Oto dulu ngoo okushiiva Kalunga kedina?
Ngeenge owa pulwa u popife ile u popye odikilila nomunenenhu wonhumba to mu popi kedina, ohashi kala oufembanghenda. Ovanhu ovo va tumbala luhapu ohava ifanwa nomadinafimaneko ngaashi “Presidende,” “Ohamba” ile “Omufimanekwa.” Onghee hano, ngeenge omunenenhu wonhumba okwe ku lombwele ta ti: “Ifane nge ashike kedina,” nopehe na omalimbililo, oto ka kala u udite wa pewa oufembanghenda.
KALUNGA kashili okwe tu lombwela mEendjovo daye, Ombibeli, a ti: “Jehova Ofule; edina laye Jehova.” (Exodus 15:3, OB-1954) Nonande Kalunga oku na omadinafimaneko mahapu ngaashi “Omushiti,” “Omunaenghono adishe” nosho yo “Omwene Omunamapangelo aeshe,” okwa pa ovapiya vaye ovadiinini oufembanghenda woku mu ifana kedina.
Pashihopaenenwa, omuprofeti Moses okwa li a indila Kalunga pomhito imwe, a ti: “Ombili ngoo Jehova.” (Exodus 4:10, NW) Eshi ohamba Salomo ya li tai ilikana peyapulo lotembeli muJerusalem, oya li ya hovela neendjovo edi tadi ti: “Akutu Jehova.” (1 Eehamba 8:22, 23, NW) Eshi omuprofeti Jesaja a li ta ilikana kuKalunga ponhele yoshiwana shaIsrael, okwa ti: “Akutu [Jehova, NW], Oove Tate yetu.” (Jesaja 63:16) Hano osha yela kutya, Tate yetu womeulu ote tu shivi tu kale alushe hatu longifa edina laye.
Nonande okupopya naJehova hatu longifa edina laye osha fimana, okushiiva nawa edina laye okwa kwatela mo shihapu. Jehova okwa udanekela keshe oo e mu hole nokwe mu lineekela, a ti: ‘Onda hala ndi mu amene, osheshi ota shiiva edina lange.’ (Epsalme 91:14) Hano osha yela kutya okushiiva edina laKalunga okwa kwatela mo shihapu, molwaashi otaku kwafele omunhu a kale a amenwa kuKalunga. Ndele mbela ou na okuninga po shike opo u shiive edina laJehova?