Etukulwa etivali

Fimaneka Jehova e li Kalunga aeke kashili

1. Kalunga aeke kashili oye lyelye?

OMBIBELI otai ti kutya nonande oku na oinima ihapu oyo ya talika ko i li ookalunga, oku “na Kalunga umwe, oTate.” (1 Ovakorinto 8:5, 6) “Kalunga umwe” oo oye Jehova, Omushiti woinima aishe. (Deuteronomion 6:4, NW; Ehololo 4:11) Jesus okwe mu popya e li ‘Kalunga kange naKalunga keni.’ (Johannes 20:17) Okwa twa kumwe naMoses, oo a popile nale ta ti: “[Jehova, NW] Oye Kalunga. Ponho yaye pe he na kamwe.” (Deuteronomion 4:35) Jehova okwa shiya ko e dule oshinima keshe hashi ilikanwa, ngaashi oihongwafano, ovanhu ovo va ningwa ookalunga nosho yo omutondi waye Satana Ondiaboli, ‘kalunga kounyuni ou.’ (2 Ovakorinto 4:3, 4, OB-1954) Mepingafano naaishe oyo, ngaashi Jesus e mu ifana, Jehova oye ‘aeke Kalunga kashili.’—Johannes 17:3.

2. Eshi hatu lihongo kombinga yaKalunga, okukalamwenyo kwetu oku na okukumwa ngahelipi?

² Oshi shii okupandulwa eshi ovanhu ovo have lihongo kombinga yomaukwatya aKalunga taa hafifa omutima nosho yo osho e tu ningila naasho te ke tu ningila natango, hava nanenwa kuye. Eshi ohole yavo yoku mu hola tai kulu, ohave linyengifwa ve mu fimaneke. Ngahelipi mbela? Onghedi imwe omokulombwela vamwe shi na sha naye. Ovaroma 10:10 otava ti: ‘Okuhepaulula nokanya otaku xupifa.’ Onghedi imwe vali oyo oku mu hopaenena meendjovo nomoilonga. Ovaefeso 5:1 otava ti: “Ningeni hano [ovahopaeleli] vaKalunga ngaashi ovana ovaholike.” Opo tu shi ninge pauyadi, otwa pumbwa okushiiva Jehova ngaashi naanaa e li.

3. Omaukwatya aKalunga a tongomana oelipi?

³ Ope na omatumbulo mahapu mOmbibeli oo taa holola omaukwatya aKalunga a tongomana. Omaukwatya aye ane a tongomana oo ounongo, ouyuki, eenghono nosho yo ohole. ‘PuKalunga ope na ounongo.’ (Job 12:13) ‘Oku hole ouyuki.’ (Epsalme 33:5) ‘Eenghono daye odinene.’ (Jesaja 40:26) ‘Kalunga Oye ohole.’ (1 Johannes 4:8) Ndelenee momaukwatya aKalunga ane oo a tongomana, oukwatya ulipi mbela wa tongomana unenenene, oo tau mu holola unene kutya oye Kalunga a tya ngahelipi?

“Kalunga Oye ohole”

4. Oukwatya waKalunga ulipi we mu linyengifa a shite ewangadjo nosho yo oinima aishe i na omwenyo?

⁴ Diladila kwaasho she linyengifa Jehova a shite ewangadjo nosho yo oishitwa inaendunge yopamhepo nosho yo yovanhu. Mbela osha li ounongo waye ile eenghono daye? Hasho, nonande Kalunga okwe i longifa, hayo ya li eenghono odo de mu linyengifa. Nouyuki waye kawa li tau mu pula opo a pe oishitwa omaano omwenyo. Ponhele yaasho, ohole yaKalunga inene oyo ye mu linyengifa opo a pe yo vamwe ehafo lokukala po ve li ovanhu ovanaendunge. Ohole oye mu linyengifa a tule po elalakano opo ovanhu ovaduliki va kale nomwenyo fiyo alushe mOparadisa. (Genesis 1:28; 2:15) Ohole oye mu linyengifa a ninge elongekido lokukufa po etokolo olo enyono laAdam la etela ovanhu aveshe.

5. She likolelela kOmbibeli, Jehova oku li shili oukwatya ulipi, nomolwashike?

⁵ Kungaha, momaukwatya aeshe aKalunga, ohole oyo ya tongomana unenenene. Oyo onghedi ile onghalo yaye. Nonande ounongo, ouyuki neenghono oku li omaukwatya a fimana, Ombibeli inai popya nande Jehova e li shimwe shomuyo. Ndele oye mu popya e li ohole. Heeno, Jehova oye shili ohole. Ohole oyo otai wilikwa komafinamhango ndele hakomaliudo. Ohole yaKalunga ohai pangelwa komafinamhango oshili nouyuki. Oyo oludi lohole la shiya ko ngaashi ya ulikwa kuJehova Kalunga mwene. Ohole ya tya ngaho oi li euliko lokuhelihola mwene nohai kwatakanifwa alushe noilonga oyo tai ulike oumbangi wohole ya tya ngaho.

