Omolwashike u na okutwikila okulihonga shihapu?

1. Ouwa ulipi to ka mona ngeenge owa twikile okukonakona Ombibeli?

Nopehe na omalimbililo, omahovelohongo Ombibeli oo we lihonga okwa pameka ohole yoye yokuhola Jehova. Ndele ohole ya tya ngaho oya pumbwa okukulikwa alushe. (1 Petrus 2:2) Eteelelo loye lomwenyo waalushe ole likolelela kokutwikila kwoye okweehena popepi naKalunga okupitila mokukonakona Eendjovo daye. — Lesha Johannes 17:3; Judas 21.

Eitavelo loye otali ka kala la kola eshi eshiivo loye lokushiiva Kalunga tali ende tali hapupala. Otali ke ku kwafela u hafife Kalunga. (Ovaheberi 11:1, 6) Otali ke ku linyengifa yo u lialuluke nokuninga omalunduluko monghalamwenyo yoye oo tae ke ku etela ouwa. — Lesha Oilonga 3:19.

2. Ongahelipi eshiivo loye lokushiiva Kalunga tali dulu okweetela vamwe ouwa?

Oshi li paushitwe okukala twa hala okulombwela vamwe kombinga yaasho twe lihonga, nohatu kala twa hafa ngeenge hatu popi kombinga yonghundana iwa. Eshi to twikile okukonakona Ombibeli, oto ka shiiva nghee to dulu okulongifa Ombibeli opo u yelifile vamwe kombinga yeitavelo loye muJehova nosho yo yonghundana iwa. — Lesha Ovaroma 10:13-15.

Ovanhu vahapu ohava hovele okulombwela ookaume kavo nosho yo ovapambele vavo kombinga yonghundana iwa. Ndele ngeenge to shi ningi, kala ho shi ningi nelungi. Ponhele yokulombwela ovanhu kutya elongelokalunga lavo ola puka, va lombwela kombinga yomaudaneko aKalunga. Dimbuluka yo kutya luhapu ovanhu ohava kumwa kelihumbato letu liwa shi dulife kwaasho hatu popi. — Lesha 2 Timoteus 2:24, 25.

3. Oto dulu okukala u na ekwatafano la tya ngahelipi naKalunga?

Okukonakona Eendjovo daKalunga otaku ke ku kwafela u kule pamhepo. Xuuninwa, oto ka kala u na ekwatafano le likalekelwa naJehova. Onghee hano, oto dulu okuninga oshilyo shoukwaneumbo waye. — Lesha 2 Ovakorinto 6:18.

4. Oshike tashi dulu oku ku kwafela u twikile okuninga exumokomesho?

Oto dulu okuninga exumokomesho lopamhepo ngeenge owa twikile okukonakona Eendjovo daKalunga. (Ovaheberi 5:13, 14) Omolwashike ito pula umwe womEendombwedi daJehova a konakone naave Ombibeli tamu longifa embo Ombibeli otai hongo lela shike? Apa ngoo pe fike okukonakona kwoye Eendjovo daKalunga, opo ngoo tapa ka kala pe fike okupondola kwoye monghalamwenyo. — Lesha Epsalme 1:1-3; 73:27, 28.

MOmbibeli omu na ‘onghundana iwa ya dja kuKalunga omunelao.’ (1 Timoteus 1:11, NW) Oto dulu okweehena popepi elela naKalunga mokukala ho endafana noshiwana shaye. (Ovaheberi 10:24, 25) Oto ka kala yo u na eteelelo lomwenyo waalushe ngeenge owa twikile okuninga eenghendabala u hafife Jehova. Okweehena popepi naJehova oku li shili oshinima sha denga mbada osho to dulu okuninga. — Lesha 1 Timoteus 6:19.