OSHITWA 18

Okuyandja ouyelele oo tau kwafele ovapwilikini

1 Ovakorinto 9:19-23

ENGONGO: Kwafela ovapwilikini voye va yukife ouyelele kuvo vene, opo va dule okulihonga mo sha moshipopiwa shoye.

Diladila kombinga youyelele oo ovapwilikini voye ve shii u na sha noshikundafanwa osho. Ponhele yokweendulula ouyelele oo ovapwilikini voye ve shii nale, va kwafela va ude ko ouyelele mupe u na sha noshikundafanwa osho.

Popya to endelele ngeenge to popi oitwa oyo i shiivike kovapwilikini, ashike enda kashona eshi to popi ouyelele mupe.
Ninga omapekapeko nokudilonga. Ngeenge otashi shiiva, longifa ouyelele oo ovapwilikini tashi dulika inava uda nale ile oiningwanima yopefimbo letu opo u yelife oitwa oyo ya fimana. Diladila moule kombinga yoshikundafanwa shoye nokutala nghee sha pambafana nouyelele oo wa hala okuweda mo.

Eshi to konakona ouyelele oo, lipula omapulo ngaashi ‘oshike, omolwashike, onaini, olyelye nosho yo ongahelipi’ opo e ku kwafele u diladile moule. Oto dulu okumwenyopaleka oshipopiwa shoye mokupula omapulo nokunyamukula amwe omuo.
Ulika kutya ouyelele oo to yandje owa fimana. Yelifa nghee Omishangwa tadi dulu okukwafela ovapwilikini voye mokukalamwenyo kwavo. Popya kombinga yeenghalo, omikalo nosho yo eenghatu odo tadi wapalele ovapwilikini voye.