Eenhele dokwoongalela

OVALONGELI vaJehova vashili ova lombwelwa va kale hava ongala pamwe opo va hongwe nova twaafane omukumo. (Heb. 10:23-25) Ovaisrael ovo va li oshiwana shaKalunga oshihoololwa, ova li hava ongalele tete ‘metwali leongalo.’ (Ex. 39:32, 40) Lwanima, omonamati waDavid, Salomo, okwa li a tunga otembeli opo i fimanekife Kalunga. (1 Eeh. 9:3) Konima eshi otembeli oyo ya hanaunwa po mo 607 K.O.P., Ovajuda ova li va ninga elongekido opo va kale tava ongalele momatungo haa ifanwa eeshinagoga opo va longele Kalunga. Mokweendelako kwefimbo, otembeli oya li ya tungululwa noya li vali ya ninga ondingandinga yelongelokalunga lashili. Jesus okwa li ha hongo ovanhu meeshinagoga nomotembeli. (Luk. 4:16; Joh. 18:20) Okwa li yo a ningila okwoongala komhunda. — Mat. 5:1–7:29.

² Konima yefyo laJesus, Ovakriste ova li hava ongalele meenhele daaveshe nosho yo momaumbo avo opo ve lihonge Omishangwa nokuhafela eendafano novaitaveli vakwao. (Oil. 19:8, 9; Rom. 16:3, 5; Kol. 4:15; Filem. 2) Omafimbo amwe, Ovakriste vonale ova li hava kala va pumbwa okwoongalela meenhele de likalela opo vaha monike kovapataneki. Oshoshili kutya ovapiya vaKalunga ovadiinini vopefimbo lonale ova li hava kala va halelela okwoongalela meenhele delongelokalunga opo va ‘longwe kOmwene.’ — Jes. 54:13.

³ Nokunena Ovakriste ohava ongalele meenhele daaveshe nosho yo momaumbo avo. Luhapu momaumbo ohamu ningilwa elongekido loilonga yomomapya. Ovo hava yandje omaumbo avo a ningilwe oinima yopamhepo ohave shi tale ko shi li oufembanghenda. Vahapu ova mona ouwa pamhepo eshi va yandja omaumbo avo a ningilwe oinima yopamhepo.

OLUPALE LOUHAMBA

⁴ Eendombwedi daJehova ohadi ongalele unene monhele hai ifanwa Olupale lOuhamba. Luhapu ohaku landwa onhele ndele taku tungwa Olupale lOuhamba lipe, ile ku wapekululwe etungo lonhumba olo la kala po nale. Opo ku xupifwe oshimaliwa nokulongifa nawa omatungo etu, omaongalo onhumba otaa dulu okukala haa longifa Olupale lOuhamba limwe ngeenge otashi shiiva. Moitukulwa imwe, ohamu hiilwa eenhele dokwoongalela. Omalupale Ouhamba oo mape nosho yo oo a tungululwa ile a tamununwa mo ohaa yapulwa. Ndele ngeenge Olupale lOuhamba ola wapekululwa ashike oinima inini, inali pumbwa vali okuyapulwa.

⁵ Olupale lOuhamba ka li na okukala etungo londilo la tungwa nelalakano lokufuula vamwe. Nonande omitungilo dao otashi dulika di kale da yoolokafana she likolelela keenhele, ohaa wanifa po elalakano limwe. (Oil. 17:24) Oli na okukala li li monghalo iwa notali wapalele okuningilwa okwoongala kwopaKriste, she likolelela keenghalo domoshitukulwa.

⁶ Omaongalo aeshe Eendombwedi daJehova ohaa yandje omayambidido e na sha nokulongifa Olupale lOuhamba nosho yo okulikaleka monghalo iwa. Ihapa umbwa ongalo, novanhu ihava pulwa va yandje oimaliwa. Omu na okakefa komayambidido opo ovo have uya kokwoongala va yandje omayambidido opo ku dulwe okufutwa oifutomwa oyo hai longifwa molupale. Ohave shi ningi nehalo liwa notashi di komutima. — 2 Kor. 9:7.

⁷ Keshe umwe meongalo ohe shi tale ko shi li oufembanghenda okuyambidida Olupale lOuhamba pashimaliwa nokuliyamba opo a kaleke Olupale la yela noli li monghalo iwa. Omukulunhuongalo ile omuyakuliongalo wonhumba oha pewa oshinakuwanifwa shokuninga elandulafano lokuwapaleka. Okuwapaleka olupale ohaku ningwa she likolelela keengudu doilonga yomomapya, nongudu keshe ohai kwatelwa komesho komupashukili wayo ile komuponhele waye. Olupale lOuhamba oli na okukala tali fimanekifa Jehova nehangano laye meni nokombada.

