Pwilikina osho omhepo tai ti!

“Ou e nokutwi, na ude ko eshi Omhepo tai shi lombwele omaongalo.”—EHOLOLO 3:22.

1, 2. Omayele elipi a endululwa shi na sha nomatumwalaka aJesus komaongalo aheyali oo a tumbulwa mEhololo?

OVAPIYA vaJehova ove na okuyandja elitulemo keendjovo daJesus Kristus tadi wilikwa komhepo odo a yukifa komaongalo aheyali a tumbulwa membo lOmbibeli lEhololo. Doshili, keshe limwe lomomatumwalaka oo oli na omayele aa taa ti: “Ou e nokutwi, na ude ko eshi Omhepo tai shi lombwele omaongalo.”—Ehololo 2:7, 11, 17, 29; 3:6, 13, 22.

² Otwa konakona nale omatumwalaka aJesus kovaengeli ile kovapashukili vokuEfeso, Smirna naPergamo. Ongahelipi hatu dulu okumona ouwa mwaasho a lombwela omaongalo makwao ane okupitila momhepo iyapuki?

Komwengeli wokuTiatira

3. Tiatira osha li peni, nokwa li sha shiivikila unene oilongomwa ilipi?

³ “Omona waKalunga” ota yandje olupandu nota hanyene eongalo lomuTiatira. (Lesha Ehololo 2:18-29.) Tiatira (paife Akhisar) okwa li sha tungwa komunghulo wokamulonga oko ka dja momulonga waGediz (wa li nale Hermus) kouninginino waAsia Linini. Oshilando osho okwa li sha shiivikila oilonga younghulungu ihapu. Ovaningi vasho vondomo okwa li hava longifa omidi domuti hau ifanwa mOshiingilisha madder, di li odjo yondomo yoluvala lavo la fimana litilyana ile lopulipuli. Lidia oo a ninga Omukriste pefimbo lokutalela po kwaPaulus kuFilippi shomuGreka, okwa li “omushingifi woiyata [itilyana], wokoshilando shaTiatira.”—Oilonga 16:12-15.

4. Omolwashike eongalo lokuTiatira kwa li la pandulwa?

⁴ Jesus okwa pandula eongalo lomuTiatira omolwoilonga yalo iwa, ohole, eitavelo, elididimiko nosho yo oilonga yalo youkalele. Doshili, ‘oilonga yalo yaxuuninwa oi dule inya yotete mouhapu.’ Nonande otu na ondjokonona iwa, katu na nandenande okukala tu he na ko nasha neenghedi detu.

5-7. (a) Olyelye a li ‘omukainhu Isabel,’ noshike kwa li shi na okuningwa po shi na sha nenwefemo laye? (b) Etumwalaka laKristus keongalo laTiatira otali kwafele ovakainhu ovatilikalunga va ninge shike?

⁵ Eongalo lokuTiatira okwa li le lidiinikila elongelo loikalunga, omahongo oipupulu nosho yo oluhaelo. Mokati kavo omwa li ‘omukainhu Isabel’—tashi dulika ongudu yovakainhu ve na oikala ya fa yohamba onghainhu ikolokoshi Isabel yomapata omulongo Ouhamba waIsrael. Ovahongwanhu vamwe ova diladila kutya ‘ovaprofeti ovakainhu’ vaTiatira okwa li va kendabala okukoka Ovakriste va ye melongelokalunga loikalunga oilumenhu noikainhu i na sha noulikumwe weengeshefa nopo va kufe ombinga moivilo ya kwatela mo oikulya oyo ya yambelwa oikalunga. Inapa kala nande omuprofeti omukainhu e litula po ye mwene ta kendabala okukoka vamwe meongalo lopaKriste kunena!

