Omanangeko noupuna onghundana iwa

EFIKU limwe lEshabata moukalele waye wotete, Jesus okwa li moshinagoga muNasaret. Ondjokonona otai ti: “Okwa pewa omishangwa domuprofeti Jesaja. Hano eshi a tonyununa omishangwa, okwe litwa poima pa shangwa: Omhepo yOmwene [oi] li kombada yange, osheshi Ye okwa vaeka nge ndi udifile . . . evangeli [“onghundana iwa,” NW].” Jesus okwa twikila okulesha shihapu moshitukulwa shexunganeko. Opo nee okwa kala omutumba ndele ta ti: “Nena tuu eli eshangelo eli la wanifwa ngaashi la fika momatwi eni.”—Lukas 4:16-21.

1, 2. (a) Jesus okwe liholola mwene e li lyelye, nongahelipi? (b) Omanangeko noupuna elipi a etwa konghundana iwa oyo ya udifwa kuJesus?

² Monghedi ei, Jesus okwe liholola mwene e li omuudifi wevangeli a xunganekwa, omuhokololi wonghundana iwa nomuyandji wehekeleko. (Mateus 4:23) Kai fi tuu onghundana iwa oyo ya li ya udifwa kuJesus! Okwa lombwela ovapwilikini vaye ta ti: “Aame ouyelele wounyuni; ou ta shikula nge, ita ende momulaulu, ndele ota kala e nouyelele womwenyo.” (Johannes 8:12) Okwa ti yo: “Ngenge tamu kala meendjovo dange, onye ovalongwa vange shili, ndele tamu ka shiiva oshili, noshili otai mu mangulula.” (Johannes 8:31, 32) Heeno, Jesus oku na ‘eendjovo domwenyo waalushe.’ (Johannes 6:68, 69) Doshili, ouyelele, omwenyo nemanguluko oo omanangeko noupuna oo e na okudiininwa!

3. Ovahongwa vaJesus ova udifa onghundana iwa ilipi?

³ Konima yOpentekoste 33 O.P., ovahongwa ova twikila okulonga oilonga yokuudifa evangeli yaJesus. Ova udifa ‘evangeli louhamba’ kOvaisrael nokovapaani. (Mateus 24:14; Oilonga 15:7; Ovaroma 1:16) Ovo ve linyenga ove lihonga okushiiva Jehova Kalunga. Ova mangululwa moupika womalongelokalunga nova ninga oshitukulwa shoshiwana shipe shopamhepo, ‘Israel yaKalunga,’ osho oilyo yasho i na etimaumbwile lokupangela fiyo alushe meulu pamwe nOmwene wavo, Jesus Kristus. (Ovagalati 5:1; 6:16; Ovaefeso 3:5-7; Ovakolossi 1:4, 5; Ehololo 22:5) Doshili, oo okwa li omanangeko noupuna e na ondilo!

Okuudifa evangeli kunena

4. Omonghedi ilipi oshilonga shokuudifa onghundana iwa tashi wanifwa kunena?

⁴ Kunena, Ovakriste ovavaekwa, tava yambididwa ‘kongudu inene’ ‘yeedi dimwe’ tai hapupala, otava twikile okuwanifa oshilonga shexunganeko shopetameko sha yandjwa kuJesus. (Ehololo 7:9; Johannes 10:16, OB-1954) Oshidjemo, onghundana iwa otai udifwa monghedi oyo inai monika nande onale. Moilongo nomoitukulwa 235, Eendombwedi daJehova oda ya di ka ‘udifile omapongo ondaka iwa, di mange ava ve na omutima wa nyanyaulwa, okwiingidila eenghwate emanguluko naava ve li meemango, eyeuluko leedolongo; okuudifa pombada omudo muwa wOmwene nefiku longhone yaKalunga ketu, okuhekeleka aveshe ava tava lili.’ (Jesaja 61:1, 2, yelekanifa OB-1986.) Onghee hano, oilonga yokuudifa evangeli yopaKriste otai twikile okweetela vahapu ‘ovo ve li moudjuu keshe’ omanangeko noupuna nosho yo ehekeleko lashili.—2 Ovakorinto 1:3, 4.

