Kala wa lenga onghandangala oyo to dana meongalo
“Kalunga okwa tula oinhimbu molutu, keshe tuu shimwe, ngaashi Oye mwene a hala.” — 1 KOR. 12:18.
1, 2. (a) Oshike tashi ulike kutya keshe umwe ota dulu okukala ta dana onghandangala yonhumba meongalo? (b) Omapulo elipi taa ka kundafanwa moshitukulwa eshi?
OKUDJA pefimbo laIsrael shonale, eongalo ola kala elongekido olo Jehova ha palula nalo oshiwana shaye pamhepo noku shi pa ewiliko. Pashihopaenenwa, konima eshi Ovaisrael va li va finda oshilando shaAi, Josua ‘okwa li a leshela oshiongalele ashishe shaIsrael eendjovo adishe domhango, enangeko noupuna netulomutima, naanaa ngaashi da shangelwa membo lomhango.’ — Jos. 8:34, 35.
2 Mefelemudo lotete O.P., omuyapostoli Paulus okwa li a lombwela omukulunhuongalo Omukriste Timoteus kutya eongalo lopaKriste oli li ‘eumbo laKalunga, ongudi nekanghameno loshili.’ (1 Tim. 3:15) ‘Eumbo’ laKalunga kunena olo oumwainafana womounyuni aushe wOvakriste vashili. Paulus okwa faafanifa eongalo nolutu lomunhu metukulwa 12 lonhumwafo yaye yotete ya nwefwa mo oyo a li a shangela Ovakorinto. Okwa ti kutya nonande oilyo aishe ohai longo oilonga ya yoolokafana, aishe oya pumbiwa. Paulus okwa ti: “Kalunga okwa tula oinhimbu molutu, keshe tuu shimwe, ngaashi Oye mwene a hala.” Okwa popya yo kutya ‘oinhimbu oyo yolutu hatu i tale ihe nefimano, ohatu i djaleke nokufewa.’ (1 Kor. 12:18, 23) Onghee hano, onghandangala oyo tai danwa kOmukriste umwe oo e li omuyuki meumbo laKalunga kai dule yOmukriste mukwao omudiinini, ndele otava dana ashike eenghandangala da yoolokafana. Ndele mbela ongahelipi hatu dulu okumona kutya ohatu dana onghandangala ilipi meongalo laKalunga nokukala twe i lenga? Oinima ilipi tai dulu okukuma onghandangala oyo hatu dana meongalo? Ongahelipi ‘okweehena komesho kwetu taku dulu okumonika kuaveshe’? — 1 Tim. 4:15.
Ongahelipi hatu dulu okukala twa lenga onghandangala oyo hatu dana meongalo?
3. Omonghedi imwe ilipi hatu dulu okushiiva onghandangala oyo hatu dana meongalo nokuulika kutya otwe i lenga?
3 Onghedi imwe omo hatu dulu okushiiva onghandangala oyo hatu dana meongalo nokuyandja oumbangi kutya otwa lenga onghandangala ya tya ngaho oyo okulongela kumwe filufilu ‘nomupiya omudiinini nomunaendunge’ nosho yo Olutuwiliki laye. (Lesha Mateus 24:45-47.) Otwa pumbwa okulikonakona ngeenge ohatu dulika ngoo kewiliko olo hatu pewa kongudu yomupiya. Pashihopaenenwa, oule womido otwa kala hatu pewa omayele okondadalunde e na sha nokudjala nokuliwapeka, omalihafifo nosho yo e na sha nokulongifa nai o-Internet. Mbela ohatu dulika ngoo filufilu komayele mawa a tya ngaho opo tu kale twa amenwa pamhepo? Ongahelipi shi na sha nekumaido lokulitulila po elandulafano lekonakono loukwaneumbo londjikilile? Mbela otwa dulika ngoo komayele oo ndele hatu litulile po efiku lokuninga ekonakonombibeli loukwaneumbo? Ngeenge inatu hombola ile inatu hombolwa, mbela otwe litulila po ngoo efimbo lokukonakona Omishangwa paumwene? Jehova ote ke tu nangeka noupuna pauhandimwe nosho yo tu li omaukwaneumbo ngeenge otwa kala hatu dulika komayele ongudu yomupiya.