⁶ Kristus okwa li e li ‘pokuundulila omukainhu oo Isabel mouvelamutala, novahaeli vaye moudjuu munene, ngeenge itave lidilulula va efe oilonga yavo.’ Ovapashukili kave na okuliyandja nandenande kehongo ile kenwefemo loukolokoshi la tya ngaho, nokape na Omukriste a pumbwa okuya moluhaelo lopamhepo ile lopambelela ile okukufa ombinga melongelo loikalunga opo a shiive kutya “oiholekwa yaSatana” (OB-1986) oii filufilu. Ngeenge otwa pwilikine kelondwelo laJesus ‘ohatu ka diinina osho tu kwete,’ noulunde itau ke tu pangela. Molwaashi ova ekelashi oilonga nouhalu nosho yo omalalakano e he fi opakalunga, ovavaekwa ovanyumunwa otava mono “eenghono dokupangela oiwana” notave ke limbwanga mumwe naKristus oku i tataula po. Omaongalo kunena oku na eenyofi dopafaneko, ndele menyumuko lokunyumukila meulu ovavaekwa otava ka pewa “onyofi yongula tai vilima,” Omuhomboli Jesus Kristus.—Ehololo 22:16.

⁷ Eongalo laTiatira okwa li la londwelwa li he lidiinikile enwefemo lii lovakainhu ovashunimonima. Etumwalaka laKristus la nwefwa mo komhepo la pewa eongalo olo, otali kwafele ovakainhu ovatilikalunga va diinine ondodo yavo oyo va pewa kuKalunga kunena. Ihava kendabala okupangela ovalumenhu noihava kokele ovamwaxe nande oumwe moluhaelo lopamhepo ile lopambelela. (1 Timoteus 2:12) Ponhele yaasho, ovakainhu va tya ngaho ohava tula po oshihopaenenwa moilonga iwa tai fimanekifa Kalunga. (Epsalme 68:12; 1 Petrus 3:1-6) Ngeenge eongalo ola amene osho li na—ehongo nelihumbato la koshoka nosho yo oilonga yOuhamba i na ondilo—Kristus ote ke uya neendjabi dikumwifi, ndele hanehanauno.

Komwengeli wokuSarde

8. (a) Sarde osha li peni, nomauyelele amwe kombinga yasho oelipi? (b) Omolwashike eongalo lokuSarde kwa li la pumbwa ekwafo?

⁸ Eongalo lokuSarde okwa li la pumbwa ekwafo la endelela molwaashi okwa li la fya pamhepo. (Lesha Ehololo 3:1-6.) Sarde okwa li oshilando sha xuma komesho osho sha li eekilometa 50 lwaapo kolukadi laTiatira. Omalandifo, edu liwa monhele oyo nosho yo oikutu nomamate a longwa molududi leedi oya kwafela okuninga oshilando osho sha li novakalimo 50 000 shi kale shiyamba. Pamunandjokonona Josefus, Sarde osha li oulikumwe munene wOvajuda mefelemudo lotete K.O.P. Mokati koinima oyo ya nyonaunwa po omu na oshinagoga nosho yo otembeli yoshikalungakainhu shaEfeso, Artemis.

9. Otu na okuninga shike ngeenge oilonga yetu otai longwa ashike ngahenya?

⁹ Kristus okwa lombwela omwengeli weongalo laSarde ta ti: “Oilonga yoye ondi i shii, u nedina wa fa u nomwenyo, ndelenee owa fya.” Ongahelipi ngeenge otu na edina kutya otu li oupafi pamhepo ndele katu na ko nasha unene nomaufembanghenda opaKriste, noilonga yetu otai longwa ashike ngahenya notu li “pokufya” pamhepo? Ngeenge osho shi li ngaho, otwa pumbwa ‘okudimbulukwa nhumbi twa pelwe notwa udile’ etumwalaka lOuhamba notu na okupepaleka eenghendabala detu moilonga iyapuki. Doshili, otu na okuhovela okukufa ombinga nomutima aushe pokwoongala kwopaKriste. (Ovaheberi 10:24, 25) Kristus okwa londwela eongalo lokuSarde ta ti: “Ngenge ito kala wa pashuka, ohandi uya ngaashi omulunga, ndele ku na apa to ka shiiva otundi oyo handi ku hange.” Ongahelipi kunena? Mafiku ohatu ke lihokolola.