⁸ Ovakulunhuongalo vomomaongalo oo haa longifa olupale limwe ohaa toto po Okomitiye yOkufila Oshisho Olupale lOuhamba, oyo hai unganeke oinima i na sha nokutunga nosho yo onhele. Olutu lovakulunhuongalo ohali hoolola omumwatate umwe a kale omuunganeki wokomitiye yokufila oshisho Olupale lOuhamba. Okomitiye oyo ohai longo koshi yewiliko lolutu lovakulunhuongalo eshi tai pashukile okuwapalekwa kwolupale, nohai shilipaleke kutya olupale alishe oli li monghalo iwa nonokutya ope na oikwanoipangifo aishe oyo ya pumbiwa. Omaongalo aeshe oo a kwatelwa mo oku na okulongela kumwe.

⁹ Omaongalo oo haa longifa Olupale lOuhamba limwe otaa dulu okuninga omalufo omudo keshe shi na sha nomafimbo okwoongala. Ovakulunhuongalo ove na okukundafana kombinga yefimbo ve na omhepo yelongelokumwe nohole youmwainafana. (Fil. 2:2-4; 1 Pet. 3:8) Kape na eongalo li na oufemba wokutokolela ko omaongalo makwao shi na sha nefimbo. Ngeenge omupashukilishikandjo ta talele po eongalo limwe lomomaongalo oo haa longifa Olupale lOuhamba limwe, omaongalo makwao ohaa lundulula efimbo lao li na sha nokwoongala kwoshivike osho ngeenge osha pumbiwa.

¹⁰ MOlupale lOuhamba otamu dulu okuningilwa omahombolo nosho yo oipopiwa yomapako ngeenge osha diminwa kOkomitiye yOilonga yEongalo. Ovakulunhuongalo ovo ohava konakona noukeka oiteelelwa nokuninga omatokolo e likolelela kewiliko olo la dja koshitaimbelewa.

¹¹ Ovo va pewa epitikilo va longife Olupale lOuhamba ova teelelwa ve lihumbate monghedi oyo tai wapalele Ovakriste vashili. MOlupale lOuhamba kamu na okuningwa oinima oyo tai dulu okupundukifa eongalo ile i shekife edina laJehova nosho yo edina liwa leongalo. (Fil. 2:14, 15) Koshi yewiliko loshitaimbelewa, Olupale lOuhamba otali dulu okulongifwa omolwoinima imwe yopamhepo, ngaashi Ofikola yOukalele wOuhamba nosho yo Ofikola yOkudeula Ovakokolindjila.

¹² Eongalo oli na okukala alushe la fimaneka onhele yalo yokwoongalela. Omidjalo, okuliwapeka nosho yo elihumbato letu oli na okukala metwokumwe nelongelokalunga laJehova la koshoka. (Omuud. 5:1; 1 Tim. 2:9, 10) Ngeenge otwa tula moilonga omayele e na sha naasho, ohatu ka ulika kutya otu na olupandu li na sha nokwoongala kwetu kwopaKriste.

¹³ Osha fimana okukaleka po elandulafano pefimbo lokwoongala. Ounona ova teelelwa va kale hava kala omutumba pamwe novadali vavo. Ovadali ovo ve na ounona vanini otava dulu okuladipikwa va kale hava kala omutumba ponhele opo itava dulu okupiyaaneka vamwe ngeenge va pumbwa okutwala ounona vavo pondje ve ke va pe outekuduliko ile ve va file oshisho.

¹⁴ Ohapa tulwa ovamwatate ovo va wana va ninge ovayakuli pokwoongala mOlupale lOuhamba. Ove na okukala va vendjavendja, ve na omhepo youkaume nohava longifa eendunge dokuyoolola. Oinakuwanifwa yavo oya kwatela mo okupopifa ovo vape pokwoongala noku va tambula ko, okukwafela ovo ve uya va lata va mone eenhele dokukala omutumba, okuvalula ovo ve uya kokwoongala nosho yo okuyandja elitulemo koikwamashina yokupupyaleka nokutalaleka molupale. Ngeenge osha pumbiwa, ovayakuli ohava dimbulukifa ovadali va pashukile nawa ounona vavo opo vaha kale tava tondoka komesho nokonima yokwoongala ile va danauke komutune. Ovayakuli otava dulu okupula nombili nonelungi omudali oo e na okaana haka piyaana e ka twale pondje opo kaha piyaaneke unene ovapwilikini. Oilonga yovayakuli ohai kwafele aveshe va hafele okwoongala. Oshiwa okutula po ovakulunhuongalo nosho yo ovayakuliongalo ovo va kale ovayakuli.

OKUTUNGWA KWOMALUPALE OUHAMBA

¹⁵ Mefelemudo lotete, Ovakriste vamwe ova li va hepuluka ve dule vakwao, nomolwaasho omuyapostoli Paulus a shanga a ti: “Napa kale efaafano, oupuna weni u kwafe oluhepo lavo, ndelenee opo oupuna wavo u yakule oluhepo leni, pu kale ngaha efaafano.” (2 Kor. 8:14) Nokunena ope na “efaafano” la tya ngaho. Oimaliwa oyo hai yambididwa komaongalo mounyuni aushe ohai tulwa kumwe opo ku kwafelwe pashimaliwa okutungwa nokuwapekululwa kwOmalupale Ouhamba. Omayambidido ehalo liwa oo haa yandjwa koumwainafana womounyuni aushe ohaa pandulwa neenghono kehangano nosho yo komaongalo oo haa mono ouwa omolwomayambidido oo.

