Okukundafana navamwe okupitila meenhumwafo

EENHUMWAFO oda kwafela ovanhu omamiliyona va xwepopaleke okukalamwenyo kwavo nosho yo oikala yavo. Omambo mahapu oo e li oshitukulwa shOmishangwa dopaKriste dOshigreka okwa li eenhumwafo. Nafye ohatu dulu okukala hatu shange eenhumwafo kunena opo tu tunge ovo vape meitavelo, tu kwatafane nookaume ketu, tu twe omukumo ovamwatate novamwameme ovo ve na oinakuwanifwa ye likalekelwa, tu pameke ovo ve li meenghalo didjuu, nokuyandja omauyelele a pumbiwa opo tu wanife po oinakuwanifwa yomeongalo. — 1 Tes. 1:1-7; 5:27; 2 Pet. 3:1, 2.

Ohatu dulu yo okuyandja oundombwedi nomupondo okupitila meenhumwafo. Moitukulwa imwe, ovanhu vahapu ohava kala meenhele odo da amenekeka, ile meehotela omo itatu dulu okuya tu ke va udifile, ofimbo vamwe ihatu va hange mo momaumbo eshi hatu udifa eumbo neumbo. Vamwe ove li moitukulwa oyo ye likalela.

Omafimbo amwe otashi dulika itatu dulu okudja mo momaumbo omolwouyahame wonhumba, onghalo ii yomhepo ile molwaashi twa tulilwa po efimbo olo tu na okukala tu li momaumbo. Mbela ito dulu okushanga onhumwafo opo u yandje oundombwedi komupambele woye ile komunhu umwe oo wa li wa popya naye eshi wa li to yandje oundombwedi wohangelela? Mbela omunhu umwe oo ho konakona naye Ombibeli okwa tembukila koshitukulwa shimwe? Otashi dulika wa pumbwa oku mu shangela onhumwafo opo a kale natango e na ohokwe moinima yopamhepo. Ile oto dulu okushangela oohandimwe ovo opo va hombola, ovo opo va mono okaana ile ovo va filwa omuholike wavo, to longifa ouyelele wonhumba wopamishangwa oo tau wapalele.

Nghee hatu dulu okuyandja oundombwedi okupitila meenhumwafo

Ngeenge to udifile omunhu oo ino shakeneka nale okupitila monhumwafo, litongomona tete. Oto dulu okuyelifa kutya oto kufa ombinga moilonga yokuliyamba oyo hai longwa mounyuni aushe. Oto dulu yo okupopya kutya ove oumwe womEendombwedi daJehova, ngeenge ou wete sha pumbiwa. Mu yelifila yo kutya omolwashike to mu shangele onhumwafo ponhele yokuya kuye ove mwene. Shanga onhumwafo oyo wa fa to popi nomunhu oo oshipala noshipala. Shimwe vali, diladila moule kutya oto ka yandja ouyelele u fike peni u na sha naave mwene, to shi ningi metwokumwe nomayele oo taa ti: “Kaleni hano mwa lungama ngaashi omayoka nongaashi eenghuti.” — Mat. 10:16.

Monhumwafo omo kwatela mo yo osho ngeno wa ka popya nomunhu oo ngeno owa li we ke mu talela po. Oto dulu okulongifa ouyelele oo u li mokambo Oipalanyole yeenghundafana dopaMbibeli ile omatwalemo opamishangwa oo e li mokafo kOukalele wetu wOuhamba oko opo ka piti. Oto dulu yo oku mu pula epulo noku mu ladipika a diladile shi na sha nalo. Ovaudifi vamwe ohava yelifa paunafangwa kutya otu na elongekido lokunyamukula omapulo ovanhu oo e likolelela kOmbibeli nopehe na oku va pula ofuto yasha, opo nee tava tofa oipalanyole yomatukulwa onhumba oo e li moshishangomwa osho hatu longifa okukonakona novanhu Ombibeli. Pepandja eti-73 ope na oshihopaenenwa shonhumwafo yokuyandja oundombwedi, oyo tai dulu oku ku kwafela u mone kutya eenhumwafo doludi olo odi na okushangwa momushingo ulipi. Ndele oshiwa okushanga onhumwafo yoye i na oshikalimo sha yooloka ko kwaayo. Ngeenge hasho, ovanhu otashi dulika va kale hava yakula eenhumwafo da faafana lwoikando.