5. Shi na sha nokuudifa onghundana iwa, Eendombwedi daJehova oda yooloka ko ngahelipi keengeleka dOukwakriste?

⁵ Oshoshili kutya eengeleka dOukwakriste ohadi unganeke eenghedi dokuudifa evangeli di lili noku lili. Dihapu ohadi tumu ovatumwa ve ke lidilululife ovanhu koilongo imwe. Pashihopaenenwa, oThe Orthodox Christian Mission Center Magazine otai hokolola oilonga yovatumwa Ovaortodoks muMadagascar, moumbuwanhu waAfrika, Tanzania nosho yo muZimbabwe. Ndelenee mOngeleka yOvaortodoks, ngaashi meengeleka dimwe dOukwakriste, oilyo ihapu kai na ombinga moilonga ya tya ngaha. Mepingafano naasho, Eendombwedi daJehova adishe de liyandja ohadi kendabala okukufa ombinga moilonga yokuudifa evangeli. Oda dimina kutya okuudifa onghundana iwa oko euliko kutya eitavelo lado olashili. Paulus okwa ti: “Okwiitavela nomutima otaku yukipalifa, nokuhepaulula nokanya otaku xupifa.” Doshili, eitavelo olo ihali linyengifa omunhu a longe, ola fya.—Ovaroma 10:10; Jakob 2:17.

Onghundana iwa oyo tai eta omanangeko noupuna aalushe

6. Onghundana iwa ilipi tai udifwa kunena?

⁶ Eendombwedi daJehova otadi udifa onghundana iwa ku he na vali. Ohadi pandje Eembibeli dado nokuulikila ovo ve na ehalo kutya Jesus okwa yamba omwenyo waye okuyandja ondjila yokweehena kuKalunga kovanhu aveshe, okudiminwa po omatimba nosho yo eteelelo lomwenyo waalushe. (Johannes 3:16; 2 Ovakorinto 5:18, 19) Otadi udifa kutya Ouhamba waKalunga owa dikwa po meulu koshi yOhamba ya nangekwa po, Jesus Kristus, nosho yo kutya mafiku otau ka kufa po oukolokoshi kombada yedu nokupashukila etungululwo lOparadisa. (Ehololo 11:15; 21:3, 4) Mewanifo lexunganeko laJesaja, otadi shiivifile ovanhu vakwao kutya paife “omudo muwa wOmwene” eshi ovanhu aveshe tava dulu natango okulinyenga konghundana iwa. Otadi londwele yo kutya mafiku ‘efiku longhone yaKalunga ketu’ otali ke uya eshi Jehova ta ka eta exulilo kovanyoni inave livela ombedi.—Epsalme 37:9-11.

7. Oshimoniwa shilipi tashi ulike oukumwe wEendombwedi daJehova, nomolwashike tadi hafele oukumwe wa tya ngaha?

⁷ Mounyuni wa dingililwa koiponga, ei oyo ashike onghundana iwa i na omauwa aalushe. Ovo tave i tambula ko otava ningi oshitukulwa shoumwainafana wopaKriste wa hangana womounyuni aushe oo ihau pitike oukwashiwana, oukwamuhoko ile omayooloko opamaxupilo e va tukaule. Ova ‘djala ohole, oyo i li oshimangifo sha wana shoku va manga kumwe.’ (Ovakolossi 3:14; Johannes 15:12) Eshi osha li sha monika omudo wa ya moshilongo shonhumba shaAfrika. Ongula imwe oshilandopangelo osha li sha pendulwa komitopelo deendjebo. Eenghendabala dokuhanauna po epangelo oda li tadi ningwa. Eshi oiningwanima ya divilika koukwamuhoko, oukwaneumbo wOndombwedi owa li wa pewa oushima omolwokwaamena Eendombwedi dikwao domuhoko u lili. Oukwaneumbo owa nyamukula tau ti: “Otu na ashike Eendombwedi daJehova di li meumbo letu.” Kudo, eyooloko lopamihoko inali fimana; ndelenee ohole yopaKriste oya li ya fimana—okuyandja ehekeleko kwaavo va li ve li pumbwa. Omukwanedimo woukwaneumbo oo e he fi Ondombwedi okwa ti: “Oilyo aishe yomalongelokalunga oya kengelela ovalongelikalunga vakwao. Ndelenee Eendombwedi daJehova odo adike inadi shi ninga.” Oiningwanima ihapu ya fa eshi ya lopotwa okudja koilongo ya dedelifwa koita yopashiwana otai ulike kutya Eendombwedi daJehova ‘odi hole shili oukumwe aushe wovamwaxe.’—1 Petrus 2:17, yelekanifa NW.