4. Otu na okukaleka shike momadiladilo ngeenge hatu ningi omatokolo e na sha noinima yopaumwene?
4 Ovanhu vamwe otashi dulika va tomhafane kutya omalihafifo nosho yo okudjala nokuliwapeka oinima yopaumwene. Ndele Omukriste oo e liyapulila Kalunga nokwa lenga onghandangala oyo ta dana meongalo ita ka efa a nwefwe mo ketaleko lopaumwene ngeenge ta ningi omatokolo. Otu na okuyandja elitulemo unene kunghee Jehova ha tale ko oinima, ngaashi sha yelifwa mEendjovo daye Ombibeli. Etumwalaka lado oli na okukala ‘olamba yeemhadi detu, nouyelele mondjila yetu.’ (Eps. 119:105) Oshiwa yo okutala kutya omatokolo oo hatu ningi moinima yopaumwene otaa kumu ngahelipi oukalele wetu nosho yo ovanhu vakwetu meongalo nosho yo kondje yeongalo. — Lesha 2 Ovakorinto 6:3, 4.
5. Omolwashike tu na okuhenuka omhepo yemanguluko?
5 ‘Omhepo yomupangeli ou ta longo paife movana vokuhadulika’ oi li apeshe ya fa omhepo oyo hatu fudile mo. (Ef. 2:2) Omhepo ya tya ngaho otai dulu oku tu diladilifa kutya inatu pumbwa ewiliko okudja kehangano laJehova. Inatu hala nandenande okukala twa fa Diotrefes, oo a li ‘iha tambula sha nefimaneko okudja komuyapostoli Johannes.’ (3 Joh. 9, 10, yelekanifa no-NW.) Otwa pumbwa okuhenuka omhepo yemanguluko. Inatu popya sha nande ile tu ninge sha osho tashi ulike kutya inatu fimaneka oupitilo oo Jehova ta longifa okupopya nafye kunena. (Num. 16:1-3) Mepingafano naasho, otu na okukala twa lenga oufembanghenda wetu wokukala hatu longele kumwe nongudu yomupiya. Mbela katu na okukendabala tu kale hatu dulika nokuliyandja kwaavo tava kwatele komesho meongalo letu? — Lesha Ovaheberi 13:7, 17.
6. Omolwashike tu na okukonakona eenghalo detu pauhandimwe?
6 Onghedi imwe vali omo hatu dulu okuulika kutya otwa lenga onghandangala oyo hatu dana meongalo oyo okukonakona nawanawa eenghalo detu pauhandimwe nokuninga ngaashi hatu dulu tu ‘fimaneke oukalele wetu’ nokufimanekifa Jehova. (Rom. 11:13, yelekanifa no-NW.) Vamwe otava dulu okuninga ovakokolindjila vondjikilile. Vamwe ove li moilonga yefimbo li yadi ye likalekelwa, ngaashi oilonga youtumwa, oilonga youpashukilishikandjo nosho yo oilonga yaBetel mounyuni aushe. Ovamwatate novamwameme vahapu ohava kwafele moilonga yokutunga Omalupale Ouhamba. Ovapiya vaJehova vahapu ohava ningi ngaashi tava dulu opo va file oshisho eemhumbwe dopamhepo domaukwaneumbo avo, nohava kufa ombinga pauyadi moukalele oshivike keshe. (Lesha Ovakolossi 3:23, 24.) Ohatu dulu okukala nelineekelo kutya ngeenge otwe liyandje nehalo liwa moilonga yaKalunga nokuninga ngaashi hatu dulu tu mu longele nomutima aushe, ohatu ka kala alushe hatu dana onghandangala yonhumba mehangano laye.