Ovanhu vamwe ohava kala va fya ounye okulesha onhumwafo ileile oyo ya dja komunhu oo vehe shii. Onghee hano, otashi ka kala pandunge okushanga onhumwafo ixupi. Ngeenge onhumwafo yoye kaixupi omunhu otashi dulika a loloke oku i lesha. Oto dulu yo okutumina omunhu oo okafo kokushiva ovanhu kokwoongala. Kakele kaasho, oto dulu yo oku mu tumina okatraktate, okabroshure, oshifo shOshungonangelo ile o-Awake!, noku mu yelifila kutya oto dulu okukala ho mu tumine alushe oifo ya tya ngaho ngeenge okwa hala. Oto dulu yo oku mu pula ngeenge oto dulu oku ke mu talela po keumbo laye opo mu kundafane shi na sha naasho wa shanga monhumwafo.

Omutungilo wonhumwafo

Paife tala nee koshihopaenenwa shonhumwafo osho shi li pepandja 73. Didilika kutya: (1) Otai monika ya yela nawa. (2) Ngeenge oya kana, omunhu oo te ke i yakula ota ka kala e na edina laao ei tuma nosho yo ondjukifi yaye. (3) Elalakano lonhumwafo ola popiwa kondadalunde mokatendo kotete noli li paunafangwa. (4) Oshitwa keshe osho sha fimana osha kundafanwa mokatendo kasho. (5) Elalakano lonhumwafo oyo otali ulike kutya kai fi onhumwafo yakwalukeshe, yo itai monika unene ya fa yopambelewa.

Meenhumwafo dihapu dopambelewa, ngaashi odo hamushanga weongalo ha tumine koshitaimbelewa, oku na okushanga ko edina leongalo, nosho yo edina laye, ondjukifi yaye nefiku omo a shanga onhumwafo oyo. Meenhumwafo dopambelewa omunhu oku na yo okushanga mo edina lomunhu nondjukifi ile lehangano oko ta tumine onhumwafo oyo. Ondjukifi oyo oi na okushikulwa kepopifo tali wapalele. Pexulilo lonhumwafo, momalaka amwe omunhu oku na okushanga outumbulilo ngaashi, “Weni” oo hau tetekele omukweyo opo ta shange edina laye. Monhumwafo oyo ou na okushanga mo edina loye neke loye mwene.

Monhumwafo keshe oyo to shange, shanga nawa oitya, lungamena eemhango delaka noileshifo, nonhumwafo nai kale yo ya yela nawa. Ngeenge owa ningi ngaho, omunhu oo to shangele ota ka pandula onhumwafo yoye nosho yo etumwalaka olo li li mo.

Kombada yekutu alushe shanga ko ondjukifi yoye oko omunhu ta dulu oku ku shangela. Ngeenge ou wete kutya kashi li pandunge okuyandja ondjukifi yoye eshi to yandje oundombwedi monhumwafo komunhu oo uhe shii, pula ovakulunhuongalo ngeenge oto dulu okulongifa ondjukifi yeongalo leni. Ondjukifi yoshitaimbelewa kai na okulongifwa nandenande moshinima osho, molwaashi osho otashi ka ningifa ovanhu va diladile kutya onhumwafo oyo oya dja koshitaimbelewa naasho otashi ka etifa engwangwano. Ngeenge ino tula po ondjukifi yoye, ove monhumwafo oyo owa tula mo oshileshomwa, osho otashi dulika yo shi ningife omunhu a diladile kutya oya dja koshitaimbelewa.

Konhumwafo oyo tula ko eesitambe da wana, unene tuu ngeenge owa tula mo oshishangomwa. Ngeenge ino tula ko eesitambe da wana, oo ta ka yakula onhumwafo oyo otashi dulika a ka futifwe oimaliwa oyo ya kambela ko, notashi dulika aha ka tambule ko etumwalaka loye. Dimbuluka kutya moilongo ihapu ngeenge mekutu owa tula mo okabroshure ile oshifo shonhumba, ou na okutula ko eesitambe dihapu shi dulife omo mu na ashike onhumwafo.

Onhumwafo yoye nai kale tai kwelengedja nawa

Eshi wa mana okushanga onhumwafo, lesha mo opo u konakone oshikalimo shayo. Otai linyenge ngahelipi mbela? Mbela oyoukaume notai ulike kutya owe i shanga nelungi? Ngeenge hatu ungaunga navamwe, otwa pumbwa oku va ulikila ohole nosho yo olune. (Gal. 5:22, 23) Ngeenge owa didilike mo sha osho itashi linyenge nawa eshi to lesha mo, ninga mo omalunduluko.

Onhumwafo otai dulu okuya keenhele oko ove ito dulu okuya, nomolwaasho okushanga eenhumwafo oku li onghedi ye likalekelwa omo hatu dulu okukwatafana novanhu moukalele. Molwaashi onhumwafo otai holola kutya oove lyelye, tala nawa kutya otai ti shike notai monika ngahelipi nosho yo nghee oitya tai kwelengedja. Otashi dulika onhumwafo yoye i ka pameke omunhu wonhumba noku mu twa omukumo opo a ende mondjila oyo tai twala komwenyo waalushe.