Onghundana iwa ohai lundulula ovanhu

8, 9. (a) Omalunduluko elipi haa ningwa kwaavo hava tambula ko onghundana iwa? (b) Oimoniwa ilipi tai ulike eenghono donghundana iwa?

⁸ Onghundana iwa oi na sha naasho Paulus a ifana “omwenyo wopaife nowokomesho.” (1 Timoteus 4:8) Itai yandje ashike eteelelo lashili likumwifi lonakwiiwa ndelenee otai eta yo omalunduluko ‘momwenyo wopaife.’ Di li oohandimwe, Eendombwedi daJehova ohadi wilikwa kEendjovo daKalunga, Ombibeli, di ete okukalamwenyo kwado metwokumwe nehalo laKalunga. (Epsalme 119:101) Omaukwatya ado okwa ninga mape eshi tadi kulike omaukwatya aa ngaashi ouyuki noudiinini.—Ovaefeso 4:24.

⁹ Konakona oshihopaenenwa shaFranco. Okwa li e na oupyakadi wokuhanduka. Shimha tuu oinima ya ningwa shi he fi osho a hala, oha handuka unene nokuteyaula oinima. Omukainhu waye okwa konakona Ombibeli nEendombwedi daJehova, noshihopaenenwa shado shopaKriste osha kwafela Franco kanini nakanini a mone kutya oku na okulunduluka. Okwa konakona Ombibeli nEendombwedi noxuuninwa okwa li ta dulu okuulika oiimati yomhepo iyapuki, ombili nelipangelo. (Ovagalati 5:22) Oku li umwe womo 492, va ninginifwa muBelgium momudo woilonga 2001. Konakona yo shaAlejandro. Omulumenhu oo omunyasha okwa li a pikwa nai koingangamifi fiyo oposhitwa shokukala ta hade oinima moshala shoimbodi, ta kongo osho ta dulu okumona mo e shi landife opo a fute oingangamifi yaye. Eshi a li e na omido 22, Eendombwedi daJehova oda pula Alejandro a konakone Ombibeli nokwa dimina. Oha lesha Ombibeli efiku keshe noha kala pokwoongala kwopaKriste. Okwa koshola onghalamwenyo yaye diva osho sha li ashike meni leemwedi hamano, okwa dula okukufa ombinga moilonga yokuudifa evangeli—noku li umwe womo 10 115 ovo ve shi ninga omudo wa ya muPanama.

Onghundana iwa —enangeko noupuna kovanheni

10. Oolyelye tave linyenge konghundana iwa, nongahelipi omataleko avo taa lunduluka?

¹⁰ Jesaja okwa xunganeka kutya onghundana iwa otai udifilwa ovalininipiki. Ovalininipiki ava ovo oolyelye? Ovovo tava hokololwa membo lOilonga ve na ‘oikala iwa kombinga yomwenyo waalushe.’ (Oilonga 13:48, NW) Ovo oohandimwe ovalininipiki ovo tava hangika meendodo adishe doulipamwe wovanhu ovo tave linyenge ketumwalaka loshili. Ovanhu ava ove lihonga kutya okulonga ehalo laKalunga otaku eta omanangeko noupuna oo e dule kokule keshe shimwe osho ounyuni tau yandje. (1 Johannes 2:15-17) Ndelenee ongahelipi Eendombwedi daJehova tadi hange komitima dovanhu moilonga yado yokuudifa evangeli?