6. Oshike tashi shi ningi tashi shiiva okuhopaenena Kalunga nonande oku tu dule kokule neenghono?

⁶ Oukwatya mukumwifi wohole oo tau tu dulifa tu hopaenene Kalunga a tya ngaho. Tu li ovanhu vongaho, inava wanenena nohava ningi omapuko, otashi dulika tu diladile kutya itatu dulu nande oku shi ninga nomupondo. Ndele oshihopaenenwa shimwe shohole yaJehova inene osho eshi: Okwa dimina omangabeko etu noihe tu pula tu ninge oinima monghedi ya wanenena. Oku shi shii kutya otu li kokule nokukala twa wanenena. (Epsalme 51:7) Omolwaasho Epsalme 130:3, 4 tali ti: “Omwene, ngenge to konenene omawii, Omwene, olyelye ta kala po? Ndelenee puove ope nekufilo.” Heeno, Jehova oku li “Kalunga, omunefilonghenda, Kalunga omunanghenda, omunanheni, nomunene mouwanghenda.” (Exodus 34:6) “Omwene, Ove u nonghedi iwa, u yadi ekufilo.” (Epsalme 86:5) Itashi hekeleke tuu! Itashi tulumukifa tuu okulongela Kalunga mukumwifi oo, nokumona efiloshisho laye lopahole nolopanghenda!

7. Ongahelipi ohole yaJehova tai dulu okulimonikila moilonga yaye yeshito?

⁷ Ohole yaJehova otai dulu yo okulimonikila moilonga yaye yeshito. Diladila koinima ihapu iwa oyo Jehova e tu pa opo tu i hafele, oinima tai monika nawa ngaashi eemhunda, eefuka, omatale nosho yo omafuta. Okwe tu pa yo eendja pamaludi mahapu makumwifi opo tu hafele omulyo noi tu kaleke nomwenyo. Natango, Jehova okwa yandja eengala hadi monika nawa nohadi nyika nawa domaludi e lili noku lili nosho yo eshito loinamwenyo tali kumwifa. Okwa ninga oinima oyo opo a hafife ovanhu nonande ka li a pumbwa oku i ninga. Doshili, okukala mounyuni ou woukolokoshi monghalo yetu yopaife yokuhawanenena, itatu dulu okuhafela eshito laye pauyadi. (Ovaroma 8:22) Ndele diladila ashike kwaasho Jehova te ke tu ningila mOparadisa! Omupsalme ote tu shilipaleke ta ti: “Oto kamutulula eke loye ndee to palula oinamwenyo aishe kohokwe yoye.”—Epsalme 145:16.

8. Oshihopaenenwa sha denga mbada shohole yaJehova yoku tu hola oshilipi?

⁸ Oshihopaenenwa shohole yaJehova yokuhola ovanhu sha denga mbada oshilipi? Ombibeli otai yelifa tai ti: “Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” (Johannes 3:16) Mbela Jehova okwa ninga ngaho molwouwa oo wa longwa kovanhu? Ovaroma 5:8 otava nyamukula tava ti: “Kalunga okwe tu hololela ohole yaye oku tu hola, Kristus eshi e tu fila fimbo twa li natango ovalunde.” Heeno, Kalunga okwa tuma Omona waye a wanenena kedu a yandje omwenyo waye u li ekuliloyambo opo e tu kulile ketokolo loulunde nefyo. (Mateus 20:28) Osho osha yeululila ovanhu ovo ve hole Kalunga ondjila yokumona omwenyo waalushe. Oshi shii okupandulwa eshi ohole yaKalunga ya ulikilwa aveshe ovo va hala okulonga ehalo laye, omolwaashi Ombibeli otai tu lombwele tai ti: “Kalunga iha tale omunhu kombada. Ndele moshiwana keshe, keshe ou he mu tila ndee ta diinine ouyuki, ote mu wapalele.”—Oilonga 10:34, 35.

