Ouyelele wopakalunga otau kufa po omilaulu!
“Omwene ta minikile omilaulu dange.”—2 SAMUEL 22:29.
“KALUNGA okwa tile: Nape uye ouyelele! Nouyelele we uya.” (Genesis 1:3) Neendjovo odo da fimana, ehokololo leshito muGenesis otali ulike Jehova e li odjo youyelele, oo ngeenge u he po onghalamwenyo tai kala itai shiva kombada yedu. Jehova oku li yo odjo youyelele wopamhepo, oo wa fimanenena omolwewiliko monghalamwenyo yetu. (Epsalme 43:3) Ohamba David oya ulika ekwatafano linene olo li li pokati kouyelele wopamhepo nomwenyo eshi ya shanga tai ti: “Muove, omo omu nofifiya yomwenyo; nomouyelele woye, omo hatu mono ouyelele.”—Epsalme 36:10.
2. Ngaashi Paulus a ulika, ouyelele ou na ekwatafano linene nashike?
2 Omido donhumba 1 000 konima yefimbo laDavid, omuyapostoli Paulus okwa ulika kehokololo leshito. Mokushangela keongalo lopaKriste muKorinto, okwa ti: “Kalunga ou a tile: Ouyelele nau minikile momulaulu.” Opo nee Paulus okwa ulika kutya ouyelele wopamhepo ou na ekwatafano linene nounongo wa dja kuJehova eshi a weda ko ta ti: “Oye tuu ou a minikila momitima detu, opo okushiiva kwoshinge shaKalunga ku tandavelife ouyelele, nokutya oshinge tuu osho tashi taima moshipala shaKristus.” (2 Ovakorinto 4:6) Ouyelele ohau uya kufye ngahelipi?
Ombibeli —omuyandji wouyelele
3. Jehova oha yandje ouyelele ulipi okupitila mOmbibeli?
3 Jehova oha yandje ouyelele wopamhepo okupitila unene tuu mEendjovo daye da nwefwa mo, Ombibeli. Onghee hano, eshi hatu konakona Ombibeli nokumona eshiivo tali di kuKalunga, ohatu pitike ouyelele waye u tu minikile. Jehova oha yandje ouyelele okupitila mOmbibeli shi na ko nasha nomalalakano aye nohe tu lombwele nghee hatu dulu okulonga ehalo laye. Eshi otashi pe onghalamwenyo yetu elalakano notashi tu kwafele tu palule eemhumbwe detu dopamhepo. (Omuudifi 12:1; Mateus 5:3, NW) Jesus okwa divilika kutya otu na okufiloshisho eemhumbwe detu dopamhepo, eshi a tofa mOmhango yaMoses, ta ti: “Okwa shangwa: Hakomungome auke omunhu ta kala e nomwenyo, ndelenee okondjovo keshe tai di mokanya kaKalunga.”—Mateus 4:4; Deuteronomion 8:3.
4. Omonghedi ilipi Jesus e li “ouyelele wounyuni”?
4 Jesus oku na naanaa ekwatafano nouyelele wopamhepo. Doshili, okwe lipopya e li “ouyelele wounyuni” ndele ta ti: “Ou ta shikula nge, ita ende momulaulu, ndele ota kala e nouyelele womwenyo.” (Johannes 8:12) Outumbulilo ou otau tu kwafele tu ude ko onghandangala ya fimana oyo Jesus e na mokuyandja oshili yaJehova kovanhu aveshe. Ngeenge otwa hala okuhenuka omilaulu nokweenda mouyelele waKalunga, otu na okupwilikina kwaaishe oyo Jesus a popya nokushikula filufilu oshihopaenenwa shaye nomahongo aye ngaashi a shangwa mOmbibeli.
5. Ovashikuli vaJesus ova li ve na oshinakuwanifwa shilipi konima yefyo laye?
5 Omafiku manini a tetekela efyo laye, Jesus okwe liulika natango e li ouyelele, eshi a lombwela ovahongwa vaye ta ti: “Ouyelele u li mokati keni. Kaleni nokweenda mouyelele fimbo mu nouyelele, mu ha faukilwe komilaulu. Ou ta ende momilaulu, ke shii oku ta i. Fimbo mu nouyelele, itaveleni ouyelele, opo mu ninge ovana vouyelele.” (Johannes 12:35, 36) Ovo tava ningi ovana vouyelele ove lihonga “oshihopaelelwa sheendjovo odo diwa” dOmbibeli. (2 Timoteus 1:13, 14) Opo nee ova longifa eendjovo odo diwa okunana oohandimwe vamwe ovo ve na omitima diwa va dje mo momilaulu va ye mouyelele waKalunga.
