Ova mona ouwa mouwanghenda waJehova

OMIDO 4 000 lwaapo da pita, omonamati womumwaina waAbraham, Lot, okwa popya shi na sha naJehova ta ti: “Ove wa [nenepeka ouwanghenda woye, NW].” (Genesis 19:19) Eshi osho oshikando shotete outumbulilo “ouwanghenda” tau holoka moNew World Translation of the Holy Scriptures, omo outumbulilo oo wa holoka mo oikando 250. Ndelenee mOmbibeli yOshikwanyama outumbulilo oo peemhito dimwe owa tolokwa noitya ngaashi ‘onghenda ile efilonghenda.’ Jakob, Naomi, David novapiya vaKalunga vamwe ova popya yo kombinga youkwatya ou waJehova. (Genesis 32:10; Rut 1:8; 2 Samuel 2:6) Ndelenee ouwanghenda waJehova otau ti shike? Owa li wa ulikilwa oolyelye monakudiwa? Ongahelipi hatu mono ouwa muo kunena?

2. Omolwashike oshitya shOshiheberi osho hatu kundafana shidjuu okufatulula, notashi dulu okutolokwa ngahelipi?

² MOmishangwa, “ouwanghenda” ou li etoloko loshitya shOshiheberi osho shi na eityo la tamunuka mo unene, onghee hano omalaka mahapu kae na oshitya shimwe ashike osho tashi hepaulula lelalela eityo lasho pauyadi. Omolwaasho, omatoloko ngaashi “ohole,” “efilonghenda” nosho yo “oudiinini” itaa yandje eityo lasho pauyadi. ONew World Translation of the Holy Scriptures—With References oya toloka oshitya shOshiheberi osho sha tolokwa “ouwanghenda” noutumbulilo vali umwe oo tau wapalele, “ohole i na oudiinini.” Ombibeli yOshikwanyama oya toloka outumbulilo oo wOshiheberi noshitya “ouwanghenda” osho shi uditiwe ko nawa notashi yandje shihapu shi na sha neityo loshitya osho.—Exodus 15:13; Epsalme 5:7, eshangelo lopedu moNW.

Ouwanghenda owa yooloka ko kohole nosho yo koudiinini

3. Ouwanghenda owa yooloka ko ngahelipi kohole?

³ Ouwanghenda ile ohole i na oudiinini, oukwatya wa pambafana unene nomaukwatya ohole noudiinini. Ndelenee owa yooloka ko meenghedi da fimana. Konakona nghee ouwanghenda wa yooloka ko kohole. Ohole ohai dulu okuyukifwa koinima nosho yo komadiladilo. Ombibeli otai popi shi na sha ‘nokuhola omaviinyu nomaadi’ nosho yo ‘okuhola ounongo.’ (Omayeletumbulo 21:17; 29:3) Ndelenee ouwanghenda ou na sha novanhu, ndelenee hanomadiladilo ile noinima i he na omwenyo. Pashihopaenenwa, eshi Exodus 20:6 (NW) a ti kutya Jehova ota “ulike ouwanghenda fiyo kepupi eti-yovi,” ota popi shi na sha novanhu.

4. Ongahelipi oshitya shOshiheberi sha tolokwa “ouwanghenda” sha yooloka ko koudiinini?

⁴ Oshitya shOshiheberi sha tolokwa “ouwanghenda” oshi na eityo la tamunuka mo li dule loshitya “oudiinini.” Momalaka amwe oshitya “oudiinini” ohashi longifwa luhapu okuulika koikala oyo omunhu oo e li pedu e na okuulikila omunhu oo a tumbala. Ndelenee, ngaashi omukonakoni umwe a popya, paku shi tala ko paMbibeli, ouwanghenda “luhapu ohau ulike lela komakwatafano e na oikala oyo: omunaenghono oye omudiinini kwaao a nghundipala ile e na omhumbwe.” Onghee hano ohamba David okwa li tai dulu okwiindila Jehova tai ti: “Yelifila omupiya woye oshipala shoye, xupife nge omolwouwanghenda woye!” (Epsalme 31:17) Jehova e li omunaenghono, okwa indilwa a ulike ouwanghenda ile ohole i na oudiinini kwaao a li e na omhumbwe, David. Molwaashi oo e na omhumbwe ke na eenghono okupangela omunaenghono, kungaha ouwanghenda ohau ulikwa pahalo liwa ndele hakefininiko.