10. Nokuli nomonghalo ya fa oyo yomuSarde, oshike tashi dulu okukala shoshili shi na sha nOvakriste vanini?

¹⁰ Nokuli nomonghalo ya fa yaSarde, otashi dulika mu kale vamwe vanini ovo ‘ihava nyateke oikutu yavo notava dulu okweenda pamwe naKristus va djala oikutu itoka, osheshi ove shi wana.’ Ohava diinine oukwatya wavo wopaKriste, inave linyateka nokave na edilo lounyuni ou lopaenghedi nolopamalongelokalunga. (Jakob 1:27) Onghee hano, Jesus ‘ita ka dima mo omadina avo membo lomwenyo, ndelenee ote ke a hepaulula koshipala shaXe nomoipafi yovaengeli.’ Molwaashi ova popiwa kutya ova wana okweenda naKristus, ongudu yomuhombolwa yovavaekwa otai ka djala oikutu yoliina itoka tai vilima noya yela, oyo tai faneke oilonga iyuki yovayapuki vaKalunga. (Ehololo 19:8) Oufembanghenda ukumwifi woilonga oo we va teelela meulu otau va ladipike va finde ounyuni ou. Naavo ve na eteelelo lomwenyo waalushe kombada yedu ova tuvikililwa yo omanangeko noupuna. Omadina avo nao okwa shangwa membo lomwenyo.

11. Otu na okuninga ngahelipi ngeenge ohatu hovele okukofa pamhepo?

¹¹ Kape na umwe womufye a hala okuya monghalo yopamhepo inyikifa oluhodi ya fa yeongalo lokuSarde. Ndele ongahelipi ngeenge otwa didilike kutya ohatu hovele okukofa pamhepo? Otu na okukatuka diva omolwouwa wetu vene. Natu tye nee ngeno otwa nanwa keenghedi di he fi dopakalunga ile ohatu hovele okukala ihatu i luhapu kokwoongala ile moukalele wetu. Natu konge ekwafo laJehova okupitila meilikano la mana mo. (Ovafilippi 4:6, 7, 13) Okulesha Ombibeli efiku keshe nokukonakona Omishangwa nosho yo oileshomwa ‘yelenga leumbo lidiinini’ otaku tu kwafele tu kale oupafi pamhepo. (Lukas 12:42-44, OB-1954) Opo nee, ohatu ka kala twa fa ovo vomuSarde va li va hokiwa kuKristus nohatu ka kala enangeko noupuna kovaitaveli vakwetu.

Komwengeli wokuFiladelfia

12. Oto hepaulula ngahelipi onghalo yopamalongelokalunga yomuFiladelfia shonale?

¹² Jesus okwa pandula eongalo laFiladelfia. (Lesha Ehololo 3:7-13.) Filadelfia (paife Alasehir) osha li ondingandinga ya punapala hai longo omaviinyu yomoshitukulwa shokouninginino waAsia Linini. Doshili, oshikalunga shayo shinene osha li Dionysus, kalunga komaviinyu. Osha yela kutya Ovajuda vomuFiladelfia kava li va pondola meenghendabala davo okwiitavelifa Ovakriste Ovajuda oko va diinine oilonga yonhumba yOmhango yaMoses ile va shune kuyo.

13. Ongahelipi Kristus a longifa “oshapi yaDavid”?

¹³ Kristus ‘oku kwete oshapi yaDavid’ nokungaha okwe lineekelelwa oinima aishe yOuhamba nosho yo epashukilo loukwaneumbo weitavelo. (Jesaja 22:22; Lukas 1:32) Jesus okwa longifa oshapi oyo opo a yeulule eemhito nosho yo omaufembanghenda e na sha nOuhamba kOvakriste muFiladelfia shonale nosho yo pamwe pe lili. Okudja mo 1919 okwa yeululila ‘elenga leumbo lidiinini’ ‘oshivelo shinene’ osho tashi twala keudifo lOuhamba nokape na omupataneki ta dulu oku shi idila. (1 Ovakorinto 16:9; Ovakolossi 4:2-4) Doshili, omuvelo oo tau twala momaufembanghenda e na sha nOuhamba owa idilwa omolwaavo “vomongudu yaSatana,” molwaashi kave fi Ovaisrael vopamhepo.