6. Oshili yopehovelo i na sha nouyelele nosho yo omilaulu ilipi hatu hange mu 1 Johannes 1:5?
6 Omuyapostoli Johannes okwa shanga ta ti: “Kalunga Oye ouyelele, omulaulu kau mo muye.” (1 Johannes 1:5) Didilika ekondjifafano eli li li pokati kouyelele nomilaulu. Ouyelele wopamhepo ohau di kuJehova, nomilaulu dopamhepo itadi dulu okukala di na ekwatafano naye. Hano omilaulu ohadi di kulyelye?
Odjo yomilaulu dopamhepo
7. Olyelye ta kwatele komesho omilaulu dopamhepo dounyuni, noku na enwefemo lilipi?
7 Omuyapostoli Paulus okwa popya ‘kalunga kounyuni ou.’ Moutumbulilo oo, okwa hala okutya Satana Ondiaboli. Okwa twikila ko ta ti kutya oye ou ‘a twikifa eendunge daavo ve he na eitavelo opo va ha minikilwe kouyelele wevangeli loshinge shaKristus, Ou e li efano laKalunga.’ (2 Ovakorinto 4:4, yelekanifa OB-1954.) Ovanhu vahapu ohava ti ova itavela muKalunga, ndelenee omuvalu wavo muhapu inau itavela mOndiaboli. Omolwashike? Inava hala okudimina kutya omunaenghono umwe omunawii oo e na eenghono di dule dovanhu otashi dulika di kale po nokunwefa mo onghedi oyo hava diladila. Nande ongaho, ngaashi Paulus a ulika, Ondiaboli oko i li notai nwefa mo ovanhu opo va ha dule okumona ouyelele woshili. Eenghono daSatana okunwefa mo okudiladila kwovanhu otadi monika mexunganeko olo tali mu hokolola e li “ou ta hongaula ounyuni aushe.” (Ehololo 12:9) Shi li oshidjemo shoilonga yaSatana, onghalo oyo ya xunganekwa komuprofeti Jesaja paife otai longo kovanhu aveshe kakele kwaavo tava longele Jehova: “Tala, omilaulu otadi tuvikile edu, nomulaulu woilemo oiwana.”—Jesaja 60:2.
8. Omeenghedi dilipi ovo ve li momilaulu dopamhepo tava ulike kutya ova ngwangwana?
8 Momilaulu fokofoko itashi shiiva okumona nande osha. Omunhu ota dulu okukana ile a ngwangwane noupu. Sha faafana, ovo ve li momilaulu dopamhepo ova kambela eudeko nohava ngwangwana diva monghedi yopamhepo. Otava dulu okukanifa ounghulungu okutongola oshili noipupulu nouwa nowii. Omuprofeti Jesaja okwa popya ovo ve li momilaulu da tya ngaha eshi a shanga ta ti: “Woo ava, tava ti: Owii oo ouwa, nouwa oo owii, tava pilike ouyelele nomulaulu, nomulaulu nouyelele, tava ningi ounyenye oululu, noululu ounyenye.” (Jesaja 5:20) Ovo ve li momilaulu dopamhepo ova nwefwa mo kukalunga komilaulu, Satana Ondiaboli, nonghee hano ove liteeka ko kodjo youyelele noyomwenyo.—Ovaefeso 4:17-19.
Eshongo okudja momilaulu okuya mouyelele
9. Yelifa nghee ovanyoni ve hole omilaulu do venevene naado dopamhepo.
9 Omudiinini Job okwa ulika nghee ovanyoni ve hole omilaulu do venevene eshi a ti: “Eisho lomuteyi wohombo tali tale oshiwiwili ndee ta ti: Kape na nande eisho tali tale nge; ndee ta uvike oshipala shaye.” (Job 24:15) Ovanyoni ove li yo momilaulu dopamhepo, nomilaulu edi otadi dulu oku va wilila po. Omuyapostoli Paulus okwa ti kutya oluhaelo, oulunga, olwisho, oukolwe, okusheka nokunyeka oi li apeshe mokati kaavo va kwatwa komilaulu odo. Ndelenee keshe oo te uya mouyelele wEendjovo daKalunga ota dulu okulunduluka. Paulus okwa yelifa monhumwafo yaye kOvakorinto kutya elunduluko la tya ngaha otali shiva. Ovakriste vahapu Ovakorinto ova li hava longo oilonga yomilaulu, ndelenee Paulus okwe va lombwela ta ti: “Ndelenee nye mwe liyelifa, mwa yapulwa nomwa yukipalifwa omedina lOmwene Jesus Kristus nokOmhepo yaKalunga ketu.”—1 Ovakorinto 6:9-11.
