Mbela ou na omhepo ihai fi?

MBELA konima yefyo oku na omwenyo? Epulo olo ola kala la limbililika ovanhu oule womayovimudo. Oule womido da pita, ovanhu moulikumwe keshe ova kala tave lipula noshinima eshi nosha etifa po omaitavelo e lili noku lili.

Mounyuni aushe, ovanhu vahapu ova itavela kutya “omhepo” ohai fyaala po ngeenge omunhu a fya. Mbela momunhu omu na shili osho hashi fiye po olutu pefyo nokutwikila okukala nomwenyo? Omhepo hano oshike momunhu e na omwenyo? Ohai ningilwa shike ngeenge hatu fi? Eendjovo daKalunga da nwefwa mo, Ombibeli, otadi yandje omanyamukulo ashili notaa mbilipaleke komapulo oo.

Omhepo oshike?

MOmbibeli, oshitya sha tolokwa “omhepo” otashi ti lelalela “omufudo.” Ndelenee eshi otashi ulike shihapu shi he fi ashike okufuda. Pashihopaenenwa, omushangi wOmbibeli Jakob ota ti: “Olutu li he nomhepo, [ola] fya.” (Jakob 2:26) Onghee hano, omhepo oyo hai kaleke olutu li kale li na omwenyo.

Eenghono edi hadi kaleke olutu nomwenyo itadi dulu ashike okukala omufudo ile omhepo oyo hatu fuda tai linyenge komapunga. Omolwashike mbela? Omolwaashi pakupopya kwoThe World Book Encyclopedia, ngeenge omufudo wa mwena, omwenyo ohau kala moutukulwa volutu oule wokafimbo—“oule wominute donhumba.” Hano omolwetomheno eli eenghendabala dokuningifa omunhu a fude vali tadi dulu okupondola nosho yo oilyo yolutu otai dulu okukufwa momunhu umwe nokutulwa momunhu mukwao. Ndelenee ngeenge ohandje yomwenyo oya dimwa moutukulwa volutu, eenghendabala adishe dokumwenyopaleka omunhu odoshimha. Kashi na nee mbudi kutya omufudo oo tau fudilwa mo ouhapu shi fike peni, itau dulu okumwenyopaleka nande okatukulwa kamwe. Onghee hano, omhepo oyo eenghono domwenyo ihadi monika—ohandje yomwenyo—oyo tai kaleke eesele nomwenyo. Eenghono edi domwenyo ohadi kalekwa po kokufuda.—Job 34:14, 15.

Mbela omhepo oyo otai longo ashike movanhu? Ombibeli otai tu kwafele tu mone exulifodiladilo la yela moshinima eshi. Ohamba inaendunge Salomo oya shanga tai ti: ‘Olyelye e shi shii nokutya, omhepo yomona womunhu tai i pombada, nomhepo yoimuna tai kuluka medu?’ (Omuudifi 3:21, yelekanifa New World Translation.) Onghee hano oinamwenyo nosho yo ovanhu otava popiwa ve na omhepo. Mbela eshi otashi dulika ngahelipi?

Omhepo ile eenghono domwenyo, otadi dulu okufaafanifwa neenghono dolusheno odo tadi kunguluka meshina. Olusheno li he wetike otashi dulika li longifwe okulonga oilonga i lili naku lili, she likolelela koludi loshilongifo osho tashi pewa eenghono. Pashihopaenenwa, efiya otali dulu okuningifwa li yandje oupyu, okompiuta otai dulu okuningifwa i yandje omauyelele nokuninga omavalulo nosho yo oTV okuulika omafano nokuyandja omawi. Ndelenee eenghono dolusheno ihadi kala nande di na omaukwatya a fa oshilongifo osho tadi longifa. Ohadi kala ashike di li eenghono. Sha faafana, eenghono domwenyo ihadi kala di na omaukwatya onhumba oishitwa i na omwenyo. Kadi na oukwatya wopanhu nowokudiladila. Oinamwenyo novanhu “ove na omhepo imwe aike.” (Omuudifi 3:19, NW) Onghee hano, ngeenge omunhu a fya, omhepo yaye ihai i i ka kale konhele imwe i li oshishitwa shopamhepo.

Mbela oonakufya ove li monghalo ya tya ngahelipi? Noshike hashi ningilwa omhepo ngeenge omunhu a fi?

“Ove oto shuna medu”

Eshi omunhu wotete, Adam, ina dulika koshipango shaKalunga owina, Jehova okwe mu lombwela ta ti: “Omungome woye oto u li noshinhwi moshipala shoye fiyo ove oto shuna medu, osheshi omo wa kufwa. Osheshi oove edu, ndee to ka ninga edu.” (Genesis 3:19) Adam okwa li peni fimbo Jehova ine mu shita okudja mondwi? Doshili, ye ka li e na apa e li! Onghee hano eshi Jehova Kalunga a popya kutya Adam ota ka “shuna medu,” okwa li ta ti Adam ota ka fya. Adam ka li ta ka ya konhele yeemhepo. Pefyo ota ka kala e he na omwenyo, ta ka kala e he po vali. Okuhandukilwa kwaye okwa li efyo—okuhakala po komwenyo—ndelenee hakuya konhele imwe.—Ovaroma 6:23.