14. (a) Eudaneko lilipi Jesus a udanekela eongalo lomuFiladelfia? (b) Ongahelipi hatu dulu okuliamena tu ha punduke ‘pefimbo leyeleko’?

¹⁴ Jesus okwa udanekela Ovakriste vomuFiladelfia shonale ta ti: “Molwaashi wa diinina ondjovo youtalanheni wange, naame yo ohandi ke ku diinina mefimbo leyeleko olo tali uya kombada yedu alishe.” Okuudifa otaku pula elididimiko ngaashi olo la ulikwa kuJesus. Ine liyandja nandenande kovatondi ndele okwa kala nokulonga ehalo laXe. Onghee hano, Kristus okwa li a nyumuninwa omwenyo ihau fi meulu. Ngeenge otwa kanyatele ketokolotoko letu okulongela Jehova nokuyambidida Ouhamba mokuudifa onghundana iwa, ohatu ka amenwa tu ha punduke ‘pefimbo eli leyeleko.’ Ohatu ka ‘diinina shili osho tu kwete’ twe shi pewa kuKristus mokukendabala okuhapupalifa oinima yOuhamba. Okuninga ngaho otashi ka etela ovavaekwa oshishani shomeulu shi na ondilo i he fi okuyelekwa nosho yo omwenyo waalushe kombada yedu koovakwao ovadiinini.

15. Oshike tashi pulwa ovo tava ka kala ‘eengudi motembeli yaKalunga’?

¹⁵ Kristus okwa weda ko ta ti: “Ou ta findi ohandi mu ningi ongudi motembeli yaKalunga kange, . . . ndee handi mu shange edina laKalunga kange, nedina loshilando shaKalunga kange, oshaJerusalem Shipe tashi kuluka, tashi di meulu kuKalunga kange, [nedina, OB-1954] lange lipe.” Ovapashukili ovavaekwa ove na okudiinina elongelokalunga lashili. Ove na okukala va wana alushe okukala oilyo ‘yaJerusalem Shipe’ mokuudifa kombinga yOuhamba waKalunga nokukala va koshoka pamhepo. Osho osha pumbiwa ngeenge ova hala okukala eengudi motembeli yomeulu ya fimanekwa nopo va dule okukala va shangwa edina loshilando shaKalunga ve li ovakalimo vasho vomeulu nokukala va shangwa edina laKristus ve li omuhombolwa waye. Doshili, natango ove na okukala ve na omatwi oo ha ‘udu osho omhepo tai shi lombwele omaongalo.’

Komwengeli wokuLaodikea

16. Omaushili amwe e na sha naLaodikea oelipi?

¹⁶ Kristus okwa hanyena eongalo li he na ko nasha laLaodikea. (Lesha Ehololo 3:14-22.) Laodikea osha li eekilometa 150 lwaapo koushilo waEfeso nosha li pomashakeneno eendjila dinene dovashingifi mefilu li na edu liwa lomulonga waLikus, osha li oshilando sha punapala hashi longo oinima nosha li ondingandinga yokumbaanga. Oikutu ya longwa molududi lilaula yomoshitukulwa osho okwa li ya shiivika apeshe. Molwaashi osha li shi na ofikola younamiti ya fimana, Laodikea otashi dulika sha longa omuti womesho hau ifanwa ombudu yOvafrigia. Asklepius, oshikalunga shounamiti, osha li shimwe shomoikalunga yoshilando osho ya fimana. Osha yela kutya muLaodikea omwa li mu na Ovajuda vahapu, ovo vamwe vomuvo sha yela kutya ova li oipuna.