11. Shi na sha naasho Paulus a popya, onghundana iwa oi na okuudifwa ngahelipi?

¹¹ Konakona oshihopaenenwa shomuyapostoli Paulus, oo a shangela Ovakorinto ta ti: “Naame yo eshi nde uya kunye, ovamwatate, inandi uya ndi newapalo leendjovo ile lounongo oku mu udifila ehepaululo laKalunga. Osheshi onda tokola ndi kale punye inandi shiiva oinima imwe, oJesus Kristus aeke, ou omuvalelwa.” (1 Ovakorinto 2:1, 2) Paulus ina kendabala okukumwifa ovapwilikini vaye nokuhongwa kwaye. Ina honga sha shimwe shi he fi eeshili dopakalunga tadi shilipaleke, eeshili odo da shangwa mOmbibeli kunena. Didilika yo okuladipika kwaPaulus omuudifi mukwao wevangeli Timoteus ta ti: “Udifa ondjovo; shi ninga [neendelelo, NW].” (2 Timoteus 4:2) Timoteus okwa li e na okuudifa “ondjovo,” etumwalaka laKalunga. Paulus okwa shangela yo Timoteus ta ti: “Diinina, u monike kuKalunga oove omufindani momayeleko, omulongi ita fi ohoni oshilonga shaye, e shii okutukula nawa ondjovo yoshili.”—2 Timoteus 2:15.

12. Ongahelipi Eendombwedi daJehova kunena hadi pwilikine keendjovo nokoshihopaenenwa shaPaulus?

¹² Eendombwedi daJehova ohadi pwilikine oshihopaenenwa shaPaulus osho yo eendjovo daye kuTimoteus. Oda dimina eenghono dEendjovo daKalunga notadi di longifa nawa eshi tadi ulikile ovanhu vakwao eendjovo da wapala deteelelo nodehekeleko. (Epsalme 119:52; 2 Timoteus 3:16, 17; Ovaheberi 4:12) Doshili, ohadi longifa nawa oishangomwa yopaMbibeli opo ovo ve na ohokwe va dule okumona eshiivo lihapu lokushiiva Ombibeli pomafimbo avo okufuda po. Ndelenee oda hala alushe okuulikila ovanhu eendjovo dOmishangwa. Odi shii kutya Eendjovo daKalunga da nwefwa mo otadi ke linyengifa omitima dovalininipiki. Noku di longifa monghedi ei otashi pameke yo eitavelo lado.

“Okuhekeleka aveshe ovo tava lili”

13. Momudo 2001, oiningwanima ilipi tai hapupaleke omhumbwe yaapeshe yokuyandja ehekeleko kwaavo tava lili?

¹³ Momudo 2001 omwa li mu na oiponga ihapu inene, noshidjemo, ovanhu vahapu ova li va pumbwa ehekeleko. MuSeptemba omwa monika oshihopaenenwa sha tongomana mOilongo yaHangana, shomaponokelo opaukulo moWorld Trade Center moNew York nosho yo Pentagon popepi naWashington, D.C. Omaponokelo oo kaa li tuu mahalula moshilongo ashishe! Mokushakeneka oiningwanima ei, Eendombwedi daJehova oda kendabala okuwanifa po oshilonga shado okuyandja ‘ehekeleko kwaaveshe ovo tava lili.’ Oimoniwa inini otai ka ulika nghee de shi ninga.

14, 15. Ongahelipi Eendombwedi da li da dula okulongifa omishangwa nomupondo peemhito mbali okuhekeleka ovo va nyika oluhodi?

¹⁴ Ondombwedi oyo i li omuudifi wevangeli wefimbo liyadi oya popya nomukainhu komunghulo wondjila noye mu pula osho ta diladila kombinga yomaponokelo opaukulo oo opo a ningwa. Omukainhu okwa tameka okulila. Okwa ti kutya oku udite oluhodi nokwa li a hala ngeno okukwafela monghedi yonhumba. Ondombwedi oya lombwela omukainhu kutya Kalunga oku na ko nasha unene nafye atushe, nOndombwedi oya lesha Jesaja 61:1, 2. Eendjovo daKalunga da nwefwa mo oda li di li pandunge komukainhu, oo a popya kutya keshe umwe okwa li a nyika oluhodi. Omukainhu okwa tambula ko okatraktate nokwa pula Ondombwedi i mu talele po keumbo laye.

¹⁵ Eendombwedi mbali odo da li moilonga yokuudifa evangeli oda hanga omulumenhu ta longo monduda yaye yokutuvikila oilongifo. Ode mu pula di mu ulikile eendjovo dehekeleko okudja mOmishangwa moku shi talela moshiponga osho opo sha ningwa moWorld Trade Center. Eshi a dimina oda lesha 2 Ovakorinto 1:3-7, ovo va kwatela mo eendjovo tadi ti: “Omahekeleko e tu yada pombada omolwaKristus.” Omulumenhu okwa pandula eshi Eendombwedi odo di li ovashiinda shaye da li tadi lombwele vamwe oshinima tashi hekeleke ndele ta ti: “Kalunga na nangeke noupuna oilonga ikumwifi oyo tamu longo.”

