Ehololo laJohannes

Eshi omuyapostoli Johannes a li modolongo konhunhu yaPatmos, Jesus okwa li e mu ulikila omamoniko ile omafaneko a shikulafana e li 16 e na sha nonakwiiwa. Omamoniko oo okwa holola nghee edina laJehova la li tali ka yapulwa, nghee Ouhamba waye tau ke uya nosho yo nghee ehalo laye tali ka wanifwa kombada yedu ngaashi meulu.

Memoniko limwe, Johannes okwa mona Jehova e li koshipangelapundi shaye sha tumbala meulu, a dingililwa kovakulunhu 24 va djala oikutu itoka noikoloni yoshingoli komitwe davo. Koshipangelapundi osho okwa li taku di oushelu nomingungumo. Ovakulunhu 24 ova li va twa eengolo koshipala shaJehova tave mu longele. Memoniko limwe vali, Johannes okwa mona ongudu inene ya dja moiwana aishe, movanhu aveshe nomomalaka aeshe, tava longele Jehova. Jesus oo e li Odjona, okwa li te va lifa noku va twala komeva omwenyo. Lwanima, memoniko vali limwe, Jesus okwa li a hovela okupangela meulu e li Ohamba, pamwe novakulunhu 24. Memoniko olo la landula olo, Johannes okwa li a mona Jesus ta lwifa ongadu, sha hala okutya Satana neendemoni daye. Jesus okwe va ta mo meulu, ndele te va umbile kombada yedu.

Opo nee Johannes okwa li a mona emoniko liwa li na sha nOdjona pamwe 144 000 ve li ofika kOmhunda yaSion. Okwa li yo a mona omweengeli ta tuka kombada yedu alishe ta lombwele ovanhu va tile Kalunga nove mu fimaneke.

Memoniko limwe vali, oita yaHarmagedon oya li ya luwa. Pefimbo loita oyo, Jesus novakwaita vaye ova li va finda Satana nounyuni waye woukolokoshi. Memoniko laxuuninwa, Johannes okwa li a mona oinima aishe tai ende nawa meulu nokombada yedu. Satana noludalo laye ova hanaunwa po filufilu. Keshe umwe meulu nokombada yedu ota ka kala a yapula edina laJehova noku mu longela oye aeke.