Ongahelipi shi na sha navamwe ovo va fya? Onghalo yoonakufya oya yelifwa nawa mOmuudifi 9:5, 10, omo hatu lesha: “[Oonakufya] inava shiiva nande sha . . . Moshovafi oku to i, kamu na nande oshilonga, ediladilo neshiivo ile ounongo.” Onghee hano, efyo olo onghalo yokuhakala po. Omupsalme okwa shanga kutya ngeenge omunhu a fya, ‘omuku [“omhepo,” NW] ngenge wa pwa mo muye, ota shunwa medu nefiku tuu olo, omadiladilo aye kae po vali.’—Epsalme 146:4.

Osha yela kutya ovafi ihava diladila sha noihava longo sha. Vo kave shii sha. Itava dulu oku ku mona, oku ku uda ile okupopya naave. Itava dulu nokuli oku ku kwafela ile oku ku etela oshiponga. Ino pumbwa okutila oonakufya nandenande. Ndelenee ongahelipi omhepo ‘hai pu mo’ momunhu pefimbo lokufya kwaye?

Omhepo ‘ohai shuna kuKalunga’

Ombibeli otai ti kutya ngeenge omunhu a fya, ‘omhepo ohai shuna kuKalunga, ou e i mu pele.’ (Omuudifi 12:7) Mbela eshi osha hala okutya omhepo komudidi ohai i nokutavakana mewangadjo ya yuka oko ku na Kalunga? Hasho nande! Monghedi omo Ombibeli tai longifa oshitya “shuna” inashi pumbiwa pa kale elinyengo lo venevene okudja konhele imwe nokuya kuikwao. Pashihopaenenwa, Ovaisrael ve he fi ovadiinini ova li va lombwelwa taku ti: “Alukileni kuame, opo Ame nda hala [okwaalukila] kunye, Omwene womatanga ovakwaita ta ti.” (Malakia 3:7) “Okwaalukila” kwOvaisrael kuJehova otashi ti okweefa onghatu ya puka nokutwa vali kumwe nondjila youyuki yaKalunga. ‘Nokwaalukila’ kwaJehova kOvaisrael otashi ti okwaalulila vali elitulemo laye lohokwe koshiwana shaye. Meenghedi adishe di li mbali ‘okwaaluka’ okwa kwatela mo oikala, ndelenee kaku fi elinyengo lolelalela okudja konhele imwe to i kuikwao.

Sha faafana, pefyo ihapa ningwa elinyengo lolelalela hali di kedu tali i monhele yomeulu ngeenge omhepo tai “shuna” kuKalunga. Dimbuluka, omhepo oyo eenghono domwenyo. Ngeenge eenghono odo oda di mo momunhu, Kalunga oye ashike e na eenghono oku di mu alulila. Onghee hano okutya omhepo ‘otai shuna kuKalunga’ otashi ti eteelelo alishe lomwenyo womonakwiiwa lomunhu oo paife oli li filufilu momake aKalunga.

Pashihopaenenwa, konakona osho Omishangwa tadi ti kombinga yefyo laJesus. Omushangi wevangeli Lukas ota hokolola ta ti: “Jesus okwa popya mokule a tya: Tate, omhepo yange ohandi i yandje momake oye. Ndele eshi e di tya, okwa hefa mo omhepo yaye.” (Lukas 23:46) Eshi omhepo yaJesus ya dja mo muye, ka li medimo londjila a yuka keulu. Jesus okwa kala omafiku atatu ina nyumuka koufi. Nokwa kala oule womafiku e dulife 40 fimbo ina londa keulu. (Oilonga 1:3, 9) Ndelenee pefimbo lefyo laye, Jesus okwe lineekelela omhepo yaye momake aXe, e lineekela filufilu meenghono daJehova doku mu nyumuna.

Heeno, Kalunga oye ashike ta dulu oku nyumuna omunhu. (Epsalme 104:30) Eshi itashi eta tuu etimaumbwile likumwifa!

Eteelelo lashili

Ombibeli otai ti: “Osheshi efimbo tali uya, opo aveshe ava va kala [meembiladimbuluko] otava udu ondaka [yaJesus] ndee tava holoka mo.” (Johannes 5:28, 29, yelekanifa NW.) Heeno, Jesus Kristus okwa udaneka kutya aveshe ovo tava dimbulukiwa kuJehova otava ka nyumunwa ile tava ka alulilwa momwenyo. Ponhele yomashiivifo a nyikifa oluhodi kutya ovanhu ova fya, omahokololo ehafo otaa ka hokolola ovo va nyumuninwa momwenyo. Itashi ka kala tuu ehafo okuhambelela ovaholike okudja meembila!

Owa hala okushiiva shihapu kombinga yanghee to dulu okumona ouwa meteelelo eli la yandjwa kuKalunga? Ohatu ku shivi u shangele kuimwe yomeendjukifi odo di li pedu omolwokumona oshileshomwa Eemhepo dOonakufya—Otadi Dulu Oku Ku Kwafa ile Otadi Ku Etele Oshiponga? Oko Di Li Shili?

Kakele kaayo ya ulikwa shimwe shi lili, oitofwamo aishe yOmbibeli oya kufwa mOmbibeli yOshikwanyama.