10, 11. (a) Ongahelipi Jesus a yavelela omulumenhu oo a twikululwa? (b) Omolwashike ovanhu vahapu inava hoolola ouyelele?
10 Ngeenge omunhu ta di momilaulu fokofoko ta i mouyelele, omesho aye osha yela kutya ohaa kala a pumbwa okafimbo kanini a ikilile ouyelele. PuBetsaida, Jesus okwa velula omulumenhu omupofi ndele okwe shi ninga paenghatu. “Okwa kwata omupofi keke, e mu twala pondje yoshilando, ndele Ye eshi a fiila momesho aye, okwe mu tenheka eke laye ndele okwe mu pula: Ou wete sha? Ndele ou okwa yelula omesho, ndee ta ti: Ondi wete ovanhu, osheshi ndi va wete va fa omiti tadi ende. Ye okwa tenhukulula omake aye komesho aye. Omulumenhu nokwa kala e wetelele ko, a twikuluka. Ye okwa li e wete aishe nokokule ngaashi i li.” (Markus 8:23-25) Osha yela kutya Jesus okwa twikulula omesho omulumenhu kanini nakanini opo omulumenhu a dule okwiikilila ouyelele wa twa wetango. Ohatu dulu okudiladila ehafo lomulumenhu oo eshi kwa li ta dulu okumona ko.
11 Ndelenee, ehafo olo la li li niwe komulumenhu kali dule nande ehafo laavo va kwafelwa va dje momilaulu dopamhepo kanini nakanini va ye mouyelele woshili. Ngeenge hatu mono ehafo lavo, otashi dulika tu kale twa kumwa eshi vahapu ve he hole ouyelele. Jesus ota yandje etomheno ta ti: “Etokolo oleli: ouyelele we uya mounyuni, ndelenee ovanhu va li ve hole omulaulu komesho youyelele, osheshi oilonga yavo oii. Osheshi keshe ou ta longo owii, ota tondo ouyelele, ndele ite uya pouyelele, oilonga yaye i ha hanyenwe.” (Johannes 3:19, 20) Heeno, ovanhu vahapu ove hole okulonga ‘oilonga ii’—ngaashi oluhaelo, okufininika, okufufya, okukengelela nosho yo okuvaka—nomilaulu dopamhepo daSatana odo omudingonoko muwa kuvo okuninga eshi va hala.
Ninga exumokomesho mouyelele
12. Omeenghedi dilipi twa mona ouwa mokuuya mouyelele?
12 Okudja eshi twe uya keshiivo louyelele, omalunduluko elipi twa mona mufye vene? Omafimbo amwe oshiwa okutala konima nokudimbuluka exumokomesho lopamhepo olo twa ninga. Mbela eenghedindjikilile dii dilipi twa efa? Mbela omaupyakadi elipi monghalamwenyo yetu twa li twa yukifa? Ongahelipi eemhangela detu donakwiiwa da lunduluka? Keenghono daJehova nosho yo kekwafo lomhepo yaye iyapuki, ohatu dulu okutwikila okuninga omalunduluko mounhu wetu nosho yo moshihopaenenwa shetu shokudiladila osho tashi ka ulika kutya ohatu linyenge kouyelele. (Ovaefeso 4:23, 24) Paulus okwe shi popya ta ti: “Nale omwa li omulaulu, ndelenee paife mwa ninga ouyelele mOmwene. Kaleni nokweenda ngaashi ovana vouyelele, osheshi ouwa keshe nouyuki noshili, oyo oshiimati [shouyelele, OB-1954].” (Ovaefeso 5:8, 9) Okupitika tu wilikwe kouyelele waJehova otashi tu pe eteelelo nosho yo elalakano notashi hafifa okukalamwenyo kwaavo ve tu dingilila. Nokuninga omalunduluko kwetu kwa tya ngaha itaku etele tuu omutima waJehova ehafo!—Omayeletumbulo 27:11.
13. Ongahelipi hatu dulu okuulika olupandu letu lokupandula ouyelele waJehova, noshike sha pumbiwa omolwonghatu ya tya ngaha?