¹⁶ Oitaimbelewa ohai ufa kutya omaongalo naa kale taa longifa Omalupale Ouhamba elipi kondadalunde, she likolelela koitukulwa omo omaongalo e li. Oshitaimbelewa ohashi tokola yo kutya onaini nopeni tapa dulu okutungwa Omalupale Ouhamba ile ku wapekululwe omalupale oo e li po nale moshitukulwa shoshitaimbelewa. Ngeenge opa holoka oiponga yopaushitwe, ohapa ningwa omalongekido opo ku wapekululwe Omalupale Ouhamba, nomafimbo amwe, omaumbo ovamwatate.

¹⁷ Oshitaimbelewa ohashi unganeke ovaliyambi va ka kwafele shi na sha nokumona onhele, okuninga opulana yOlupale lOuhamba, epitikilo lokutunga, okutunga nokukaleka po omatungo. Molwaashi moilongo ihapu omu na omhumbwe inene yOmalupale Ouhamba, opa pumbwa ovaliyambi vahapu. Ovaudifi aveshe va ninginifwa ovo va wana nove na ehalo lokukwafela, otava ladipikwa va tule mo omaindilo noku a yandja kOkomitiye yOilonga yEongalo yeongalo lavo. Nokuli novaudifi ovo inava ninginifwa otava dulu okukwafela okutunga ile okuwapekulula Omalupale Ouhamba avo.

OMALUPALE OYOONGALELE

¹⁸ Ovakriste vopefimbo lonale ova li hava ongala unene meengudu dinini. Ashike omafimbo amwe ova li hava ongala “vahapu.” (Oil. 11:26) Sha faafana, oshiwana shaJehova kunena ohashi ongala momuvalu muhapu poyoongalele inini naayo yakula. Luhapu ohaku hiilwa eenhele omolwoyoongalele, ashike ngeenge kape na eenhele, ile eenhele odo tadi wapalele, otaku dulu okulandwa ile okutungwa Olupale lOyoongalele.

¹⁹ Omafimbo amwe ohaku landwa etungo lonhumba, tali wapekululwa nokulongifwa li li Olupale lOyoongalele. Ndele luhapu ohaku kongwa onhele, ndele tapa tungwa olupale. Omalupale Oyoongalele okwa yoolokafana mounene, she likolelela keemhumbwe domoshitukulwa. Oshitaimbelewa ohashi tokola okulanda ile okutunga konima ngeenge pa ningwa omakonakono noukeka kutya otashi pula oimaliwa i fike peni nosho yo kutya otali ka kala hali longifwa shi fike peni.

²⁰ Oshitaimbelewa ohashi nangeke po ovamwatate opo va pashukile nokukaleka monghalo iwa Omalupale Oyoongalele. Ohapa ningwa omalongekido opo oikandjo i kale tai wapaleke pandjikilile, luvali kodula nosho yo okukaleka omatungo monghalo iwa. Oshiwa ovamwatate va kale have liyambe omolwoilonga oyo. Nomolwaasho omaongalo otaa ladipikwa a yambidide omalongekido oo nomutima aushe. — Eps. 110:3; Mal. 1:10.

²¹ Omafimbo amwe, Omalupale Oyoongalele otaa dulu okulongifwa omolwoiningwanima yopamhepo imwe vali, ngaashi eefikola dOmbiibeli nosho yo okwoongala kwe likalekelwa kwovapashukilishikandjo. Ngaashi Omalupale Ouhamba, Omalupale Oyoongalele nao oku li eenhele delongelokalunga da yapulwa. Ngeenge twa ongala mOlupale lOyoongalele, elihumbato letu nosho yo okudjala nokuliwapeka kwetu oi na okukala i shii okufimanekwa, ngaashi ashike ngeenge twa ongala mOlupale lOuhamba tu longele Jehova.

²² Komuxundalili womafiku aa axuuninwa, ovanhu vahapu otava mbobolokele mehangano laJehova. Osho otashi ulike kutya Jehova okwe tu nangeka noupuna. (Jes. 60:8, 10, 11, 22) Nomolwaasho otwa hala okuyambidida omalongekido e na sha nokukonga eenhele delongelokalunga, oku di kaleka da koshoka nodi li monghalo iwa. Ngeenge otwa ningi ngaho, ohatu ulike olupandu letu li na sha nonghandangala oyo omatungo oo taa dana moku tu kwafela tu twaafane omukumo, unene tuu eshi tu wete efiku laJehova tali ehene popepi.