17. Omolwashike Ovalaodikea kwa li va hanyenwa?

¹⁷ Mokupopya neongalo laLaodikea okupitila ‘momwengeli’ walo, Jesus okwa popya neenghonopangelo e li “Omuhepaululi omudiinini nOmunashili, efina leshito laKalunga.” (Ovakolossi 1:13-16) Ovalaodikea okwa li va hanyenwa molwaashi kava li ‘vatalala nokava li vapyu’ pamhepo. Molwaashi ova li va lomoka, Kristus okwa li te ke va kunga mo mokanya kaye. Kashi na okukala kwa li shidjuu kuvo okuuda ko oshitwa osho. Hierapolis osho sha li popepi osha li shi na eefifiya domeva mapyu, omanga Kolossi sha li shi na omeva matalala. Ndele molwaashi omeva okwa li a felwa ominino okuya kuLaodikea oule woshinano, otashi dulika omeva okwa li haa fiki koshilando osho a lomoka. Peembinga dimwe okwa pitifwa momukangha. Popepi naLaodikea, okwa pitifwa momamanya a tyuulwa oo a tulwa kumwe noshameende.

18, 19. Ongahelipi Ovakriste kunena ovo va fa ovo vomuLaodikea tava dulu okukwafelwa?

¹⁸ Oohandimwe kunena ovo va fa Ovalaodikea kava hokwifa va fa omeva mapyu nokava tulumukifa va fa omeva matalala. Ngaashi omeva a lomoka, otava ka kungwa mo! Jesus ina hala oku va longifa ve li ovapopilikalelipo vaye, ve li ‘ovatumwa ponhele yaye’ ovavaekwa. (2 Ovakorinto 5:20) Ngeenge itave lidilulula, otava ka kanifa oufembanghenda wavo ve li ovaudifi vOuhamba. Ovalaodikea okwa li va lalakanena omaliko okedu nokava li ‘ve shi shii kutya ova li omapongo, ovakwanaluhepo, ovapofi nova li hamunghele.’ Opo ku kufwe po oluhepo lopamhepo, oupofi nosho okukala hamunghele, keshe oo e va fa kunena okwa pumbwa okulanda kuKristus “oshingoldo sha yelifwa” sheitavelo la yelekwa, ‘oikutu itoka’ youyuki nosho yo “omaadi omesho” oo ta xumifa komesho okumona ko kwopamhepo. Ovakriste ovapashukili ova hafa oku va kwafela va kale ve shii omhumbwe yavo yopamhepo opo va ninge “oipuna meitavelo.” (Jakob 2:5; Mateus 5:3, NW) Natango, ovapashukili ova pumbwa oku va kwafela va vave “omaadi omesho” opamhepo—va tambule ko nokukala metwokumwe nomahongo, omayele, oshihopaenenwa nosho yo oikala yopamadiladilo yaJesus. Osho ohashi velula “okahalu kombelela nokahalu komesho noifulalala yokukalamwenyo.”—1 Johannes 2:15-17.

¹⁹ Jesus oha hanyene nokuyandja outekuduliko kwaaveshe ovo e hole. Ovapashukili koshi yaye ove na okuninga sha faafana ve na onghenda. (Oilonga 20:28, 29) Ovalaodikea okwa li va pumbwa okukala ‘ovaladi nokulidilulula’ nokuninga omalunduluko mokudiladila nomonghedi yokukalamwenyo kwavo. Ndele mbela ope na vamwe vomufye ovo va ika okukalamwenyo oko taku tulifa oilonga yetu iyapuki oyo hatu longele Kalunga pondodo yopedu? Ngeenge osho ngaho, natu ‘lande omaadi omesho kuJesus’ opo tu dule okumona kutya osha fimana okukonga nouladi Ouhamba tete.—Mateus 6:33.

20, 21. Oolyelye tave linyenge sha yuka ‘kokukonghola’ kwaJesus kunena, nove na etimaumbwile lashike?

²⁰ Kristus okwa ti: “Tala, ondi li ofika poshivelo ndee handi konghola, ngenge pe na ou ta udu ondaka yange ndee ta yeulula oshivelo, ohandi piti nokuuya kuye, ndele hatu li ouvalelo pamwe naye, naye pamwe naame.” Jesus okwa kala luhapu ha yandje ehongo lopamhepo ofimbo a li ta li ouvalelo navamwe. (Lukas 5:29-39; 7:36-50; 14:1-24) Paife ota konghola pomuvelo weongalo olo la fa lOvalaodikea. Mbela oilyo yalo otai ke linyenga ngoo kokukonghola kwaye, otai ka pendula ngoo vali ohole yayo yoku mu hola, oku mu tambula ko mokati kayo noku mu efa e i honge? Ngeenge oya ningi ngaho, Kristus ota ka lya pamwe nayo ndele tai mono ouwa muhapu pamhepo.