13 Ohatu ulike olupandu letu omolwonghalamwenyo i na elao oyo hatu hafele mokuulika ouyelele waJehova—okutukulilafana osho twe lihonga mOmbibeli noilyo yetu yomaukwaneumbo, ookaume ketu nosho yo ovashiinda shetu. (Mateus 5:12-16; 24:14) Kwaavo tava anye okupwilikina, okuudifa kwetu pamwe noshihopaenenwa shetu shonghalamwenyo yopaKriste otashi kala shi li ehanyeno. Paulus okwa fatulula ta ti: “Ndele shipaashipeni eshi tashi wapalele Omwene, ndele inamu kala mu neendafano nande linini noilonga yomulaulu ihai imike, ndelenee oshipu mu i hanyene.” (Ovaefeso 5:10, 11) Okukwafela ovanhu va efe omilaulu nokuhoolola ouyelele otashi dulika shi pule tu kale ovaladi. Osho sha fimanenena, otashi pula tu kale nolukeno nokukala tu na ko nasha navamwe nosho yo ehalo tali di komutima oku va shiivifila ouyelele woshili omolwouwa wavo waalushe.—Mateus 28:19, 20.
Lungama ouyelele woipupulu!
14. Moshinima shi na sha nouyelele, otu na okupwilikina kelondwelo lilipi?
14 Kwaavo ve li pefuta pefimbo leevili domilaulu, ouyelele keshe ou li uhafifa. Momafimbo onale, omundilo owa li wa yeleka komunghulo wekuma laEngland okuulika opo eameno koshikungulu tali dulu okuhangika. Ovalongi vomeeshikepa ova li va hafa okuwilikwa kouyelele oo tau twala ketulilo la amenwa. Ndelenee omindilo dimwe oda li doipupulu. Ponhele yokuhanga etulilo, eeshikepa dihapu oda li da pukifwa noda li da tekela komamanya omunghulofuta, oko omitwalo davo da li da vakwa po. Mounyuni ou tau pukifa, otu na okukala twa lungama tu ha nanwe kouyelele woipupulu oo tau dulu oku tu twala kokuteka kwoshikepa yopamhepo. Otwa lombwelwa kutya: “[Satana] mwene ote lifefa omwengeli wouyelele.” Sha faafana, ovapiya vaye, mwa kwatelwa ovashunimonima, ovo “ovalongi ovanamakoto” ovo “tave liningi ovayakuli vouyuki.” Ngeenge otwa dimine omatomhafano oipupulu aavo va tya ngaho, elineekelo letu mEendjovo doshili daJehova, Ombibeli, otali dulu okunghundipalekwa neitavelo letu otali dulu okufya.—2 Ovakorinto 11:13-15; 1 Timoteus 1:19.
15. Oshike tashi dulu oku tu kwafela tu kale mondjila ei tai twala komwenyo?
15 Omupsalme okwa shanga ta ti: “Ondjovo yoye oyo olamba yeemhadi dange, nouyelele mondjila yange.” (Epsalme 119:105) Heeno, ‘ondjila ya finana ei tai twala komwenyo’ osha yela kutya otai minikilwa kuKalunga ketu omunahole, Jehova, “ou a hala ovanhu [vomaludi aeshe] va xupifwe nova fike meshiivo [lashili] loshili.” (Mateus 7:14; 1 Timoteus 2:4, yelekanifa NW.) Okutula moilonga eemhango dOmbibeli otashi ke tu amena tu ha xwanduke mo mondjila ei ya finana tu ye mondjila yomilaulu. Paulus okwa shanga ta ti: “Omishangwa adishe da yandjwa keenghono dOmhepo yaKalunga odi shii kulonga [nokuyukililifa oinima, NW] nokupukulula nokutekula mouyuki.” (2 Timoteus 3:16) Eshi hatu kulu pamhepo, ohatu hongwa kEendjovo daKalunga. Mouyelele wEendjovo daKalunga omo hatu dulu okulipukulula ile ngeenge sha pumbiwa, okupukululwa kovafita ovanahole meongalo. Sha faafana, ohatu dulu okuyukililifa oinima nokutambula ko epukululo nelininipiko eshi hatu pukululwa mouyuki opo tu kale nokweenda mondjila yomwenyo.