5. (a) Oukwatya ulipi wouwanghenda waKalunga wa divilikwa mEendjovo daye? (b) Omaulikilo ouwanghenda waJehova elipi hatu ka konakona?

⁵ Omupsalme okwa pula ta ti: “Omunongo olyelye? Ye . . . na shipaashipe omaningilo ouwanghenda wOmwene.” (Epsalme 107:43) Ouwanghenda waJehova ohau dulu okukala u na oshidjemo shokuxupifa. (Epsalme 6:5; 119:88, 159) Ou li eameno nou li oukwatya wa fimanenena mokweeta elotelo molwomaupyakadi. (Epsalme 31:17, 22; 40:12; 143:12) Omolwoukwatya ou, eveluko kokunyona otali shiiva. (Epsalme 25:7) Mokweendulula omahokololo opamishangwa onhumba nokutala omishangwa dimwe dOmbibeli, ohatu ka mona kutya (1) ouwanghenda waJehova ohau ulikwa noilonga yokondadalunde nosho yo (2) ohau ulikilwa ovapiya vaye ovadiinini.

Exupifo oli li euliko louwanghenda

6, 7. (a) Ongahelipi Jehova a nenepeka ouwanghenda waye molwaLot? (b) Onaini Lot a tumbula ouwanghenda waJehova?

⁶ Otashi dulika onghedi iwa unene yokumona ounene wouwanghenda waJehova oyo okukonakona omahokololo opamishangwa oo e na sha noukwatya oo. MuGenesis 14:1-16, otu wete kutya Lot, omonamati womumwaina waAbraham okwa li a kwatwa po komatanga ovakwaita ovatondi. Ndelenee Abraham okwa xupifa Lot. Omwenyo waLot owa li vali monghuwo i na onghambe eshi Jehova a tokola okuhanauna po oshilando sha nyika oukolokoshi, Sodom, omo mwa li Lot noukwaneumbo waye.—Genesis 18:20-22; 19:12, 13.

⁷ Manga ashike ehanauno laSodom inali fika, ovaengeli vaJehova ova pitifa mo Lot noukwaneumbo waye moshilando osho. Pefimbo tuu olo, Lot okwa ti: “Omupiya woye, nda filwa onghenda koshipala shoye, ndele Ove wa [nenepeka ouwanghenda woye, NW] eshi wa xupifa omwenyo wange.” (Genesis 19:16, 19) Neendjovo edi, Lot okwa dimina kutya Jehova okwe mu ulikila ouwanghenda monghedi ye likalekelwa moku mu xupifa. Moshinima eshi, ouwanghenda waKalunga owa ulikwa okupitila mokuxupifa.—2 Petrus 2:7.

Ouwanghenda waJehova newiliko laye

8, 9. (a) Omupiya waAbraham okwa li a pewa oshilonga shilipi? (b) Omolwashike omupiya a ilikana Kalunga a ulike ouwanghenda waYe, noshike sha ningwa po omanga a li ta ilikana?

⁸ MuGenesis etukulwa eti-24, ohatu lesha mo eulikilo limwe vali louwanghenda ile lohole i na oudiinini yaKalunga. Ehokololo otali ulike kutya Abraham okwa tuma omupiya waye a ye koshilongo shovapambele vaAbraham a ka kongele omonamati waAbraham, Isak, omukainhu. (Ovelishe 2-4) Etumo olo ola li lidjuu, ndelenee omupiya okwa li a shilipalekwa kutya omwengeli waJehova ote mu wilike. (Ovelishe 7) Xuuninwa omupiya okwa fika pomufima pondje “yoshilando shaNahor” (kashiimba Haran ile onhele i li popepi) omanga ovakainhu va li tave uya okuteka omeva. (Ovelishe 10, 11) Eshi a mona ovakainhu tava ehene popepi, okwa shiiva kutya omhito oyo tai dana onghandangala ya fimanenena metumo laye oya fika. Ndelenee ongahelipi kwa li ta dulu okutongola mo omukainhu oo a wapalela?