²¹ “Eedi dimwe” kunena otadi yeulula Jesus pafaneko e uye mo, neenghatu da tya ngaho otadi twala komwenyo waalushe. (Johannes 10:16, OB-1954; Mateus 25:34-40, 46) Kukeshe omuvaekwa ta findana, Kristus ote mu pe oufembanghenda wokukala ‘omutumba pamwe naye kolukalwapangelo laye, ngaashi ye a findana ndele ta kala omutumba pamwe naXe kolukalwapangelo laYe.’ Heeno, kovavaekwa ovafindani, Jesus okwa udaneka ondjabi inene yoku ka kala kolukalwapangelo pamwe naye kolulyo laXe meulu. Eedi dimwe odo tadi findana odi na eteelelo loku ka kala monhele iwa kombada yedu koshi yepangelo lOuhamba.

Oshilihongomwa kufyeni atushe

22, 23. (a) Ongahelipi Ovakriste aveshe tava dulu okumona ouwa meendjovo daJesus komaongalo aheyali? (b) Oshike shi na okukala etokolotoko letu?

²² Kape na omalimbililo kutya Ovakriste aveshe otava dulu okumona omauwa mahapu meendjovo daJesus komaongalo aheyali okuAsia Linini. Pashihopaenenwa, mokudidilika kutya Kristus okwa yandja olupandu la yeleka, ovakulunhuongalo Ovakriste ovanahole ohave linyengifwa va pandule oohandimwe nosho yo omaongalo oo taa ningi nawa pamhepo. Opo pe na ounghundi, ovakulunhuongalo ohava kwafele ovaitaveli vakwao va longife ouhaku wopamishangwa. Atusheni ohatu dulu okutwikila okumona ouwa moitukulwa i lili noku lili yomayele oo Kristus a yandja komaongalo aheyali, shimha ashike hatu a tula moilonga pamwe neilikano nosho yo nope he na okwoongaonga.a

²³ Omafiku aa axuuninwa kae fi efimbo lokuhenakonasha, lokukala nohole yokuhola omaliko nokae fi efimbo lakeshe tuu osho tashi tu ningifa tu longe ashike shinini moilonga yokulongela Kalunga. Onghee hano, omaongalo aeshe naa kale nokuvilima unene ngaashi oixwekelwashela oyo Jesus ta kaleke ponhele yayo. Tu li Ovakriste ovadiinini, natu kale alushe twa tokola toko okuyandja elitulemo kwaasho Kristus ta popi nokupwilikina kwaasho omhepo tai ti. Opo nee ohatu ka kala nehafo tali kalelele tu li ovahumbati vouyelele tava fimaneke Jehova.

[Omashangelo opedu]

Oto nyamukula ngahelipi?

• Olyelye a li ‘omukainhu Isabel,’ nomolwashike ovakainhu ovatilikalunga ihave mu hopaenene?

• Onghalo okwa li ya tya ngahelipi meongalo lokuSarde, noshike hatu dulu okuninga opo tu henuke okukala ngaashi Ovakriste vahapu ovo va li oko?

• Omaudaneko elipi Jesus a udanekela eongalo lokuFiladelfia, notaa longo ngahelipi kunena?

• Omolwashike Ovalaodikea kwa li va hanyenwa, ndele omatimaumbwile elipi a tuvikililwa Ovakriste ovaladi?

[Efano pepandja 14]

Oikala ii ‘yomukainhu Isabel’ oi na okuhenukwa

[Efano pepandja 16]

Jesus okwa yeululila ovashikuli vaye ‘oshivelo shinene’ tashi twala mokumona omaufembanghenda e na sha nOuhamba

[Efano pepandja 18]

Mbela oho tambula ko Jesus nokupwilikina kuye?