Etukulwa 126

“Oshili ou okwa li Omona waKalunga”

KONIMA yefimbo lixupi okudja eshi Jesus a valelwa, opa li pa holoka omilaulu dikumwifi odo da li da kwata oule weevili nhatu. Osho ka sha li ashike elaulo letango molwaashi etango ohali laula ashike ngeenge omwedi opo we yako, ashike omwedi owa li uyadi pefimbo lOpaasa. Shimwe vali, okulaula kwetango ohaku kwata ashike oule wominute dinini. Onghee hano, omilaulu odo oda li da etifwa kuKalunga. Otashi dulika da li da mweneka ovo va li tava sheke Jesus.

Ngeenge oshiningwanima osho osha li sha ningwa fimbo omukolokoshi umwe a li ina hanyena kaume kaye nokupula Jesus e mu dimbuluke, otashi dulika osho sha li she mu linyengifa e lidilulule. Pefimbo olo lomilaulu opo tashi dulika ovakainhu vane, ina yaJesus nomumwaina waye Salome, Maria Magdalena naMaria ina yomuyapostoli Jakob Munini, va li ve uya popepi nomuti womahepeko. Ovakainhu ovo ova li ve li naJohannes, omuyapostoli oo a li e holike kuJesus.

Omutima waina yaJesus kawa li tuu wa ‘tyuulwa’ eshi a li ta tale omona waye oo a nyamifa nokwa tekula a endjelelekwa komuti ta yahama! Jesus ka li ta diladila shi na sha nouyahame waye mwene, ndele okwa li te lipula shi na sha nonghalonawa yaina. Onghee hano, okwa li a kendabala neenghono adishe opo a tale kuJohannes nokwa li a lombwela ina a ti: “Omukainhu, tala omona woye.” Opo nee okwa li a keuka kuMaria ndele ta lombwele Johannes ta ti: “Tala, nyoko!”

Kungaho, Jesus okwa li e lineekelela omuyapostoli waye oo omuholike oshinakuwanifwa shokufila ina oshisho, oo tashi dulika a li omufiyekadi pefimbo opo. Jesus okwa li a ninga ngaho molwaashi ovanamati vakwao vaMaria kava li ve mu itavela natango. Kungaho, Jesus okwe tu tulila po oshihopaenenwa shiwa mokulongekidila ina omafiloshisho opalutu nosho yo opamhepo.

Lwoponhatu yokomatango, Jesus okwa li a popya a ti: ‘Onda fya enota.’ Jesus okwa li e wete kutya Xe okwa kufa po eameno laye puye, oku shi popya pafaneko, opo oudiinini waye u yelekwe lwaxuuninwa. Onghee hano, okwa li a ingida mokule ta ti: “Kalunga kange, Kalunga kange, oshike wa ekela nge shi?” Eshi ovanhu ve shi uda, vamwe ovo va li ofika popepi naye ova ti: “Tala, Ye ota ifana Elia.” Umwe womuvo okwa tondoka diva ndele ta kufa okayavo ndele te ka yaveke momaviinyu malula noku ka tula koxulo yoshihati, ndele te mu nwefa. Ndele vamwe ova ti: “Mweneni, tu tale, Elia ngenge te uya oku mu kufa ko.”

Eshi Jesus a li a pewa omaviinyu oo malula, okwa li a ingida a ti: “Sha longwa sha pwa.” Doshili, Jesus okwa li a longa ashishe osho Xe a li e mu lombwela a ninge eshi e mu tuma kombada yedu. Xuuninwa, Jesus okwa ti: “Tate, omhepo yange ohandi i yandje momake oye.” Jesus okwa li a efela momake aKalunga eenghono domwenyo waye nokwa li e na elineekelo kutya Kalunga ote ke mu nyumuna. Opo nee okwa li e lifidimika ndele ta fi.

Eshi Jesus a fuda mo omufudo waye waxuuninwa, opa li pa ningwa ekakamo ledu linene nola li la tataula omamanya. Ekakamo ledu olo ola li linene neenghono nomolwaasho eembila odo da li kondje yaJerusalem oda li da yeuluka noimhu oya li ya umbwa mo. Ovanhu ovo va li tava ende po eshi va mona oimhu i li kombada ova li va ya moshilando nova li va hokolola shi na sha naasho.

Shimwe vali, eshi Jesus a fya, elapi linene olo la li pokati kOuyapuki nOuyapukielela motembeli yaKalunga ola li la tauka moitukulwa ivali, la tauka okudja pombada fiyo opedu. Elapi olo liwaliwa otashi dulika la li li na eemeta 18 moule nola li lidjuu. Oikumwifilonga oyo itilifa ka ya li ashike ya ulika kutya Kalunga okwa handukila ovanhu ovo va dipaa Omona waye ndele oya li yo tai ulike kutya omhito yokuya mOuyapukielela, meulu, oya ningifwa tashi shiiva kefyo laJesus.

Eshi ovanhu va mona edu la kakama nova li va mona oinima aishe oyo ya li ya ningwa po, ova li va tila neenghono. Omukwaita umwe oo a li po eshi Jesus ta dipawa okwa li a fimaneka Kalunga. Okwa ti: “Oshili ou okwa li Omona waKalunga.” Otashi dulika omukwaita oo opo a li eshi Jesus a li a popya kutya ye omona waKalunga eshi a li ta pangulwa kuPilatus. Nopomhito ei okwa li a tomwa a itavele kutya Jesus Omona waKalunga shili, omunhu munenenene oo a li ko nale.

Ovanhu vamwe ova li yo va tilifwa koikumwifilonga oyo itilifi nova li va shuna komaumbo tave lidenge meenhulo osho shi li euliko kutya ova nyika oluhodi neenghono nova fya ohoni. Ovakainhu vahapu ovo va li ovahongwa vaJesus ova li va mona oikumwifilonga oyo fimbo ve li kokule, noiningwanima oyo ididilikwedi oya li ye ve linyengifa neenghono. Omuyapostoli Johannes naye opo a li. Mateus 27:45-56; Markus 15:33-41; Lukas 23:44-49; 2:34, 35; Johannes 19:25-30.

▪ Omolwashike taku ti kutya omilaulu odo da li da kwata eevili nhatu kada li da etifwa kokulaula kwetango?

▪ Okafimbo kaxupi fimbo Jesus ina fya, okwa li a tula po oshihopaenenwa shiwa shilipi shi na sha naavo ve na ovadali ovanamido?

▪ Jesus okwa li a popya omatumbulo ane elipi fimbo ina fya?

▪ Ekakamo ledu ola li la etifa shike, nokutauka kwelapi lomotembeli moipambu ivali okwa hala okutya shike?

▪ Oikumwifilonga oyo oya li ya kuma ngahelipi omukwaita umwe oo a li po eshi Jesus ta dipawa?