Etukulwa 130

Jesus te lihololele vali ovahongwa vaye pefuta laGalilea

OVAYAPOSTOLI ova li va shuna kuGalilea, ngaashi Jesus a li e va lombwela nale. Ashike kava li ve shii osho tava ka ninga ko. Konima yefimbo, Petrus okwa li a lombwela Tomas, Natanael, Jakob nomumwaina Johannes, nosho yo ovayapostoli vamwe vavali a ti: “Ohandi ka yula eeshi.”

Vakwao ova li va nyamukula va ti: “Nafye yo ohatu i naave.”

Ova li va kendabala oufiku aushe ndele kava li va yula sha. Ndele eshi taku shi, Jesus okwa li e uya komunghulofuta, ndele ovahongwa vaye kava li ve mu dimbuluka. Okwa li e va ingida a ti: “Ovamwange, omu na sha shokulya?”

Ova li va nyamukula va ti: “Ahowe.”

Jesus okwa li e va lombwela a ti: “Oshiyulifo shi ekeleni kolulyo lowato opo tamu mono.” Eshi va li va ninga ngaho, kava li tava dulu okushila mo oshiyulifo shavo molwaashi osha li shi yadi eeshi.

Johannes okwa li a ingida a ti: “Oye Omwene”!

Eshi Petrus a li a uda ngaho, okwa djala oshikutu shaye shokombada, molwaashi okwa hangwa a li a dula mo oikutu yaye, ndele ta nukile mefuta. Opo nee okwa li a yowa eemeta 90 lwaapo a yuka komutunda. Ovayapostoli vakwao ova li ve mu landula nokawato, ta ka nane oshiyulifo shi yadi eeshi.

Eshi va fika komutunda, okwa li ku na omundilo neeshi tadi yofwa nosho yo omungome. Jesus okwa ti: “Eteni oku meeshi edi mwa kwata paife.” Petrus okwa li a ya mowato ndele ta nanene oshiyulifo komutunda, osho sha li shi na eeshi dinene 153.

Opo nee Jesus okwa li e va lombwela a ti: “Ileni mu lye!”

Kape na umwe womuvo a li e na ouladi oku mu pula kutya ‘oye lyelye’ molwaashi aveshe ova li ve shii kutya oJesus. Osho osha li oshikando oshitiheyali Jesus te lihololele ovanhu okudja eshi a nyumuka, noshikando oshititatu te lihololele ovayapostoli vaye ve li ongudu. Opo nee Jesus okwa li e va pa oshuumbululwa, a pa keshe umwe omungome noshi.

Eshi va mana okulya, Jesus okwa li a pula Petrus, tashi dulika a li ta tale keeshi dihapu odo va li va kwata, a ti: “Simon omona waJohannes, u hole nge tuu, u dule ava?” Nopehe na omalimbililo, Jesus okwa li a hala okutya, ou hole ongeshefa yeeshi shi dulife oilonga oyo nde ku longekidila?

Petrus okwa li a nyamukula a ti: “Heeno, Omwene, Ove u shi shii nokutya, ondi ku hole.”

Jesus okwa li e mu lombwela a ti: “Lifa eedjona dange.”

Jesus okwa li e mu pula oshikando oshitivali a ti: “Simon omona waJohannes, ove u hole nge?”

Petrus okwa li a nyamukula a ti: “Heeno, Omwene, Ove ou shi shii ondi ku hole.”

Jesus okwa li vali e mu lombwela a ti: “Lifa eedi dange.”

Opo nee Jesus okwa li vali e mu pula oshikando oshititatu a ti: “Simon omona waJohannes, ou hole nge tuu?”

Pomhito oyo Petrus okwa li a nyika oluhodi. Otashi dulika a li te lipula kutya pamwe Jesus okwa limbililwa oudiinini waye. Eshi Jesus a li a tokolelwa efyo, Petrus okwa li e mu lidimbika oikando itatu. Onghee hano, Petrus okwa li a nyamukula a ti: “Omwene, oinima aishe ove u i shii, ou shii [kutya] ondi ku hole.”

Jesus okwa li e mu lombwela oshikando oshititatu a ti: “Lifa eedi dange.”

Kungaho, Jesus okwa li a longifa Petrus opo a ulikile vamwe nghee oilonga oyo a hala va longe ya fimanenena. Jesus okwa li e li pokushuna meulu, nokwa li a hala ovayapostoli va kwatele komesho ovo tava ka nanenwa koufita weedi daKalunga.

Ngaashi ashike Jesus a li a mangwa ndele ta dipawa omolwokulonga oilonga oyo a li a pewa kuKalunga, Jesus okwa li ta lombwele Petrus kutya naye ota ka mona oixuna. Jesus okwa li e mu lombwela a ti: “Fimbo wa li omunyasha, owe lidika mwene, ndele wa ya oku wa hala, ndelenee ngenge wa kula, opo nee oto yelula omaoko oye, naumwe elili ote ku dike, ndee te ku twala oku ove ino hala.” Nonande Petrus okwa li ta ka dipawa omolweitavelo laye, Jesus okwa li e mu ladipika a ti: “Shikule nge.”

Petrus okwa li a keuka ndele ta mono Johannes, nokupula Jesus ta ti: “Omwene, ou ota ningwa shike?”

Jesus okwa li a nyamukula a ti: “Ame ngenge onda hala a kale po fiyo handi uya, ove ou na shike nasho? Ove [shikule] nge.” Ovahongwa vahapu ova li tava diladila kutya Jesus okwa li a hala okutya omuyapostoli Johannes ita ka fya nandenande. Ndele ngaashi omuyapostoli Johannes a ka yelifa komesho, Jesus ka li a hala okutya Johannes ita fi, ndele okwa ti ashike: “Ame ngenge onda hala a kale po fiyo handi uya, ove ou na shike nasho?”

Johannes okwa ka popya yo eendjovo edi didilikwedi a ti: “Ope na yo oinima ihapu ilili ei Jesus e i longa, ndele ngeno aishe ya shangwa, ngeno ndi shii mounyuni itamu wana omambo oo, e nokushangwa.” Johannes 21:1-25; Mateus 26:32; 28:7, 10.

▪ Oshike tashi ulike kutya ovayapostoli kava li ve shii osho tava ka ninga kuGalilea?

▪ Ovayapostoli ova li va didilika mo Jesus ngahelipi pefuta laGalilea?

▪ Jesus okwa li e lihololela ovanhu lungapi okudja eshi a nyumuka?

▪ Jesus okwa li a divilika ngahelipi oilonga oyo a li a hala ovayapostoli va longe?

▪ Jesus okwa li a ulika ngahelipi onghedi omo Petrus a li ta ka fya?

▪ Eendjovo daJesus di na sha naJohannes dilipi da li inadi udiwa ko nawa kovahongwa vahapu?