Omatumwalaka avali a dja kuKalunga

Otu na okutala ko Ombiibeli i li etumwalaka la dja kuKalunga. Tate yetu womeulu okwe i tu pa opo i tu wilike. Diladila komatumwalaka avali a fimanenena oo a li a yandjwa omido 2 000 da ka lupuka. Okwa li a yandjwa komweengeli wedina Gabriel, oo ha “kala alushe koshipala shaKalunga.” (Lukas 1:19) Onaini nopeni omweengeli a yandjela omatumwalaka avali a fimanenena?

Osha li omomudo 3 K.O.P. lwaapo. Etumwalaka lotete ola yandjelwa peni? Okeemhunda daJudea, osho tashi dulika sha li popepi naJerusalem, oko kwa li haku kala omupristeri waJehova, Sakaria. Sakaria nomukulukadi waye Elisabet, ova li va kulupa nokava li ve na ounona. Ola li olufo laSakaria lokulonga kotembeli e li omupristeli waKalunga, muJerusalem. Ofimbo Sakaria e li kotembeli, ombadilila Gabriel okwe mu holokela popepi noaltari yokutwimina omayambo.

Osho osha li sha tilifa Sakaria neenghono. Ashike omweengeli okwe mu lombwela aha mbadapale a ti: “Sakaria, ino tila molwaashi omailikano oye okwa udika kuKalunga. Omukulukadi woye Elisabet ote ke ku dalela okaana okamati, noto ke ka luka Johannes.” Gabriel okwa ti yo Johannes ota ka “ninga munene koshipala shaJehova” nota ka ‘longekidila Jehova oshiwana.’ — Lukas 1:13-17.

Sakaria ka li e shi itavela. Omolwashike mbela? Omolwaashi ye nomukulukadi waye Elisabet ova li va kulupa. Onghee Gabriel okwe mu lombwela a ti: “Ito ka dula okupopya fiyo osheshi oinima oyo ya ningwa, molwaashi ino itavela eendjovo dange.” — Lukas 1:20.

Efimbo alishe olo, ovanhu ova kala tave lipula kutya omolwashike Sakaria a kala mo efimbo lile meni. Nohauxuuninwa okwa ka dja mo, ashike ka li ta popi. Sakaria okwa li ashike ta udike nomake aye. Osho oshi li oumbangi kutya okwa li a mona oshinima osho shi na eenghono di dule dopaushitwe eshi a li motembeli.

Konima eshi olufo laSakaria lokulonga motembeli la pwa ko, okwa li a shuna keumbo laye. Diva konima yaasho, Elisabet okwa ninga oufimba. Eshi a li a teelela okumona okaana, okwa kala iha di mo meumbo oule weemwedi nhano.

Opo nee Gabriel okwe ke uya oshikando oshitivali. Okwa li e uya kulyelye? Okokakadona kedina Maria, oko ka li haka di moshilando shi li kolundume laJerusalem, Nasaret, shomuGalilea. Omweengeli okwa li a lombwela Maria shike? Okwa ti: “Kalunga okwe ku fila onghenda.” Okwa li vali e mu lombwela a ti: “Tala, oto ka ninga oufimba ndele to ka dala okaana kokamati, nou na oku ka luka Jesus.” Natango Gabriel okwa weda ko a ti: “Ndele ota ka kala a tumbala nota ka ifanwa Omona wOmukombadambada, . . . Ota ka pangela e li Ohamba mepata laJakob fiyo alushe, nOuhamba waye itau ka xula po.” — Lukas 1:30-33.

Gabriel okwa li e udite shi li oufembanghenda okutwala omatumwalaka oo avali. Eshi hatu twikile okulesha shihapu kombinga yaJohannes naJesus, ohatu ka mona kutya omolwashike omatumwalaka oo a dja meulu a li a fimanenena.