9. Otu na okunwefwa mo ngahelipi koushili oo kutya Jehova okwe tu pa Omona waye e li ekulilo oku tu kulila?

⁹ Ongahelipi oushili oo kutya Jehova okwa yandja Omona e li oikulila oku tu kulila, opo e tu yeululile ondjila yokumona omwenyo waalushe, u na okunwefa mo nghee hatu longifa okukalamwenyo kwetu paife? Ou na okuninga ohole yetu yokuhola Kalunga kashili, Jehova, i kale yomoule. Pefimbo opo tuu opo, ou na oku tu ningifa tu kale twa hala okupwilikina kuJesus, oo e lile po Kalunga. “[Jesus] okwa fya ponhele yaaveshe, opo ovo ve nomwenyo ve he likalele vali vo vene, ndelenee Oye tuu ou e va fila.” (2 Ovakorinto 5:15) Kashi hafifa tuu okushikula moshikoti shaJesus, molwaashi okwa li e li oshihopaenenwa mokuhopaenena ohole nolukeno laJehova! Osho otashi limonikila mwaasho Jesus a lombwela ovalininipiki a ti: “Ileni kuame, nye amushe hamu longo nomwa lolokifwa, Ame ohandi mu pe etulumuko. Litwikeni ondjoko yange nye mu lilonge kuame, osheshi Aame omunambili momutima onde lininipika; ndee tamu limonene eemwenyo deni etulumuko. Osheshi ondjoko yange iwa nomutengi wange omupu.”—Mateus 11:28-30.

Nghee hatu dulu okuulikila vamwe ohole

10. Eenghedi dimwe dilipi omo hatu dulu okuulikila Ovakriste vakwetu ohole?

¹⁰ Ongahelipi hatu dulu okuulika kutya otu hole Ovakriste vakwetu nohole yoludi olo Jehova naJesus ve tu hole nayo? Didilika eenghedi dihapu omo hatu dulu okuninga ngaho: “Ohole i noutalanheni, ohole i nolukeno; ohole ihai fi efupa, ihai litange, ihai fulalala, ihai holoka nai, ihai kongo shayo vene, ihai kenyanana, ihai dimbulukwa owii ye u ningilwa, ihai nyakukilwa osho inashi yuka, ndele ohai nyakukilwa pamwe noshili; ohai tuvike aishe nohai itavele aishe, ohai teelele aishe, hai lididimikile aishe. Ohole ihai xulu po nande.”—1 Ovakorinto 13:4-8; 1 Johannes 3:14-18; 4:7-12.

11. Oolyelye vali tu na okukala tu hole, nongahelipi?

¹¹ Oolyelye vali tu na okukala tu hole, nongahelipi? Jesus okwa ti: “Indeni hano ka ningeni ovanhu aveshe ovalongwa vange, noku va [ninginifa, NW ] medina laXe nolOmona nolOmhepo Iyapuki, noku va longa okudiinina aishe ei nde i mu lombwela.” (Mateus 28:19, 20) Osho osha kwatela mo okulombwela vamwe ovo ve he fi natango Ovakriste vakwetu onghundana iwa i na sha nounyuni mupe waKalunga woparadisa oo tau uya. Jesus okwa ulika sha yela kutya ohole yetu kai na okungabekelwa ovaitaveli vakwetu, omolwaashi okwa ti: “Osheshi ngenge mu hole [ashike] ava, ve mu hole, omu noku ka pewa ondjabi yashike? Novafutifi ihave shi ningi yo? Ndele ngenge hamu popifa vakweni aveke, mu shii hamu ningi oshinima [shinene]? Novapaani ihave shi ningi yo?”—Mateus 5:46, 47; 24:14; Ovagalati 6:10.

‘Kala nokweenda medina laJehova’

12. Omolwashike edina laKalunga tali wapala ashike okuyukifa kuye?

¹² Oshitukulwa shimwe vali sha fimana shokufimaneka Kalunga kashili osho okushiiva edina laye le likalekelwa, Jehova, noku li longifa nosho yo okulihonga vamwe. Ohamba David oya popya eendjovo edi tadi di komutima ya ti: “Hambeleleni Jehova! Ifaneni pombada edina laye! Oilonga yaye i hokololeni novanhu!” (1 Omafimbo 16:8, OB-1954) Edina Jehova otali ti “Oha ningifa.” Oye Omunamalalakano Munene, ha wanifa alushe omalalakano aye nomupondo. Kalunga kashili oye aeke ta dulu okukala nedina olo, molwaashi ovanhu itava dulu nandenande okukala noushili kutya eenghendabala davo otadi ka pondola. (Jakob 4:13, 14) Jehova oye aeke ta dulu okutya kutya ondjovo yaye ‘otai wanifa’ osho e i tumina. (Jesaja 55:11) Vahapu ohava kala va kumwa ngeenge tava mono oshikando shotete edina laKalunga mEembibeli davo nokulihonga eityo lalo. (Exodus 15:3, OB-1954) Ndelenee otava mono ashike ouwa meshiivo olo ngeenge ova kala ‘nokweenda medina laJehova fiyo alushe.’—Mika 4:5, yelekanifa NW.