⁹ Molwaashi okwa li e shi shii kutya okwa pumbwa ewiliko lopakalunga, omupiya waAbraham okwa ilikana ta ti: “Omwene Kalunga kaAbraham, omwene wange, monifa nge elao nena ndee [ulikila omwene wange Abraham ouwanghenda, NW].” (Ovelishe 12) Mbela ongahelipi Jehova kwa li ta ka ulika ouwanghenda waye? Omupiya okwa pula edidiliko lokondadalunde olo molwalo ta ka dula okutongola mo omukainhu oo a hoololwa kuKalunga. (Ovelishe 13, 14) Omukainhu umwe okwa ninga naanaa ngaashi omupiya a pula Jehova. Doshili, okwa li sha fa ashike omukainhu oo a uda eilikano lomupiya. (Ovelishe 15-20) Omupiya “okwe mu tala, a kumwa.” Ndelenee, opa li natango oushili wa fimana oo wa li wa pumbiwa okushiivika. Mbela omukainhu ou ta monika nawa okwa li umwe womovapambele vaAbraham? Mbela okwa li ngoo natango e li ina hombolwa? Onghee hano omupiya okwa “mwenenena nokwa hala a shiive Omwene ngenge e mu monifila tuu ondjila i nelao ile ahowe.”—Ovelishe 16, 21.

10. Omolwashike omupiya waAbraham e uya pexulifodiladilo olo kutya Jehova okwa ulikila omwene waye ouwanghenda?

¹⁰ Konima yokafimbo kaxupi, omukainhu ou omunyasha okwe liholola kutya ye “omona okakadona kaBetuel, omona waMilka e mu dala naNahor [omumwaina waAbraham].” (Genesis 11:26; 24:24) Pefimbo olo tuu olo omupiya okwa shiiva kutya Jehova okwa nyamukula eilikano laye. Molwaashi okwa li e shi kuminwa, okwe linyongamena ndee ta ti: “Omwene Kalunga kaAbraham, omwene wange na hambelelwe, osheshi Ye ina anyena omwene wange ouwanghenda noudiinini waye. Omwene okwa endifa nge nondjila ei yokeumbo lomumwaina womwene wange.” (Ovelishe 27) Mokuyandja ewiliko, Kalunga okwa ulikila omwene womupiya oo, Abraham, ouwanghenda.

Ouwanghenda waKalunga ohau eta elotelo neameno

11, 12. (a) Omomayeleko elipi Josef a mona ouwanghenda waJehova? (b) Ongahelipi ouwanghenda waKalunga wa ulikwa molwaJosef?

¹¹ Paife, natu konakone Genesis etukulwa eti-39. Otali yukifa elitulemo komutekulululwa waAbraham, Josef, oo kwa li a landifwa po moupika muEgipiti. Ndele nande ongaho, “Omwene okwa kala naJosef.” (Ovelishe 1, 2) Doshili, nokuli nOmuegipti Potifar, omwene waJosef, okwe uya pexulifodiladilo olo kutya Jehova okwa li pamwe naJosef. (Ovelishe 3) Ndelenee, Josef okwa li a shakeneka eyeleko la kwata moiti unene. Okwa li a lundilwa kutya okwa ponokela omukainhu waPotifar a nangale naye nokwa li a tulwa modolongo. (Ovelishe 7-20) Eshi a li “modolongo yomedu,” “eemhadi daye okwa li ve di tula meti, [nomwenyo waye owa li momalyenge, NW].”—Genesis 40:15, NW; Epsalme 105:18.

¹² Oshike sha ningwa po pefimbo leyeleko olo la kwata moiti unene? “Omwene okwa li naJosef nokwe mu monifila ouwanghenda.” (Ovelishe 21a) Oshilonga shouwanghenda shonhumba osha twala fiyo omelandulafano loiningwanima oyo konima yefimbo ya eta elotelo komaupyakadi oo Josef a li muo. Jehova okwa ‘hokwifa Josef momesho omukulunhu wodolongo.’ (Ovelishe 21b) Oshidjemo, omukulunhu wodolongo okwa lenga Josef pondodo yoshinakuwanifwa. (Ovelishe 22) Opo nee, Josef okwa shakeneka omulumenhu oo xuuninwa e mu shiivifa kuFarao, omupangeli waEgipti. (Genesis 40:1-4, 9-15; 41:9-14) Oshidjemo, ohamba oya lenga Josef pondodo yomupangeli omutivali muEgipti, opo a longe oshilonga osho sha xupifa eemwenyo pefimbo londjala medu laEgipti. (Genesis 41:37-55) Okumona oixuna kwaJosef okwa hovela eshi a li e na omido 17 nokwa twikila oule womido di dule po 12! (Genesis 37:2, 4; 41:46) Ndelenee momukokomoko womido adishe odo doudjuu noixuna, Jehova Kalunga okwa ulikila Josef ouwanghenda waye moku mu amena kehanauno lofilufilu nomoku mu xupifa opo a dule okukala noufembanghenda wokudana onghandangala melalakano laKalunga.

