Etukulwa 129

Jesus te lihololele ovahongwa vaye lwoikando

OVAHONGWA ova li va nyika oluhodi natango. Kava li ve udite ko kutya omolwashike Jesus ehe mo mombila, nokava li va itavela osho va li va lombwelwa kovakainhu. Onghee hano, mOsoondaxa lwokomatango, Kleopas nosho yo omuhongwa umwe ova li va dja muJerusalem tava i kuEmaus, osho sha li kokule naJerusalem eekilometa 11.

Fimbo va li mondjila tava ende tava kundafana oiningwanima oyo ya ningwa momukokomoko wefiku, puvo opa li pe uya omweendanandjila. Omweendanandjila oo okwa li e va pula a ti: “Otamu kundafana shike mokweenda kweni?”

Ovahongwa ova li va kanghama, noipala yavo oya li ya nyika oluhodi, ndele Kleopas ta nyamukula ta ti: “Oove auke omunailongo wa menekela muJerusalem, ino uda ei ya ningilwa mo pomafiku aa?” Opo nee omweendanandjila okwa li a pula a ti: “Oshike?”

Ovahongwa ova li va nyamukula va ti: ‘Osheshi sha ningilwa Jesus Omunasaret. Ovapristeri ovakulunhu novapangeli vetu nhumbi ve mu yandja a tokolwe a ka fye, ndele ve mu valela [komuti womahepeko, NW ]. Ndele fye twa li twe mu lineekela nokuteelela Oye ou e nokukulila Ovaisrael.’

Kleopas nomuhongwa mukwao ova li va hokolola oiningwanima ikumwifi oyo ya li ya ningwa momukokomoko wefiku, ngaashi ehokololo li na sha nokumona ovaengeli nosho yo eshi Jesus ehe mo mombila, opo nee tava popi kutya kave udite ko kutya oiningwanima oyo oya hala okutya shike. Omweendanandjila oo okwa li e va hanyena a ti: “Woo nye, omalai novafi vounye keemwenyo okwiitavela aishe ei ovaprofeti ve i popya. Hayo tuu ei Kristus kwa li e noku i humbata nokuya moshinge shaye?” Opo nee okwa li e va fatululila ouyelele wa dja momishangwa diyapuki odo tadi popi kombinga yaKristus.

Xuuninwa, ova li va fika muEmaus, nomweendanandjila oo okwa li a enda a fa ta pitilile po. Molwaashi ovahongwa ova li va hala okuuda shihapu, ova li ve mu ladipika va ti: “Kala pufye, onguloshi nokuli.” Opo nee omweendanandjila oo okwa li a kala puvo fiyo osheshi va li tava li ouvalelo. Eshi a ilikana ndele ta pambula omungome noku u va pa, ova li ve mu dimbuluka mo kutya oJesus e lidika olutu lopanhu. Opo nee Jesus okwa li a dja po puvo.

Okudja opo, ova li ve udite kutya omolwashike omweendanandjila oo a li e shii oinima ihapu. Ova li va popya va ti: “Omitima detu inadi xwama tuu mufye, eshi a popya nafye mondjila ndele [okwe] tu fatululila omishangwa!” Opo nee divadiva ova li va shuna kuJerusalem tava endelele, oko va li va hanga ovayapostoli nosho yo ovanhu vamwe ovo va li va ongala pamwe navo. Fimbo Kleopas nomuhongwa mukwao inava tya sha, ovahongwa vakwao ova li ve va lombwela va hafa va ti: “Omwene okwa nyumuka shili, okwa monika kuSimon.” Opo nee ovahongwa ovo vavali ova li va hokolola nghee Jesus e ve lihololela. Efiku olo Jesus okwa li e lihololela ovahongwa vaye peemhito da yoolokafana lwoikando ine.