13. Oshike sha kwatelwa mo mokushiiva edina laJehova nokweenda medina laye?

¹³ Shi na sha nedina laKalunga, Epsalme 9:11 otali ti: “Ava va shiiva edina loye, otave ku lineekele.” Osho osha kwatela mo shihapu shi he fi ashike okushiiva edina Jehova, osho itashi ti okulineekela muye ngahenya. Okushiiva edina laKalunga otashi ti okuuda ko kutya Jehova oKalunga koludi lilipi, okufimaneka eenghonopangelo daye, okudulika komalombwelo aye noku mu lineekela moinima aishe. (Omayeletumbulo 3:5, 6) Sha faafana, okweenda medina laJehova otashi ti oku mu liyapulila noku mu kalela po tu li ovalongeli vaye, hatu longifa shili okukalamwenyo kwetu metwokumwe nehalo laye. (Lukas 10:27) Mbela osho to ningi?

14. Ngeenge otwa hala okulongela Jehova fiyo alushe, oshike twa pumbwa kakele kokukala tu udite kutya oshi li oshinakuwanifwa shetu?

¹⁴ Ngeenge otwa hala okulongela Jehova fiyo alushe, katu na okulinyengifwa ashike keliudo kutya oshi li oshinakuwanifwa shetu. Omuyapostoli Paulus okwa kumaida Timoteus, oo kwa li a longela Jehova oule womido dihapu, a ti: “Ove lideula metilokalunga.” (1 Timoteus 4:7) ‘Etilokalunga’ otali ulike kefimaneko linene okufimaneka Jehova ye mwene. Otali ulike kokukala u mu hole neenghono omolwoku mu tumbaleka unene nosho yo eendjila daye. Ohali tu linyengifa tu kale twa hala keshe umwe a tumbaleke edina laye. Otu na okukulika etilokalunga mokukalamwenyo kwetu ngeenge otwa hala okweenda fiyo alushe medina laJehova, Kalunga aeke kashili.—Epsalme 37:4; 2 Petrus 3:11.

15. Ongahelipi hatu dulu okuliyandjela Kalunga oye aeke?

¹⁵ Opo tu longele Kalunga tashi tambulwa ko, otu na oku mu longela oye aeke, molwaashi ye oku li ‘Kalunga omuladi,’ sha hala okutya, ota pula okuliyandjelwa oye aeke. (Exodus 20:5) Itatu dulu okukala tu hole Kalunga nopefimbo opo tuu opo otu hole ounyuni ou mwii, oo Satana e li kalunga kao. (Jakob 4:4; 1 Johannes 2:15-17) Jehova oku shii nawa kutya keshe umwe womufye ota kendabala okukala omunhu woludi lilipi. (Jeremia 17:10) Ngeenge otu hole shili ouyuki, oku shi wete note ke tu kwafela tu lididimikile omayeleko etu akeshe efiku. Moku tu yambidida nomhepo iyapuki yaye i na eenghono, ote ke tu kwafela tu finde oukolokoshi oo u yadi mounyuni ou. (2 Ovakorinto 4:7) Ote ke tu kwafela tu kaleke eteelelo letu lomwenyo waalushe meduparadisa la kola. Kali fi tuu etimaumbwile likumwifi! Otu na oku li pandula unene nokulongela Kalunga kashili, Jehova, nehalo liwa, oo e li ninga tali shiiva.

16. Oshike osho u na okukala wa hala okuninga pamwe nomamiliyona ovanhu amwe?

¹⁶ Ovanhu omamiliyona kedu alishe ova tambula ko nehafo eshivo lomupsalme oo a shanga a ti: “Hambeleleni Omwene pamwe naame; fye atusheni tu panduleni edina laye.” (Epsalme 34:4) Jehova ote ku shivi u kale mokati komangafifi ovanhu taa hapupala omoiwana aishe oo taa ningi ngaho.

Eenghundafana dokweendulula

• Jehova omunhu woludi la tya ngahelipi? Ongahelipi hatu mono ouwa mokuuda ko nawa omaukwatya aye?

• Ongahelipi hatu dulu okukwafela ovanhu vamwe opo ve lihonge oshili kombinga yaKalunga?

• Oshike sha kwatelwa mo mokushiiva edina laJehova nokweenda medina laye?

[Omafano e li pepandja 14]

Mohole yaye inene, Jehova ‘ota kamutulula eke laye ndele ta palula oinamwenyo aishe kohokwe yaye’