Okweenda nolupandu mouyelele
16. Ongahelipi hatu dulu okuulika olupandu omolwefiloshisho likumwifi laJehova louyelele?
16 Ongahelipi hatu dulu okuulika olupandu omolwefiloshisho likumwifi laJehova louyelele? Johannes etukulwa eti-9 ote tu lombwele kutya eshi Jesus a velula omulumenhu a dalwa omupofi, omulumenhu okwa li e linyengifwa a ulike olupandu laye. Ngahelipi? Okwa itavela Jesus e li Omona waKalunga nokwe mu shiivifa moipafi e li “omuprofeti.” Kakele kaasho, okwa popya nouladi ta tu omhinge naavo va kendabala okudina oshikumwifilonga shaJesus. (Johannes 9:17, 30-34) Omuyapostoli Petrus okwa ifana oilyo yovavaekwa yeongalo lopaKriste “oshiwana shi li emona le likalekelwa.” Omolwashike? Omolwaashi ove na omhepo yolupandu ngaashi omulumenhu oo a li a dalwa omupofi nokwa twikululwa. Ova ulika olupandu omolwaJehova, Omukwafi wavo, ‘mokuhepaulula oilonga ya fimana yaau e va ifana mo momulaulu, va ye mouyelele waye tau kumwifa.’ (1 Petrus 2:9, NW; Ovakolossi 1:13) Ovo ve na eteelelo lokombada yedu ove na omhepo yolupandu ya faafana, notava yambidida ovamwaxe ovavaekwa meudifo lomoipafi ‘lefimano’ laJehova. Kau fi tuu oufembanghenda u na ondilo inene oo Kalunga ta yandje kovanhu inava wanenena!
17, 18. (a) Omunhu keshe oku na oshinakuwanifwa shashike? (b) Mokuhopaenena Timoteus, Omukriste keshe okwa ladipikwa a henuke shike?
17 Okukala nolupandu tali di komutima omolwouyelele woshili okwa fimanenena. Dimbuluka kutya kape na umwe womufye a dalwa e shii oshili. Vamwe ove i lihonga ve li ovakulunhu, nova mona diva efimano louyelele komesho yomilaulu. Vamwe ove na oufembanghenda munene wokukala va tekulwa kovadali ovatilikalunga. Omolwaashi otashi dulu okukala shipu kuvo okukwata ouyelele okahetengi. Ondombwedi imwe oyo ovadali vayo va longela Jehova fimbo kwa li inai dalwa, oya dimina kutya oshe i pula efimbo lihapu neenghendabala i ude ko eityo nefimano alishe loshili oyo ya li ya hongwa okudja kounona wayo. (2 Timoteus 3:15) Ovanyasha ile ovakulupe, keshe umwe womufye okwa pumbwa okukulika olupandu lomoule omolwoshili oyo Jehova a holola.
18 Omulumenhu omunyasha Timoteus okwa li a hongwa “omishangwa diyapuki” okudja kounona waye, ndelenee osha li omolwokukondja ashike neenghono moukalele waye a hanga oukulunhu e li Omukriste. (2 Timoteus 3:15) Onghee hano okwa li a wana okukwafela omuyapostoli Paulus, oo e mu kumaida ta ti: “Diinina, u monike kuKalunga oove omufindani [momayeleko], omulongi ita fi ohoni oshilonga shaye, e shii okutukula nawa ondjovo yoshili.” Ngaashi Timoteus, atusheni natu henukeni okulonga keshe osho tashi dulu oku tu fifa ohoni—ile okufifa Jehova ohoni molwetu!—2 Timoteus 2:15.
19. (a) Ngaashi David, atusheni otu na etomheno lokupopya shike? (b) Oshike tashi ka kundafanwa moshitukulwa tashi landula?
19 Otu na etomheno keshe okutanga Jehova, oo e tu pa ouyelele woshili yaye. Ngaashi ohamba David, ohatu ti: “Omwene Oove olamba yange! Omwene ta minikile omilaulu dange.” (2 Samuel 22:29) Ndele nande ongaho, katu na okukala nande tu he na ko nasha, molwaashi eshi otashi dulu oku tu shuna momilaulu omo twa xupifwa. Onghee hano, oshitukulwa tashi landula otashi ke tu kwafela tu konakone efimano olo hatu yandje koshili yopakalunga monghalamwenyo yetu.
1. Ouyelele ou na ngahelipi ekwatafano nomwenyo?
[Efano pepandja 23]
Jehova oye odjo youyelele wopalutu nowopamhepo
[Efano pepandja 25]
Ngaashi Jesus a velula omulumenhu omupofi kanini nakanini, osho ngaha he tu kwafele tu dje momilaulu dopamhepo
[Efano pepandja 27]
Otwe lihonga shike?
• Jehova oha yandje ngahelipi ouyelele wopamhepo?
• Omilaulu dopamhepo odo de tu dingilila otadi eta eshongo lashike?
• Otu na okuhenuka oiponga ilipi?
• Ongahelipi hatu dulu okuulika olupandu letu omolwouyelele woshili?