Ouwanghenda waKalunga ihau xulu po nande

13. (a) Omaulikilo elipi ouwanghenda waJehova taa hangika mEpsalme 136? (b) Ouwanghenda oshike lelalela?

¹³ Jehova okwa ulikila Ovaisrael ve li oshiwana ouwanghenda waye oikando ihapu. Epsalme 136 otali hokolola kutya mouwanghenda waye, okwe va pa exupifo (Ovelishe 10-15), ewiliko (Ovelishe 16), neameno. (Ovelishe 17-20) Kalunga okwa ulikila yo oohandimwe ouwanghenda waye. Omunhu oo ha ulikile ovanhu vakwao ouwanghenda ohe shi ningi noilonga yehalo liwa opo a wanife po omhumbwe ya kwata moiti. Shi na sha nouwanghenda, embo limwe lomauyelele Ombibeli ola ti: “Oo oshilonga tashi xupifa ile tashi xumifa komesho onghalamwenyo. Okukatuka onghatu molwa umwe oo ta mono oixuna ile e li moudjuu.” Omuhongwanhu umwe okwe u fatulula u li “ohole ya lundululilwa moilonga.”

14, 15. Omolwashike hatu dulu okukala noushili kutya Lot okwa li omupiya waKalunga a hokiwa kuye?

¹⁴ Omahokololo aGenesis oo twa konakona, okwa ulika kutya Jehova iha dopa okuulikila ovo ve mu hole ouwanghenda. Lot, Abraham naJosef ova li meenghalo da yooloka nokwa li va shakeneka omayeleko a yooloka. Ova li ovanhu inava wanenena, ndelenee ova li ovapiya vaJehova va hokiwa nokwa li va pumbwa ekwafo laYe. Ohatu dulu okuhekelekwa koushili oo kutya Tate yetu womeulu omunahole oha ulikile ovanhu va tya ngaho ouwanghenda.

¹⁵ Lot okwa li a ninga omatokolo e he li pandunge oo a twala fiyo omoudjuu. (Genesis 13:12, 13; 14:11, 12) Ndelenee okwa ulika yo omaukwatya oo e shii okupandulwa. Eshi ovaengeli vaKalunga vavali ve uya muSodom, Lot okwe va ulikila ohole moku va yakula. (Genesis 19:1-3) Omolweitavelo, okwa londwela oitenya yaye yovamati kombinga yehanauno laSodom olo la li poduka. (Genesis 19:14) Etaleko laKalunga li na sha naLot otali hangika mu 2 Petrus 2:7-9, omo hatu lesha, taku ti: “[Jehova] okwa xupifa Lot, omuyuki kwa li a yahamekwa keenghedi dovalundakani va kala moixuna yokuwanifa ouhalu; eshi a kala mokati kavo, omuyuki ou, omwenyo waye omuyuki wa yahamekwa efiku nefiku molwoilonga yavo i he nomhango, oyo e i tala noku i uda. Osho ngaha Omwene e shii kuxupifa ovayuki momahongaulo.” Heeno, Lot okwa li omulumenhu omuyuki, neendjovo edi otadi ulike kutya okwa li omutilikalunga. Ngaashi ye, nafye ohatu hafele ouwanghenda waKalunga eshi hatu kala “moweenda uyapuki nometilokalunga.”—2 Petrus 3:11, 12.

16. Oneendjovo dihokwifa dilipi Ombibeli tai popi shi na sha naAbraham nosho yo naJosef?

¹⁶ Ehokololo lomuGenesis 24 otali ulike sha yela nawa shi na sha nekwatafano pokati kaAbraham naJehova. Ovelishe yotete otai ti kutya ‘Omwene okwa nangeka noupuna Abraham muaishe.’ Omupiya waAbraham okwa ifana Jehova “Kalunga kaAbraham, omwene wange.” (Ovelishe 12, 27) Nomuhongwa Jakob okwa ti kutya Abraham okwa li a “yukipalifwa” “nokwa ifanwa kaume kaKalunga.” (Jakob 2:21-23) Naashi osho sha li ngaho shi na sha naJosef. Ekwatafano lopofingo pokati kaJehova naJosef ola divilikwa metukulwa laGenesis eti-39. (Ovelishe 2, 3, 21, 23) Kakele kaasho, shi na sha naJosef, omuhongwa Stefanus okwa ti: “Kalunga okwa li pamwe naye.”—Oilonga 7:9.