Oinima oyo tai dulu okukuma onghandangala oyo hatu dana meongalo
7. Yelifa nghee eenghalo detu tadi dulu okukuma onghandangala oyo hatu dana meongalo.
7 Osha fimana okukonakona eenghalo detu molwaashi otadi dulu okukuma onghandangala oyo hatu dana meongalo monghedi yonhumba ile yongadi. Pashihopaenenwa, onghandangala oyo ovamwatate hava dana meongalo oya yooloka ko kwaayo hai danwa kovamwameme ngeenge tashi uya poinima imwe. Omido detu, oukolele wetu nosho yo oinima ikwao imwe nayo ohai kumu osho hatu dulu okulonga moilonga yaJehova. Omayeletumbulo 20:29 otaa ti: “Ewapeko lovamati, olo eenghono davo. Newapeko lovaxungu olo eenghwakutoka.” Oilyo yeongalo oyo inyasha otai dulu okulonga shihapu palutu molwaashi oi na eenghono dounyasha, ofimbo ovanamido hava etele eongalo ouwa muhapu omolwounongo nowino wavo. Otwa pumbwa yo okukaleka momadiladilo kutya keshe osho hatu dulu okulonga mehangano laJehova oshe likolelela konghenda yaJehova. — Oil. 14:26; Rom. 12:6-8.
8. Omahalo etu ohaa kumu ngahelipi osho hatu ningi meongalo?
8 Oshimoniwa shimwe shovamwainafana vavali vopambelela ovanyasha otashi divilike oshinima shimwe osho hashi kumu onghandangala oyo hatu dana meongalo. Ovamwainafana ovo aveshe ova mana ofikola yopombada, nove li meenghalo da faafana. Ovadali vavo ova li va ninga eenghendabala oku va ladipika va lalakanene oukokolindjila wondjikilile ngeenge va mane ofikola. Ndele konima eshi va mana ofikola, umwe okwa ya moukokolindjila, ofimbo umwe a hovela oilonga yefiku alishe yokulikongela omboloto. Mbela oshike sha li sha etifa po omayooloko? Omahalo avo. Hauxuuninwa keshe umwe okwa li a ninga osho a li a hala okuninga. Mbela vahapu vomufye nafye hasho hatu ningi ngaho? Otwa pumbwa okudiladila twa mana mo kombinga yaasho twa hala okulonga moilonga yaKalunga. Mbela itatu dulu okulonga shihapu moilonga yetu yokulongela Kalunga, nokuli nongeenge otashi pula tu ninge omalunduluko meenghalo detu? — 2 Kor. 9:7.
9, 10. Otu na okuninga po shike ngeenge katu na ondjungu yokulonga shihapu moilonga yaJehova?
9 Mbela ongahelipi ngeenge katu na ondjungu yasha okulonga shihapu moilonga yaJehova notu na eamo lokuninga oinima meongalo shimha ashike hatu ningi? Paulus okwa popya monhumwafo oyo a li a shangela Ovafilippi a ti: ‘Kalunga Oye tuu ha longo munye okuhala nokulonga pahokwe yaye, opo nanye mu kale mwa hala nomu katuke eenghatu.’ Heeno, Jehova ota dulu okulonga mufye nota ka nwefa mo omahalo etu. — Fil. 2:13; 4:13, yelekanifa no-NW.
10 Mbela katu na okupula Jehova e tu kwafele tu kale twa hala okulonga ehalo laye? Ohamba David yaIsrael shonale oya li ya pula Jehova e i kwafele i longe ehalo laye. David okwa li a ilikana a ti: “Omwene, ulikile nge eendjila doye, Ove u longe nge omalila oye, ame ndi ende moshili yoye, Ove u longe nge, osheshi Oove Kalunga, omukwafi wange, ohandi ku teelele efiku alishe.” (Eps. 25:4, 5) Nafye ohatu dulu okuninga ngaho mokwiilikana Jehova e tu kwafele tu kale twa hala oku mu hafifa. Ohatu kala twa pandula neenghono Jehova Kalunga nOmona waye ngeenge hatu dilonga kunghee ve udite kombinga yaasho hatu ningi mokuxumifa komesho oinima yavo. (Mat. 26:6-10; Luk. 21:1-4) Okukala nolupandu la tya ngaho otaku dulu oku tu linyengifa tu ilikane Jehova e tu kwafele tu kale twa hala okuninga exumokomesho lopamhepo. Omuprofeti Jesaja okwe tu tulila po oshihopaenenwa shi na sha noikala oyo tu na okukala tu na. Eshi Jesaja a li a uda Jehova ta pula kutya: ‘Olyelye handi mu tumu, nolyelye te tu ile ko?’ okwa li a nyamukula a ti: “Aame ou, tume nge!” — Jes. 6:8.
