Otwa pumbwa ehangano laJehova
OWA uda nale umwe ta ti: “Onda itavela muKalunga ndele hamelongelokalunga la unganekwa”? Omataleko a fa oo ohaa ulikwa koohandimwe ovo kwa li hava i kongeleka ndele tava nyematekwa komalongelokalunga avo eshi oo a nyengwa okuwanifa po eemhumbwe davo dopamhepo. Nonande va nyematekwa komahangano omalongelokalunga, vahapu otava komangele kutya natango ova hala okulongela Kalunga. Ndelenee nande ongaho, vo ova itavela kutya oshixwepo oku mu longela panghedi yavo vene shi dule oku shi ninga mekwatafano nongeleka ile nehangano lonhumba.
Ombibeli otai ti ngahelipi? Mbela Kalunga okwa hala Ovakriste va kale mekwatafano nehangano lonhumba?
Ovakriste vonale ova li va mona ouwa mokukala va unganekwa
POpentekoste yo 33 O.P., Jehova okwa tilila omhepo yaye iyapuki, hakwaavo ashike ve likalela ve li ovaitaveli, ndele okongudu yovalumenhu novakainhu ovo va hangika va ongala “monhele imwe,” nokutya mondjuwo yopombada moshilando shaJerusalem. (Oilonga 2:1) Pefimbo olo, eongalo lopaKriste, olo la ninga ehangano lopaiwana, ola totwa. Ehangano olo ola ulika kutya ola li omanangeko noupuna ashili kovahongwa va tya ngaha votete. Omolwashike? Oshinima shotete, vo okwa li va pewa oshinakuwanifwa sha fimana—shokuudifa onghundana iwa yOuhamba waKalunga ‘mounyuni aushe.’ (Mateus 24:14) Meongalo ovalidilululi vape okwa li have lihongo okudja mowino wovaitaveli vakwao nghee vena okuya komesho noilonga yokuudifa.
Divadiva etumwalaka lOuhamba ola tandavela kokule la koyelela omakuma aJerusalem. Pokati ko 62 no 64 O.P., omuyapostoli Petrus okwa shangela onhumwafo yaye yotete kOvakriste ovo ve lihanena keembinga adishe ‘domuPontus nomuGalatia nomuKappadokia nomuAsia nomuBitinia,’ aishe ei oi li muTurkey shopefimbo lopaife. (1 Petrus 1:1) Opa li yo pe na vali ovaitaveli vakwao ovo va li muPalestina, Libanon, Siria, Kipros, Greka, Kreta nomuItalia. Ngaashi Paulus a shangela Ovakolossi mo 60-61 O.P., onghundana iwa oya “udifilwa ovashitwa aveshe vokoshi yeulu.”—Ovakolossi 1:23.
Ouwa utivali tau di mokweendafana nehangano oo omukumo oo Ovakriste hava twaafana. Mokweendafana neongalo, Ovakriste ohava pwilikine koipopiwa itunhula, ohava konakona Omishangwa Diyapuki pamwe, ohava tukulilafana oimoniwa yeitavelo tai pameke, nohave limbwange mumwe meilikano. (1 Ovakorinto, etukulwa 14) Ovalumenhu va pyokoka otava ‘lifa oufita waKalunga.’—1 Petrus 5:2.
Ve li oilyo yeongalo, Ovakriste ova kala ve liika nove holafane. Ponhele yokukala ve udite shi li omutengi okweendafana neongalo, Ovakriste votete ova li va tungwa nova pamekwa kokweendafana oku.—Oilonga 2:42; 14:27; 1 Ovakorinto 14:26; Ovakolossi 4:15, 16.
Etomenho limwe molwaashi eongalo ile ehangano la hangana mounyuni aushe la pumbiwa, olo okuxumifa komesho oukumwe. Ovakriste ove lihonga okukala ve “nondaka imwe.” (1 Ovakorinto 1:10) Eshi okwa li sha fimana unene. Oilyo yeongalo oya dja momahongo nomomaputuko omaulikumwe e lili naku lili. Ohava popi omalaka a yoolokafana, nove na omaukwatya e liwetikile a yoolokafana. (Oilonga 2:1-11) Omafimbo amwe, opa li omayooloko moinima yonhumba. Ndelenee, Ovakriste okwa li va kwafelwa opo va kandule po omayooloko a tya ngaha meongalo.—Oilonga 15:1, 2; Ovafilippi 4:2, 3.