17. Oshike hatu lihonga moshihopaenenwa shaLot, Abraham naJosef?

¹⁷ Ovanhu ovo va ulikilwa ouwanghenda waKalunga ovo twa kundafana, ova li ovanhu ovo va li ve na ekwatafano liwa naJehova Kalunga nova wanifa po elalakano laYe meenghedi donhumba. Ova shakeneka omandangalati oo va li itava dulu oku a tauluka kuvo vene. Omwenyo waLot, okutwikila kwepata laAbraham nosho yo eameno longhandangala yaJosef, oya li monghuwo i na onghambe. Jehova oye aeke a li ta dulu okuwanifa po eemhumbwe dovalumenhu ava ovatilikalunga nokwe shi ninga mokukatuka eenghatu noilonga youwanghenda. Ngeenge otwa hala okumona ouwanghenda waJehova Kalunga fiyo alushe, nafye yo otu na okukala nekwatafano lopofingo lopaumwene naye notu na okutwikila okuwanifa po ehalo laye.—Esra 7:28; Epsalme 18:50.

Ovapiya vaKalunga ova hokiwa kuye

18. Omishangwa dOmbibeli di lili noku lili otadi ulike shike kombinga youwanghenda waJehova?

¹⁸ “Edu oli yadi ndoo” ouwanghenda waJehova nokatu na tuu olupandu molwoukwatya ou waKalunga! (Epsalme 119:64) Ohatu linyenge nomutima aushe keendjovo odo da endululwa luhapu komupsalme, tadi ti: “Ovo nava pandulile Omwene ouwanghenda waye noikumifi yaye, ei ha longele ovana vovanhu.” (Epsalme 107:8, 15, 21, 31) Otwa hafa eshi Jehova ha ulikile ovapiya vaye ovo va hokiwa kuye ouwanghenda—kutya nee ove li oohandimwe ile ongudu. Meilikano, omuprofeti Daniel okwa ifana Jehova e li ‘Kalunga kanene noha tilika, oo ta diinine ehangano nouwanghenda kuava ve mu tila nokuwanifa oipango yaye.’ (Daniel 9:4) Ohamba David oya ilikana tai ti: “Diinina ouwanghenda woye kuava, tave ku shiiva.” (Epsalme 36:11) Inatu pandula tuu eshi Jehova ha ulikile ovapiya vaye ouwanghenda!—1 Eehamba 8:23; 1 Omafimbo 17:13.

19. Moshitukulwa tashi landula, ohatu ka konakona omapulo elipi?

¹⁹ Doshili, katu na tuu oufembanghenda okukala oshiwana shaJehova! Kakele kokumona omauwa molwohole yaKalunga oyo a ulikila ovanhu aveshe, fye ohatu hafele omanangeko noupuna e likalekelwa omolwouwanghenda ile ohole i na oudiinini yaTate yetu womeulu. (Johannes 3:16) Ohatu mono ouwa tau di moukwatya ou waJehova u na ondilo, unene tuu pomafimbo oudjuu. (Epsalme 36:8) Ndelenee ongahelipi hatu dulu okuhopaenena ouwanghenda waJehova Kalunga? Mbela ohatu ulike oukwatya ou wa fimana pauhandimwe? Omapulo aa namakwao e a pamba ohatu ke a konakona moshitukulwa tashi landula.

1. Onaini outumbulilo “ouwanghenda” wa longifwa oshikando shotete moNew World Translation of the Holy Scriptures, nomapulo elipi hatu ka konakona e na sha noukwatya oo?

[Efano pepandja 10]

Mbela ou shi shii kutya Kalunga okwa ulikila ngahelipi Lot ouwanghenda?

[Efano pepandja 12]

Mouwanghenda waye, Jehova okwa wilika omupiya waAbraham

[Efano pepandja 13]

Jehova okwa ulika ouwanghenda mokwaamena Josef

[Efano pepandja 14]

Oto dimbuluka?

• Etoloko lopamishangwa lilipi tali shiiva okutoloka “ouwanghenda”?

• Ouwanghenda owa yooloka ko ngahelipi kohole nosho yo koudiinini?

• Omeenghedi dilipi Jehova a ulikila Lot, Abraham naJosef ouwanghenda?

• Eshilipaleko lilipi hatu dulu okukala tu na she likolelela komauliko ouwanghenda waJehova omonakudiwa?