Oshileshwa 10

Oilonga Oyo Kalunga E Tonde

Ou na okukala u udite ngahelipi kombinga yoinima oyo Kalunga ta ti oii? (1)

Elihumbato lopamilele lomaludi elipi la puka? (2)

Ongahelipi Omukriste e na okutala ko oipupulu? (3) okundobola? (3) okuvaka? (3) elongifo leenghono? (4) oumhulile? (5) oukolwe? (6)

Ongahelipi omunhu ta dulu okumanguluka keenghedi dii? (7)

1. Ovapiya vaKalunga ove hole osho shiwa. Ndelenee ove na okulihonga yo okutonda osho shii. (Epsalme 97:10) Osho otashi ti okuhenuka oilonga yonhumba oyo Kalunga e tonde. Oilonga imwe yomwaai oilipi?

2. Oluhaelo: Enangalafano komesho yohombo, enyonohombo, enangalo noshimuna, enangalafano nomupambele noushenge, aishe ei oyo omanyono a kwata moiti kuKalunga. (Leviticus 18:6; Ovaroma 1:26, 27; 1 Ovakorinto 6:9, 10) Ngeenge vavali inava hombola ndele ohava kala pamwe, vo ove na okutukauka ile va hombole paveta.—Ovaheberi 13:4.

3. Oipupulu, Okundobola, Okuvaka: Jehova Kalunga iha dulu okufufya. (Titus 1:2) Ovanhu ovo va hala okuhokiwa kuye ove na okuhenuka oipupulu. (Omayeletumbulo 6:16-19; Ovakolossi 3:9, 10) Oludi keshe lokundobola ola nyatekwa kolwisho. Onghee hano Ovakriste ihava kufa ombinga moludi keshe lokundobola, ngaashi olotteri, efiyafanepo leenghambe nobingo. (Ovaefeso 5:3-5) Ndele Ovakriste ihava vake. Vo ihava lande owina oinima ya vakwa ile va kufe oinima ve he na epitikilo.—Exodus 20:15; Ovaefeso 4:28.

4. Ehandu, Elongifo lEenghono: Ehandu inali pangelwa otali dulu okutwala moilonga yelongifo leenghono. (Genesis 4:5-8) Omulongifi weenghono ita dulu okukala kaume kaKalunga. (Epsalme 11:5; Omayeletumbulo 22:24, 25) Oshi li sha puka okukwatela onghone ile okwaalulila owii omolwoinima ii oyo vamwe tashi dulika tave tu ningile.—Omayeletumbulo 24:29; Ovaroma 12:17-21.

5. Oulodi nOumhulile: Ovanhu vamwe ohava indile eenghono deemhepo opo di kendabale okuvelula omikifi. Vamwe ohava tikile ovatondi vavo opo va vele ile ve va dipae nokuli. Omunaenghono oo e li konima yoilonga aishe ei oSatana. Onghee hano Ovakriste kave na okukufa ombinga mukeshe shimwe shomuyo. (Deuteronomion 18:9-13) Okukala popepi naJehova oko eameno liwa komatikilo oo tashi dulika hatu tikilwa kuvamwe.—Omayeletumbulo 18:10.

6. Oukolwe: Kashi fi epuko okunwa kanini omaviinyu, omalodu, ile oshikunwa shimwe shoalkoholi. (Epsalme 104:15; 1 Timoteus 5:23) Ndelenee okunwa unene sha pitilila noukolwe osha puka momesho aKalunga. (1 Ovakorinto 5:11-13; 1 Timoteus 3:8) Okunwa sha pitilila otashi dulu okunyona oukolele woye nokuhanauna po oukwaneumbo woye. Otaku dulu yo oku ku ningifa u liefele noupu lela momayeleko amwe.—Omayeletumbulo 23:20, 21, 29-36.

7. Ovanhu ovo tava longo oinima oyo Kalunga ta ti oii “itava ka fyuulula ouhamba waKalunga.” (Ovagalati 5:19-21) Ngeenge ou hole shili Kalunga nowa hala oku mu hafifa, oto dulu okumanguluka koilonga ei. (1 Johannes 5:3) Lihonga okutonda osho Kalunga ta ti oshii. (Ovaroma 12:9, OB-1986) Endafana novanhu ovo ve na eenghedindjikilile dometilokalunga. (Omayeletumbulo 13:20) Ookaume va pyokoka vopaKriste otava dulu okukala odjo yekwafo. (Jakob 5:14) Komesho yaaishe, liameka kekwafo laKalunga okupitila meilikano.—Ovafilippi 4:6, 7, 13, yelekanifa NW.

Kalunga oku tonde oukolwe, okuvaka, okundobola nosho yo oilonga yelongifo leenghono