16, 17. Oimoniwa ivali ilipi tai ulike eenghono dOmbibeli dokukwafela ovanhu ovo va nyikifwa oluhodi ile va nyematekwa komaupyakadi?

¹⁶ Ondombwedi ya li tai ningi omalishuneko kovanhu ovo ve na ohokwe oya shakeneka omonamati womukainhu umwe oo a li a ulika ohokwe nale nokwa hokolola kutya okwa li te lipula kombinga yovanhu vakwao kutya ove li ngahelipi konima yoshiponga osho opo sha ningwa. Omulumenhu okwa li a kumwa eshi Ondombwedi ya longifa efimbo layo okutalela po ovanhu vakwao nokutala nghee ve li po. Okwa ti kutya okwa li ta longo popepipepi noWorld Trade Center eshi eponokelo la ningwa nokwa mona oshiningwanima ashishe nghee sha ningwa. Eshi omulumenhu a pula kutya omolwashike Kalunga a pitika okumona oixuna, Ondombwedi oya lesha eevelishe mOmbibeli, mwa kwatelwa Epsalme 37:39, olo tali ti: “Ekwafo lovayuki otali di kOmwene, Oye ohotengulu yavo mefimbo lomaudjuu.” Omulumenhu okwa pula Ondombwedi nombili kutya oi li ngahelipi nosho yo oukwaneumbo wayo, okwe i pula i aluke nokwa yandja olupandu tali di komutima omolwetalelepo.

¹⁷ Umwe womayovi aavo va nyika oluhodi a hekelekwa kEendombwedi daJehova momafiku a landula omaponokelo opaukulo okwa li omukainhu oo a shakenekwa kEendombwedi fimbo tadi talele po ovanhu. Omukainhu okwa li a nyikifwa oluhodi linene kwaasho sha ningwa po nokwa pwilikina eshi tadi lesha Epsalme 72:12-14 olo tali ti: ‘Ota ka xupifa epongo eli tali kuu onghuwo li kwafwe, nomukwanaluhepo ou e he na omukwafi. Ota ningile omuxupi nohepele olukeno, nota xupifa eemwenyo deehepele; ndele te di kulile momafininiko nomomalwifo, nohonde yado ote i tale i nondilo.’ Eendjovo odo kada li tuu di na eshi tadi ti! Omukainhu okwa pula Eendombwedi di leshe vali eevelishe odo nokwe di ifana meumbo laye va twikile neenghundafana. Pexulilo leenghundafana, ekonakonombibeli ola li la tamekwa.

18. Ongahelipi Ondombwedi ya kwafela ovanhu eshi ya li ya pulwa i ilikane ponhele yavo?

¹⁸ Ondombwedi imwe hai longo mofitola yoikulya momudingonoko u na oupuna omo ovanhu va kala nale ve he na ohokwe ihapu monghundana iwa yOuhamba. Konima yomaponokelo opaukulo, omudingonoko owa li wa tila. MEtitano konguloshi konima yeponokelo, omenindjela yofitola yoikulya oya ifana keshe umwe va ye pondje nokuyelula omalixita, va kale okafimbo ve limwenenena okudimbuluka ovo va ninga oihakanwa. Okufimaneka omaliudo avo, Ondombwedi oya ya pondje nokufikama ya mwena kokalupanda kokweenda kolupadi. Menindjela oku shii kutya oi li omukalele womEendombwedi daJehova, omolwaashi konima yedimbuluko, menindjela okwa pula Ondombwedi i ilikane ponhele yakeshe umwe. Ondombwedi oye shi dimina. Meilikano layo, oya tumbula okulila ku li apeshe ndele oya ti kutya ovo tava lili inava pumbwa okulila va fa ve he na eteelelo. Oya popya efimbo eshi oiningwanima i tilifa ya tya ngaho itai ka ningwa vali noya ti kutya aveshe otava ka ehena kuKalunga kehekeleko okupitila meshiivo lashili tali di mOmbibeli. Konima yokutya “Amen,” menindjela—nosho yo ovanhu aveshe ve dulife po 60 ovo va li pondje yofitola yoikulya—ove uya kOndombwedi, tave i pandula noku i papatela, tava popi kutya eilikano ola li liwa olo inava uda nale.