Ombadilila, Jesus okwa li e lihololela ovahongwa vaye oshikando oshititano. Nonande omivelo donduda omo mwa li ovahongwa oda li da patwa molwaashi ova li va tila Ovajuda, Jesus okwa li a ya mo, ndele ta kala ofika mokati kavo ndele ta ti: “Ombili nai kale nanye.” Ovahongwa ova li va tila, tava diladila kutya ove wete oshilulu. Ashike Jesus okwa li e va yelifila kutya ye ke fi oshilulu, a ti: “Oshike mwa tila ngaha nashike omadiladilo a tya ngaha a penduka momitima deni? Taleni omake ange neemhadi dange mu koneke nge nokutya, Ame mwene ndi li po. Kumeni nge nye mu tale, osheshi oshilulu kashi na onhumba nomakipa, ngaashi mu wete nge ndi a kwete.” Ashike natango ovahongwa kava li va itavela.

Opo Jesus a kwafele ovahongwa vaye va mone kutya oye shili, okwa li e va pula a ti: “Omu kwete sha shokuliwa?” Konima eshi va li ve mu pa oshi ya yofwa ndele ta li, okwa ti: “Oyo ei nda popya meendjovo odo nde di mu lombwelele fimbo nda li punye [fimbo inandi fya], eshi nda tile aishe ei ya shangelwa nge momhango yaMoses nomovaprofeti nomomapsalme oi nokuwanifwa.”

Jesus okwa li a twikila oku va honga monghedi yekonakonombibeli, a ti: “Eshi sha shangwa, Kristus kwa li e nokuhepekwa nokunyumuka koufi efiku etitatu ndele medina laye elidilululo nedime po lomatimba oli nokuudifilwa oiwana aishe nokuhovela muJerusalem. Ndele nye eendombwedi daai aishe.”

Omolwomatomheno onhumba, Tomas ka li po pokwoongala kwa fimanenena oko kwa li kwa ningwa mOsoondaxa konguloshi. Onghee hano, konima yomafiku ovahongwa vakwao ova li ve mu lombwela va hafa va ti: “Fye otwa mona Omwene.”

Tomas okwa li a patana a ti: “Ngenge inandi mona oivadi yeendungu momake aye, ndele inandi tula omunwe wange moivadi yeendungu, neke lange molupati laye, itandi itavele.”

Konima yomafiku ahetatu okudja eshi Jesus a li e ve lihololela oshikando oshititano, ovahongwa ova li va ongala natango monduda, nopefimbo opo Tomas okwa li pamwe navo. Nonande omivelo oda li da pata, Jesus okwa li vali e uya mo nokufikama mokati kavo, ndele ta ti: “Ombili nai kale nanye.” Opo nee okwa li a tala kuTomas ndele ta ti: “Eta omunwe woye oku, ove u tale omake ange, ove u yelule eke loye, u li twe molupati lange, ndele ove ino kala onakuhaitavela.”

Tomas okwa li a ingida a ti: “Omwene wange naKalunga kange”!

Jesus okwa li e mu lombwela a ti: “Osheshi wa mona nge, opo to itavele. Ovanelao ovava hava itavele nande inava mona.” Lukas 24:11, 13-48; Johannes 20:19-29.

▪ Omweendanandjila umwe okwa li a pula shike ovahongwa vavali ovo va li tava i kuEmaus?

▪ Omweendanandjila okwa li a popya shike osho sha li sha ningifa omitima dovahongwa di kale da xwama?

▪ Ovahongwa ova li va didilika mo ngahelipi kutya olyelye a li omweendanandjila oo?

▪ Eshi Kleopas nomuhongwa mukwao va li va shuna kuJerusalem, ova li va uda onghundana ihafifa ilipi?

▪ Jesus okwa li e lihololela ovahongwa vaye oshikando oshititano peni, noshike sha li sha ningwa po?

▪ Oshike sha li sha ningwa po konima yomafiku ahetatu okudja eshi Jesus a li e lihololela ovahongwa vaye oshikando oshititano, na Tomas okwa li a tomwa ngahelipi lwaxuuninwa a itavele kutya Jesus okwa nyumuka?