Jehova ta popi naSamuel

Omupristeri omukulunhu Eli okwa li e na ovanamati vavali ovo va li hava longo ve li ovapristeri ketwali. Omadina avo oHofni naPinehas. Kava li hava dulika keemhango daJehova, nova li hava ungaunga nai novanhu. Ngeenge Ovaisrael va li tava ka ningila Jehova omayambo, Hofni naPinehas ova li have likufile vo vene ombelela oyo iwa. Eli okwa li a uda osho ovana vaye hava ningi, ndele ka li a ninga po sha. Mbela Jehova okwa li ta ka efa oshinima osho shi twikile okuningwa?

Nonande Samuel okwa li omunyasha neenghono kuHofni naPinehas, kali e va hopaenena. Jehova okwa li a hokwa Samuel. Oufiku umwe fimbo Samuel a li a kofa, okwa li a uda ondaka tai mu ifana. Okwa li a penduka ndele ta tondoka tai kuEli ta ti: ‘Aame ou.’ Eli okwa li e mu nyamukula a ti: ‘Inandi ku ifana. Inda u ka kofe.’ Samuel okwa shuna ndele ta ka nangala. Opo nee okwa li a uda vali ondaka. Eshi Samuel a li a uda ondaka oshikando oshititatu, Eli okwa li a didilika kutya Jehova oye ta ifana Samuel. Okwa li a lombwela Samuel kutya ngeenge okwa udu vali ondaka oyo, na tye: ‘Jehova popya, omupiya woye ota pwilikine.’

Samuel okwa li a shuna a ka nangale, ndele ta udu ondaka tai ti: ‘Samuel! Samuel!’ Okwa li a nyamukula a ti: ‘Popya, omupiya woye ota pwilikine.’ Jehova okwa li e mu lombwela a ti: ‘Lombwela Eli kutya ohandi ke mu handukila pamwe noukwaneumbo waye. Oku shii kutya ovana vaye otava ningi oinima ii metwali lange, ndele ita ningi po sha.’ Ongula, Samuel okwa li a ka yeulula omivelo dokuya metwali ngaashi ha ningi shito. Ashike okwa li a tila okulombwela omupristeri omukulunhu osho Jehova e mu lombwela. Eli okwa li e mu ifana ndele te mu pula ta ti: ‘Mumati wange, Jehova okwe ku lombwela shike? Lombwele nge keshe shimwe.’ Opo nee Samuel okwa li a lombwela Eli keshe shimwe.

Eshi Samuel a li ta kulu, Jehova okwa li a twikila okukala pamwe naye. Ovaisrael aveshe moshilongo ova li ve shii kutya Jehova okwa hoolola Samuel a kale omuprofeti nomutokoli.