Omanangeko noupuna momudingonoko

19. Oimoniwa ilipi tai ulike kutya vamwe ova dimina omifikamhango da fimana dEendombwedi daJehova?

¹⁹ Unene tuu momafiku aa, ovakalimo vomomidingonoko omo Eendombwedi daJehova tadi longo otava mono ouwa mokukala po kwado—ngaashi vahapu ve shi didilika. Mbela ongahelipi ovanhu ovo tava xumifa komesho ombili, ouyuki nosho yo oukoshoki wopaenghedi itava dulu okukala enwefemo liwa? Moshilongo shimwe shaAsia shoPokati, Eendombwedi oda shakeneka omunambelewa a pendjelwa a li wehangano leameno lepangelo. Okwa ti kutya okwa li a pulwa oshikando shimwe a konakone omahangano omalongelokalunga e lili naku lili. Eshi a konakona Eendombwedi daJehova, okwa li a kumwifwa kouyuki nokelihumbato lado liwa. Okwa fimaneka eitavelo lado la pama noushili kutya omahongo ado okwe likolelela kOmishangwa. Omulumenhu ou okwa dimina ekonakonombibeli.

20. (a) Oilonga oyo ya lopotwa kEendombwedi daJehova omudo wa ya otai ulike shike? (b) Oshike tashi ulike kutya ope na oilonga ihapu okulonga, nongahelipi hatu tale ko oufembanghenda wetu wokuudifa evangeli?

²⁰ Moimoniwa inini ya hokololwa moshitukulwa eshi, nonande ope na oimoniwa omayovi tai dulu okuhokololwa, osha yela kutya Eendombwedi daJehova oda li de lipyakidila momudo woilonga 2001.a Oda popya novanhu omamiliyona, oda hekeleka vahapu ovo tava lili nosho yo oilonga yado yokuudifa evangeli oya nangekwa noupuna. Opa li 263 431 ovo va ulika eliyandjo lavo kuKalunga mokuninginifwa. Mounyuni aushe, omuvalu wovaudifi vevangeli owa hapupala neepersenda 1,7. Noushili oo kutya 15 374 986 ova li pEdimbuluko lefyo laJesus lokomudo otau ulike kutya ope na oilonga ihapu oyo ina okulongwa. (1 Ovakorinto 11:23-26) Natu twikile okukonga ovalininipiki ovo tave linyenge konghundana iwa. Shamha ashike omudo muwa waJehova tau twikile, natu twikile okuhekeleka “ava ve na omutima wa nyanyaulwa.” Katu na tuu oufembanghenda wa nangekwa noupuna! Doshili atusheni natu twe kumwe neendjovo daJesaja tadi ti: “Ame ohandi hafele mOmwene unene, omwenyo wange otau nyakukilwa muKalunga kange.” (Jesaja 61:10) Kalunga na twikile oku tu longifa eshi ta wanifa eendjovo edi dexunganeko tadi ti: “Omwene, Omwene ta menifa ouyuki nehambelelo moipaifi yovanhu aveshe.”—Jesaja 61:11.

[Omashangelo opedu]

[Efano pepandja 25]

Eendombwedi daJehova ohadi dimbuluka alushe oshinakuwanifwa shado shokuudifa evangeli

[Efano pepandja 27]

Ovo ve linyenga konghundana iwa ova ninga oshitukulwa shoumwainafana wa hangana womounyuni aushe

[Efano pepandja 28]

Oto dimbuluka?

• Ongahelipi ovalininipiki va li va mona ouwa monghundana iwa oyo Jesus a udifa?

• Omanangeko noupuna elipi tae uya kwaavo ve linyenga koilonga yokuudifa evangeli yovahongwa vaJesus mefelemido lotete?

• Ongahelipi ovo ve na ehalo va nangekwa noupuna kunena nonghundana iwa?

• Ohatu tale ko ngahelipi oufembanghenda wetu wokukala ovaudifi vevangeli?