Omapulo oo kwa li a kwata moiti noitaa dulu okupongololwa po kovakulunhuongalo vaapo okwa li haa tuminwa kovapashukili ovaendi va pyokoka, ngaashi Paulus. Oinima i na sha nomahongo a fimana okwa li hai tuminwa kolutuwiliki lopokati olo la kala muJerusalem. Olutuwiliki tete okwa la fikama po movayapostoli vaJesus Kristus nokonima ola ka tamununwa mo opo li kwatele mo ovakulunhuongalo vomeongalo lomuJerusalem. Eongalo keshe okwa li la dimina eenghonopangelo dolutuwiliki da yandjwa kuKalunga osho yo ovakalelipo valo okuunganeka oukalele, okunangeka ovalumenhu peendodo doilonga, nokuninga omatokolo moinima i na sha nomahongo. Ngeenge oshinima sha pongololwa po kolutuwiliki, omaongalo okwa tambula ko etokolo ‘nokuhafela ehekeleko eli.’—Oilonga 15:1, 2, 28, 30, 31.
Heeno, Jehova okwa li a longifa ehangano mefelemido lotete. Ndele ongahelipi kunena?
Kunena otwa pumbwa ehangano
Ngaashi oovakwao vomefelemido lotete, Eendombwedi daJehova kunena oshilonga shado shokuudifa onghundana iwa yOuhamba ode shi tala ko kutya osha kwata moiti. Onghedi imwe omo hadi wanifa po oshinakuwanifwa eshi omokutandaveleka Eembibeli nosho yo oileshomwa yokukwafa ekonakonombibeli, naashi otashi pula opo oinima i unganekwe nawa.
Oishangomwa yopaKriste oi na okukala ya longekidwa nawa, ya talwa nawa omolwomapuko, tai nyanyangidwa, opo nee tai tuminwa komaongalo. Kungaha, Ovakriste pauhandimwe ove na okuliyamba opo va twale oishangomwa kwaavo va hala oku i lesha. Monghedi ya tya ngaha etumwalaka lOuhamba ola hanga ovanhu omamiliyona. Ovaudifi vonghundana iwa ohava kendabala okuwanifa po oilonga yavo yokuudifa panghedi yelandulafano nokushilipaleka kutya kape na nande ombinga yoshitukulwa ya mbobolwa kokulongwa omanga eembinga dimwe da efelwa. Aishe ei otai pula opo oinima i unganekwe nawa.
Molwaashi “Kalunga iha tale omunhu kombada,” Eembibeli nosho yo oishangomwa ye likolelela kOmbibeli oi na okutolokwa. (Oilonga 10:34) Paife, oshifo eshi ohashi monika momalaka 132, naasho shoAwake! osho hashi endele pamwe naashi, ohashi nyanyangidwa momalaka 83. Eshi otashi pula eengudu da unganekwa nawa dovatoloki mounyuni aushe.
Oilyo yeongalo ohai mono etwomukumo okupitila mokukala pokwoongala kwopaKriste nosho yo poyoongalele. Pokwoongala ohava pwilikine koipopiwa yOmbibeli itunhula, ohava konakona Omishangwa pamwe, ohava tukulilafana oimoniwa tai tungu, nohave limbwange mumwe meilikano. Nongaashi ovamwaxe vomefelemido lotete, vo ohava hafele omatalelepo taa pameke eitavelo lavo oo haa ningwa kovapashukili ovaendi ovanahole. Kungaha, Ovakriste kunena ove li “oshiunda shimwe, nomufita umwe.”—Johannes 10:16.
Doshili, Eendombwedi daJehova inadi wanenena di dule dikwao odo dopetameko. Ndele nande ongaho, otadi longele kumwe. Oshilanduliko, oilonga yokuudifa Ouhamba otai wanifwa mounyuni aushe.—Oilonga 15:36-40; Ovaefeso 4:13.
[Efano pepandja 31]
Ovakriste kunena ove li “oshiunda shimwe, nomufita umwe”