulula. Pilatus okwa li a lombwela eemhunga dovanhu a ti: “Ohandi mu eta pondje kunye, mu kale mu shi shii, inandi mona muye etimba lasha.” Otashi dulika a li ta diladila kutya ngeenge ova mono Jesus oo a li a hepekwa nai otashi ka hemuna omitima davo. Jesus okwa li a fikama komesho yongudu yovanhu ovo vehe na onghenda, a djalekwa oshidingo shomakiya noshikutu shitilyana nokwa li ta di ohonde moshipala osho sha li sha shila omolwouyahame. Pilatus okwa ti: “Taleni omunhu.”

Nonande Jesus okwa li a dengwa shinyanyalifi, ka li tuu omunhu a tongomana mondjokonona yovanhu aishe, omunhu munenenene oo a li ko nale! Doshili, ouladi nengungumano laJesus oya li ya ulika ounene waye oo na Pilatus a li a dimina nokuli, molwaashi eendjovo daPilatus oda li tadi ulike kutya okwa li e mu fimaneka nokwe mu etela onghenda. Johannes 18:39–19:5; Mateus 27:15-17, 20-30, yelekanifa NW; Markus 15:6-19; Lukas 23:18-25, yelekanifa NW.

▪ Pilatus okwa li ta kendabala ngahelipi okumangulula Jesus?

▪ Pilatus okwa li ta kendabala ngahelipi okuhakwatelwa mwaasho sha li tashi ningilwa Jesus?

▪ Okudengwa noshokoto osha li sha kwatela mo shike?

▪ Jesus okwa li a shekwa ngahelipi konima eshi a li a dengwa neeshokoto?

▪ Pilatus okwa li a ninga vali eenghendabala dilipi opo a mangulule Jesus?