Nghee to dulu okuninga exumokomesho
11. (a) Omolwashike ovamwatate va pumbwa okulalakanena oinakuwanifwa mehangano? (b) Ongahelipi omumwatate ta dulu okulalakanena oinakuwanifwa meongalo?
11 Ngeenge otwa tale komuvalu wovanhu 289 678 ovo va ninginifwa mounyuni aushe momudo woilonga 2008, otashi ulike kutya ope na omhumbwe inene yovamwatate va kwatele komesho. Mbela ovamwatate ove na okulinyenga ngahelipi komhumbwe ya tya ngaho? Oku shi popya paunafangwa, ove na okukendabala okuwanifa po oiteelelwa yopamishangwa oyo omunhu e na okuwanifa po opo a ninge omuyakuliongalo ile omukulunhuongalo. (1 Tim. 3:1-10, 12, 13; Tit. 1:5-9) Ongahelipi omumwatate ta dulu okuninga eenghendabala a wanife po oiteelelwa yopamishangwa ya tya ngaho? Omokukala ta kufa ombinga pandjikilile moukalele, ta wanifa po oinakuwanifwa yaye yeongalo noudiinini, ta kendabala noudiinini okuxwepopaleka ongushu yomanyamukulo aye pokwoongala kwopaKriste nosho yo okukala e na ko na sha novaitaveli vakwao. Otashi ulike kutya okwa lenga onghandangala oyo ta dana meongalo.
12. Ovanyasha otava dulu okuulika ngahelipi kutya ove na ouladi shi na sha noshili?
12 Ovamwatate ovanyasha, unene tuu ovo vomido omulongo nasha, mbela ove na okuninga po shike opo va ninge exumokomesho meongalo? Ove na okuninga eenghendabala va kale ve na ‘ounongo wopamhepo’ mokukala ve shii Omishangwa. (Kol. 1:9) Otava ka pondola ngeenge ova kala hava konakona Eendjovo daKalunga noukeka nokukala hava kufa ombinga alushe pokwoongala kweongalo. Ovalumenhu ovanyasha otava dulu yo okuninga eenghendabala va kale va wana okupita ‘moshivelo shoshilonga shinene,’ sha hala okutya, okuya moilonga yefimbo li yadi i lili noku lili. (1 Kor. 16:9) Okulalakanena eifano lonhumba moilonga yaJehova oku li shili oshinima sha denga mbada monghalamwenyo nohaku eta omanangeko noupuna manene. — Lesha Omuudifi 12:1.
13, 14. Omeenghedi dilipi ovamwameme tava dulu okuulika kutya ova lenga onghandangala oyo tava dana meongalo?
13 Ovamwameme navo otava dulu okuulika kutya ova lenga oufembanghenda wokukufa ombinga pauhandimwe mokuwanifwa kwEpsalme 68:12. Omushangwa oo otau ti: “Omwene okwa yandja ondjovo, ongudu inene yovakainhu tai twala ondaka yefindano.” Onghedi imwe ididilikwedi neenghono omo ovamwameme tava dulu okuulika kutya ova lenga onghandangala oyo tava dana meongalo oyo okukufa ombinga moilonga yokuninga ovanhu ovahongwa. (Mat. 28:19, 20) Onghee hano, ovamwameme otava dulu okuulika kutya ova lenga onghandangala oyo tava dana meongalo mokukala hava kufa ombinga pauyadi moukalele nosho yo okuninga omaliyambo nehalo liwa omolwoilonga oyo.
14 Paulus okwa li a shangela Titus a ti: ‘Ovakainhu nava kale ve neenghedi da wapala, ovalongi vomuashi shiwa, opo va shiive okupukulula ovakainhu ovanyasha vo va kale ve hole ovalumenhu vavo nokuhola ovana vavo, ndele va kale ve neenghedi diwa novakoshoki ve shii kutekula omaumbo avo, ve nomwenyo muwa, ndee tava dulika kovalumenhu vavo vene, opo ondjovo yaKalunga iha shekifwe.’ (Tit. 2:3-5) Ovamwameme ovo va pyokoka pamhepo otava dulu okukala enwefe mo liwa keongalo. Ngeenge ovamwameme ova kala hava dulika kovamwatate ovo tava kwatele komesho nosho yo okuninga omatokolo e li pandunge moinima ngaashi okudjala nokuliwapeka nosho yo omalihafifo, otava tulile po vamwe oshihopaenenwa shiwa notava ulike kutya ova lenga neenghono onghandangala oyo tava dana meongalo.
