ETUKULWA 37
Nandi ninginifwe ngoo?
Nyamukula omatumbulo taa shikula kutya heeno, ile ahowe:
Eninginifo oli li oshiteelelwa kOvakriste.
□ Heeno
□ Ahowe
Elalakano la fimanenena li na sha nokuninginifwa oku ku amena uha nyone.
□ Heeno
□ Ahowe
Eninginifo otali ku kwafele, opo u ka xupifwe.
□ Heeno
□ Ahowe
Ngeenge ino ninginifwa, ito ke lihokolola kuKalunga omolweenghatu doye.
□ Heeno
□ Ahowe
Ngeenge ookaume koye otava ninginifwa, osha hala okutya naave owe lilongekida okuninginifwa.
□ Heeno
□ Ahowe
NGEENGE oho kala metwokumwe nomifikamhango daKalunga, ho kulike ekwatafano lopofingo naye noho lombwele vamwe shi na sha neitavelo loye, oshi li paushitwe okudiladila kombinga yeninginifo. Ndele mbela oho shi mono ngahelipi kutya owa wana okuninginifwa? Opo tu nyamukule epulo olo, natu ka kundafaneni omatumbulo oo e na heeno, ile ahowe, oo a tumbulwa metetekelo.
● Eninginifo oli li oshiteelelwa kOvakriste.
Heeno. Jesus okwa lombwela ovahongwa vaye va ninginifwe. (Mateus 28:19, 20) Jesus okwa ninginifwa nehalo liwa. Opo u shikule Kristus, owa pumbwa okuninginifwa, ngeenge owa kulu to dulu okuninga etokolo olo kwoove mwene, nowa halelela shili okuninga ngaho.
● Elalakano la fimanenena li na sha nokuninginifwa, oku ku amena uha nyone.
Ahowe. Eninginifo oli li edidiliko lomoipafi kutya owe liyapulila Jehova. Eliyapulo loye itali ku amene uha ninge oinima oyo u hole okuninga meholeko. Ndele onghalamwenyo yoye owe i yapulila Jehova, molwaashi owa hala okukala metwokumwe nomifikamhango daye.
● Eninginifo otali ku kwafele, opo u ka xupifwe.
Ahowe. Ombiibeli oya popya kutya eninginifo oli li onghatu ya fimana, opo tu ka xupifwe. (1 Petrus 3:21) Ashike osho inashi hala kutya eninginifo ola fa ehangano lekwashilipaleko, olo u na okufuta, opo li ke ku kwafele ngeenge pa holoka oudjuu. Ou na okuninginifwa, molwaashi ou hole Jehova nowa hala oku mu longela nomutima woye aushe fiyo alushe. — Markus 12:29, 30.
● Ngeenge ino ninginifwa, ito ke lihokolola kuKalunga omolweenghatu doye.
Ahowe. Jakob 4:17 okwa ti: “Ngeenge ope na ou e shii okulonga ouwa, ndele ite u longo, ota nyono,” kashi na nee mbudi kutya okwa ninginifwa, ile hasho. Onghee hano, ngeenge ou shii osho sha yuka nowa kula to dulu okudiladila konghalamwenyo yoye wa mana mo, otashi dulika eli olo efimbo olo wa pumbwa okukundafana oshinima osho nomudali woye, ile nOmukriste umwe a pyokoka. Kungaho, oto dulu okulihonga nghee u na okuninga exumokomesho fiyo wa wana okuninginifwa.
● Ngeenge ookaume koye otava ninginifwa, osha hala okutya naave owe lilongekida okuninginifwa.
Ahowe. Ou na okuninga etokolo lokuninginifwa to shi ningi nehalo liwa. (Epsalme 110:3) Ou na ashike okuninginifwa ngeenge owa shiiva filufilu osho sha kwatelwa mo mokukala Ondombwedi yaJehova nosho yo ngeenge owa kala u na oushili kutya oto ka wanifa po oshinakuwanifwa eshi. — Omuudifi 5:4, 5.
Eninginifo ohali lundulula onghalamwenyo yoye
Eninginifo oli li onghatu oyo hai lundulula onghalamwenyo yomunhu, nohali kwafele omunhu a ka mone omanangeko noupuna mahapu. Pefimbo opo tuu opo, eninginifo ola kwatela mo yo oinakuwanifwa ya kwata moiti i na sha nokukala metwokumwe neliyapulo loye, etokolo lopaumwene olo wa lombwela Jehova.
Mbela owe lilongekida okuliyapulila Jehova? Ngeenge osho, ou na etomheno liwa lokukala wa hafa. Amushe omwa teelela oufembanghenda wa fimanenena u na sha nokulongela Jehova nomutima aushe nokukala metwokumwe nonghedi oyo tai ulike kutya owe mu liyapulila shili. — Mateus 22:36, 37.
METUKULWA TALI SHIKULA KO
Lihonga nghee u na okulitulila po omalalakano, oo tae ku kwafele u kale u na onghalamwenyo i na eityo.
OMUSHANGWA WENENEDILADILO
“Yandjeni omalutu eni onga eyambo liyapuki, li na omwenyo nola hokiwa kuKalunga, eshi tamu mu longele oilonga iyapuki nokukala tamu diladila pandunge.” — Ovaroma 12:1.
[Ouyelele u li pepandja 306]
Holly okwa ti: “Okushiiva kutya onda ninginifwa osha kwafela nge ndi ninge omatokolo opandunge nokuhenuka okukatuka eenghatu odo tadi etele nge oilanduliko ii.”
[Efano pepandja 310]
Ngaashi ohombo, eninginifo oli li onghatu oyo hai lundulula onghalamwenyo, ka li na okukwatwa okahetengi