15. Ovamwameme ovo inava hombolwa otava dulu okuninga po shike opo ve lididimikile owike?
15 Omafimbo amwe, otashi dulu okukala shidjuu komumwameme ina hombolwa okushiiva kutya onghandangala ilipi ta dana meongalo. Omumwameme umwe oo e na oshimoniwa sha tya ngaho okwa ti: “Okukala ino hombolwa ohashi ningifa omunhu u kale u udite owike omafimbo amwe.” Eshi omumwameme oo a li a pulwa kutya ohe lididimikile ngahelipi onghalo ya tya ngaho, okwa ti: “Eilikano nosho yo okukonakona oya kwafela nge ndi kale ndi shii vali kutya ohandi dana onghandangala ilipi. Ohandi lihongo kutya Jehova okwa tala nge ko ngahelipi, nonda kendabala okukala handi kwafele vamwe meongalo. Osho ohashi kwafele nge ndiha kale handi diladila ashike kombinga yange mwene.” Jehova okwa li a lombwela David mEpsalme 32:8 a ti: “Onda hala ndi ku twe omayele; eisho lange tali ku pashukile.” Jehova oku na ko nasha novapiya vaye aveshe, mwa kwatelwa ovamwameme ovo inava hombolwa, note ke va kwafela aveshe va kale ve shii onghandangala oyo tava dana meongalo.
Kala wa fimaneka onghandangala oyo to dana
16, 17. (a) Omolwashike okutambula ko eshivo laJehova li na sha nokuninga oshitukulwa shehangano laye ku li etokolo la denga mbada olo hatu dulu okuninga? (b) Ongahelipi hatu dulu okuulika kutya otwa fimaneka onghandangala oyo hatu dana mehangano laJehova?
16 Jehova okwa nanena pahole ovapiya vaye aveshe kuye opo va kale ve na ekwatafano naye. Jesus okwa ti: “Kape na ou ta dulu okuuya kuame okuninga Tate, ou a tuma nge, te mu shili.” (Joh. 6:44) Jehova okwe tu shiva pauhandimwe okudja movanhu omamiliyona omayovi kombada yedu, opo tu ninge oshitukulwa sheongalo laye kunena. Otwa ninga etokolo la denga mbada kuhe na vali eshi twa tambula ko eshivo olo. Paife onghalamwenyo yetu oi na elalakano nosho yo eityo. Natango, otwa hafa notwa mbilipalelwa molwaashi ohatu dana onghandangala meongalo.
17 Omupsalme umwe okwa ti: “Omwene, ame ondi hole onhele yongulu yoye.” Omupsalme oo okwa imba yo a ti: “Eemhadi dange tadi kala ofika pedu la lalakana; ohandi ka hambelela Omwene moiongalele yeongalo.” (Eps. 26:8, 12) Kalunga kashili okwa hala keshe umwe womufye a kale ta dana onghandangala mehangano laye. Ngeenge otwa kala hatu landula ewiliko lopauteokratika nokukala twe lipyakidila moilonga yaJehova, ohatu ka ulika kutya otwa fimaneka onghandangala oyo hatu dana mehangano laJehova.
Oto dimbuluka?
• Omolwashike shi li pandunge okufika pexulifodiladilo kutya Ovakriste aveshe otava dana onghandangala meongalo?
• Ongahelipi hatu dulu okuulika kutya otwa lenga onghandangala oyo hatu dana mehangano laJehova?
• Oinima ilipi tai dulu okukuma onghandangala oyo hatu dana meongalo?
• Ongahelipi Ovakriste ovanyasha novakulunhu tava dulu okuulika kutya ova lenga onghandangala oyo tava dana meongalo laJehova?
[Omafano pepandja 21]
Ovamwatate otava dulu ngahelipi okulalakanena oinakuwanifwa meongalo?
[Efano pepandja 22]
Ovamwameme otava dulu okuulika ngahelipi kutya ova lenga onghandangala oyo tava dana meongalo?